ក្រសួងប្រៃសណីយ៍ និងទូរគមនាគមន៍ អំពាវនាវឱ្យប្រុងប្រយ័ត្នចំពោះការឆ្លើយឆ្លងព័ត៌មានតាមបណ្តាញសង្គមតេឡេក្រាម (Telegram) ដោយថា មានឧក្រិដ្ឋជនតាមប្រព័ន្ធអ៊ីធឺណិត (Hacker) ក្លែងបន្លំឈ្មោះថ្នាក់ដឹកនាំក្នុងជួររដ្ឋាភិបាល ដើម្បីបោកបញ្ឆោតគ្រប់គ្រងទិន្នន័យជាគោលដៅវាយប្រហារ ។
ការអំពាវនាវរបស់ក្រសួងនេះ ធ្វើឡើងតាមរយៈសេចក្តីជូនដំណឹងកាលពីថ្ងៃម្សិលមិញនេះ ដែលបានដាក់ចេញនូវវិធានការរារាំងការវាយប្រហារតាមប្រព័ន្ធតេឡេក្រាម ក្រោមទម្រង់ជាការក្លែងបន្លំឈ្មោះថ្នាក់ដឹកនាំនៃរាជរដ្ឋាភិបាលឬឈ្មោះបុគ្គលដទៃ។
ក្រសួងនិយាយថា ការវាយប្រហារនេះកំពុងកើតឡើងគួរឱ្យកត់សម្គាល់ ក្រោយពីឧក្រិដ្ឋជនតាមប្រព័ន្ធអ៊ីធឺណិតបានយកឈ្មោះថ្នាក់ដឹកនាំឬបុគ្គលដទៃទៀត ដើម្បីបញ្ជូនមេរោគតាមសារក្នុងកម្មវិធីតេឡេក្រាម។
ក្រសួងគូសបញ្ជាក់ថា ក្នុងករណីអ្នកប្រើប្រាស់ចុចលើឯកសារ ឧក្រិដ្ឋជនអាចចូលទៅគ្រប់គ្រងកុំព្យូទ័រឬទូរសព្ទរបស់អ្នកប្រើប្រាស់ពីចម្ងាយដោយជោគជ័យ និងផ្តល់លទ្ធភាពឱ្យឧក្រិដ្ឋជនលួចយកទិន្នន័យ ដូចជា ឯកសារ លេខកូដសម្ងាត់ ព្រមទាំងបញ្ជាម៉ាស៊ីនថតរូប និងឧបករណ៍ថតសំឡេងផងដែរ។
ក្រសួងណែនាំថា ដើម្បីចៀសវាងពីការធ្លាក់ចូលក្នុងអន្ទាក់បោកប្រាស់របស់អ្នកវាយប្រហារ អ្នកប្រើប្រាស់តេឡេក្រាម គួរផ្ទៀងផ្ទាត់និងត្រួតពិនិត្យគណនីបុគ្គលនិងលេខទូរសព្ទរបស់អ្នកផ្ញើសារមក ទោះមានរូបភាពនិងឈ្មោះថ្នាក់ដឹកនាំក្នុងជួររដ្ឋាភិបាលក៏ដោយ។
ក្រៅពីជូនដំណឹងនេះ ក្រសួងប្រៃសណីយ៍ និងទូរគមនាគមន៍ ក៏បានបញ្ជាក់ផងដែរថា សេចក្តីព្រាងអនុក្រឹត្យស្តីពីច្រកចេញចូលប្រព័ន្ធអ៊ិនធឺណិត ត្រូវបានបញ្ចប់ហើយដែរ ខណៈអនុក្រឹត្យនេះត្រូវបានអង្គការសង្គមស៊ីវិលមួយចំនួនព្រួយបារម្ភថា វាអាចនឹងជាមូលដ្ឋានគ្រឹះសម្រាប់រដ្ឋាភិបាលក្នុងការរឹតបន្តឹងសេរីភាពបញ្ចេញមតិលើបណ្តាញសង្គម។
អ្នកនាំពាក្យក្រសួងនេះ លោក តុល ញ៉ក់ បានប្រាប់ថា លោកមិនទាន់ដឹងពីការវិវត្តនៃសេចក្តីព្រាងនេះនៅឡើយទេ ដោយថា លោកកំពុងជាប់ធ្វើចត្តាឡីស័ក។
ប៉ុន្តែលោកប្រាប់ថា មុនលោកធ្វើចត្តាឡីស័ក សេចក្តីព្រាងនេះត្រូវបានមន្ត្រីជំនាញធ្វើការជាមួយក្រសួងយុត្តិធម៌ ស្តីពីទោសប្បញ្ញត្តិ ដើម្បីឱ្យស្របនឹងក្រមព្រហ្មទណ្ឌនិងក្រមរដ្ឋប្បវេណី មុនបញ្ជូនទៅគណៈរដ្ឋមន្ត្រី។
លោក តុល ញ៉ក់ ប្រាប់ថា៖ «សំខាន់ដោយសារកូវីដ មិនបានធ្វើការពេញដៃពេញជើងជាមួយអង្គភាពពាក់ព័ន្ធ ប៉ុន្តែដំណាក់កាលកំពុងធ្វើការជាមួយក្រសួងយុត្តិធម៌»។
