ក្រសួងសុខាភិបាលថា កូនប្រុសរបស់ស្ត្រីម្នាក់ដែលឆ្លងជំងឺកូវីដ១៩ ក្នុងព្រឹត្តការណ៍សហគមន៍២៨វិច្ឆិកា បានរកឃើញថា មានផ្ទុកជំងឺនេះដែរ និងរកឃើញអ្នកឆ្លងជំងឺ២នាក់ទៀតជាអ្នកដំណើរមកពីក្រៅប្រទេស ខណៈមន្ត្រីក្រសួងមហាផ្ទៃ២នាក់និងស្ត្រីម្នាក់ដែលឆ្លងក្នុងសហគមន៍ត្រូវបានព្យាបាលជាសះស្បើយ។
សេចក្តីជូនដំណឹងរបស់ក្រសួងសុខាភិបាល ចុះថ្ងៃទី១៥ ខែធ្នូ ឆ្នាំ២០២០ ឱ្យដឹងថា ក្រសួងបានរកឃើញអ្នកឆ្លងជំងឺកូវីដ១៩ថ្មីចំនួន៣នាក់ ក្នុងនោះ មានស្ត្រីពីរនាក់ជាអ្នកធ្វើដំណើរមកពីសហរដ្ឋអាមេរិកនិងប្រទេសជប៉ុន ចូលមកកម្ពុជា កាលពីថ្ងៃទី១៣ ខែធ្នូ ឆ្នាំ២០២០ និងម្នាក់ទៀតជាកុមារា អាយុ១ឆ្នាំ ជាកូនស្ត្រីដែលវិជ្ជមានវីរុសកូវីដ១៩ ក្នុងព្រឹត្តិការណ៍សហគមន៍ ២៨វិច្ឆិកា។
ក្រសួងបន្តថា ស្របពេលគ្នា ក៏មានករណីអ្នកជាសះស្បើយចំនួន៣នាក់ដែលជាអ្នកពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា រួមមាន បុរសអាយុ៥៧ឆ្នាំ រស់នៅបុរីប៉េងហួតផ្លូវ៦០ម៉ែត្រ រាជធានីភ្នំពេញ ជាអគ្គនាយកពន្ធនាគារនៃក្រសួងមហាផ្ទៃ ស្ត្រីអាយុ៣០ឆ្នាំ ជាសមាជិកគ្រួសារអ្នកបើកបរឱ្យអគ្គនាយកដ្ឋានពន្ធនាគារ និងបុរសអាយុ៣៤ឆ្នាំ ធ្វើការនៅក្រសួងមហាផ្ទៃ ជាអ្នកប៉ះពាល់ជាមួយអគ្គនាយកដ្ឋានពន្ធនាគារ។
ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកានេះដែរ ក្រសួងថា នៅមានសំណាកចំនួន៥២៧សំណាកទៀត ដែលត្រូវធ្វើវិភាគបន្តនៅថ្ងៃទី១៥ ខែធ្នូ ឆ្នាំ២០២០នេះ។
ក្រសួងបញ្ជាក់ថា៖ «សរុបអ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា ពីថ្ងៃទី២៨ ខែវិច្ឆិកា ឆ្នាំ២០២០ ដល់ថ្ងៃទី១៤ ខែធ្នូ ឆ្នាំ២០២០ មានចំនួន៤១នាក់»។
បើតាមក្រសួងសុខាភិបាល គិតត្រឹមម៉ោង៧ព្រឹក ថ្ងៃទី១៥ ខែធ្នូ ឆ្នាំ២០២០ ស្ថានភាពជំងឺកូវីដ១៩ នៅកម្ពុជា សរុបមានចំនួន៣៦២នាក់ ក្នុងនោះបានព្យាបាលជាសះស្បើយ៣១២នាក់ និងអ្នកកំពុងព្យាបាលនៅមន្ទីរពេទ្យចំនួន៥០នាក់៕