នៅពេលសួរថា តើកន្លងទៅឈ្មោះថ្នាក់ដឹកនាំណាខ្លះដែលត្រូវបានឧក្រិដ្ឋជនអ៊ីនធឺណិតយកទៅប្រើប្រាស់ ហើយធ្លាប់ចាប់បានឧក្រិដ្ឋជនទាំងនោះមកផ្តន្ទាទោសឬទេ លោកសុំមិនធ្វើអត្ថាធិប្បាយ ដោយជំរុញឱ្យទៅសួរប្រធាននាយកដ្ឋានសន្ដិសុខផ្នែកព័ត៌មានវិទ្យា និងទូរគមនាគមន៍ លោក អ៊ូ ផាណារិទ្ធិ ដែលប្រាប់ថា លោកមិនមានការអនុញ្ញាតឱ្យបញ្ចេញព័ត៌មានទាំងនេះទេ ដោយអះអាងថា បញ្ហាមួយចំនួន ក្រសួងមហាផ្ទៃបានបកស្រាយហើយ។
១សប្តាហ៍កន្លងមកនេះ យ៉ាងហោចណាស់មន្ត្រីជាន់ខ្ពស់នគរបាលជាតិពីររូប រួមមាន អគ្គស្នងការនគរបាលជាតិ លោក នេត សាវឿន និងអគ្គស្នងការរងទទួលបន្ទុកផ្នែកសន្តិសុខ លោក ឌី វិជ្ជា ត្រូវបានអគ្គស្នងការនគរបាលជាតិ ចេញប្រកាសច្រានចោលថា មិនបានធ្វើការទំនាក់ទំនងទៅអង្គភាពចំណុះបញ្ជាការដ្ឋានកងទ័ពជើងទឹក ដើម្បីស្នើសុំនិងសាកសួរព័ត៌មានអំពីសន្តិសុខជាតិទេ។
ស្ថាប័នរដ្ឋាភិបាលមួយនេះចាត់ទុកព័ត៌មាននោះថា មានគោលបំណងទុច្ចរិត ធ្វើឱ្យមានការភ័ន្តច្រឡំ បំផុសបំផុលនាំឱ្យមានចលាចលក្នុងជួរកងកម្លាំងប្រដាប់អាវុធ។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មើលឃើញថា បញ្ហាទាំងនេះកំពុងជំរុញឱ្យមានការព្រួយបារម្ភពីការរួមតូចនៃសិទ្ធិបញ្ចេញមតិលើបណ្តាញសង្គម ខណៈពលរដ្ឋកំពុងផុលផុសប្រើប្រាស់បណ្តាញសង្គមដើម្បីបញ្ចេញមតិ ក្រោយសិទ្ធិមួយចំនួនត្រូវបានរឹតបន្តឹងទៅហើយនោះ។
អ្នកស្រី ចក់ សុភាព ប្រាប់ថា៖ «ទោះបីមិនទាន់មានច្បាប់ហើយក៏ដោយ ក៏អាជ្ញាធរបានធ្វើចំណាត់ការច្រើនទៅលើអ្នកប្រើប្រាស់បណ្តាញសង្គមហើយ។ អ៊ីចឹង បើមានច្បាប់ថែមទៀត នោះគ្រាន់តែការបន្ថែមទម្ងន់ក្នុងការធ្វើឱ្យអាជ្ញាធរទប់ស្កាត់និងចោទប្រកាន់បន្ថែមទៅលើអ្នកប្រើប្រាស់បណ្តាញសង្គម»។
នាយកវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន មើលឃើញថា បញ្ហាដែលបានកើតឡើង អាចជាអាវុធមុខពីរ ដែលថា ទី១ ឧក្រិដ្ឋជនអ៊ិនធឺណិតនៅប្រទេសណាក៏មានដែរ តែបើចំណាត់ការរបស់រដ្ឋាភិបាលមានភាពស្មោះត្រង់ នោះចំណាត់ការនឹងធានាដល់ការពង្រឹងសន្តិសុខជាតិ។
ប៉ុន្តែលោកថា បើចំណាត់ការ រួមទាំងការធ្វើច្បាប់បង្កប់នូវចេតនានយោបាយ មិនឈរលើគន្លងប្រជាធិបតេយ្យ វានឹងបង្កើតជាហានិភ័យដល់សេរីភាពបញ្ចេញមតិនិងដំណើរការប្រជាធិបតេយ្យនៅកម្ពុជា។
លោក ប៉ា ចន្ទរឿន ប្រាប់ថា៖ «ប៉ុន្តែបើប្រើប្រាស់ច្រកតែមួយហើយ ហើយស្ថានភាពនយោបាយយើងវាមិនសូវល្អ ការរំលោភសិទ្ធិមនុស្សនិងដំណើរការប្រជាធិបតេយ្យនៅក្នុងស្ថានភាពធ្ងន់ធ្ងរ អាហ្នឹងវាប៉ះពាល់ទៅដល់សេរីភាពនៃការប្រើប្រាស់អ៊ិនធឺណិតផងដែរ»។
របាយការណ៍របស់និយតករទូរគមនាគមន៍កម្ពុជា បង្ហាញថា គិតត្រឹមខែសីហា ឬត្រឹម៨ខែឆ្នាំ២០២០ អ្នកប្រើប្រាស់អ៊ីនធឺណិតតាមទូរសព្ទចល័តមានចំនួនជាង១៥លាននាក់ ឬស្មើនឹងជាង៩០ភាគរយនៃប្រជាជនកម្ពុជា៕