រដ្ឋាភិបាលបានសម្រេចបន្ធូរបន្ថយអត្រាពន្ធគយលើមុខទំនិញនាំចូលមួយចំនួន ក្នុងនោះមុខទំនិញខ្លះត្រូវបានបន្ថយរហូតដល់សូន្យភាគរយ ខណៈដែលកម្ពុជារំពឹងលើកិច្ចព្រមព្រៀងពាណិជ្ជកម្មសេរីកម្ពុជា-ចិនដែលជិតចូលជាធរមាននៅដើមឆ្នាំ២០២១។
ការសម្រេចរបស់រដ្ឋាភិបាលនេះ ធ្វើឡើងតាមអនុក្រឹត្យស្តីពី «ការកែសម្រួលអត្រាពន្ធគយ និងអត្រាអាករពិសេសលើមុខទំនិញមួយចំនួន» ចុះថ្ងៃទី១៦ ខែធ្នូ ឆ្នាំ២០២០នេះ។
តាមអនុក្រឹត្យ ទំនិញនាំចូលដែលរដ្ឋាភិបាលបន្ថយពន្ធរហូតសូន្យភាគរយនោះ រួមមាន ឧបករណ៍និងគ្រឿងម៉ាស៊ីនកែច្នៃបម្រើដល់សង្វាក់ផលិតកម្ម បញ្ចុះពី១៥ភាគរយដល់សូន្យភាគរយ, ប្រេងរំអិលប្រើប្រាស់ក្នុងវិស័យវាយនភណ្ឌ ម៉ាស៊ីនលាងចាន និងទោចក្រយានពី១០ភាគរយមកសូន្យភាគរយ, វត្ថុធាតុដើមសម្រាប់ផលិតកម្មចំណីអាហា ភេសជ្ជៈ និងប្រព័ន្ធសូឡា ពី៧ភាគរយមកសូន្យភាគរយ។
អនុក្រឹត្យដដែលក៏បានបន្ថយពន្ធទៅលើវត្ថុធាតុដើម ដូចជា ម៉ាស៊ីនកែច្នៃសំខាន់ៗសម្រាប់បម្រើការឱ្យសង្វាក់ផលិតកម្មនានា ពី១៥ភាគរយមក៧ភាគរយ សម្ភារអគ្គិសនីពី១០ភាគរយមក៥ភាគរយ ខណៈវត្ថុធាតុដើមនិងម៉ាស៊ីនកែច្នៃសំខាន់ៗបម្រើការឱ្យសង្វាក់ផលិតកម្មនានា ក៏បានបញ្ចុះផងដែរ ពី១៥ភាគរយមក៧ភាគរយ រួមនឹងមុខទំនិញមួយចំនួនទៀត។ តែយ៉ាងណា អនុក្រឹត្យរបស់រដ្ឋាភិបាល មិនបានបញ្ជាក់ពីមូលហេតុនៃការបន្ធូរបន្ថយពន្ធលើមុខទំនិញទាំងនេះទេ។
ប្រធានក្រុមអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មិនអាចសុំការអត្ថាធិប្បាយបានទេនៅថ្ងៃនេះ។
ចំណែកអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ប្រាប់ VOD តាមបណ្តាញសង្គមតេឡេក្រាមថា៖ «ការបញ្ចុះអត្រា [ពន្ធ] ទាំងនេះ គឺជាការអនុវត្តតាមគោលនយោបាយរបស់រាជរដ្ឋាភិបាលកម្ពុជា ក្នុងការលើកស្ទួយវិស័យសហគ្រាសធុនតូចនិងមធ្យម [SMEs]។ បន្ទាត់ពន្ធទាំងនេះសុទ្ធសឹងជាធាតុចូល [វត្ថុធាតុដើម និងគ្រឿងម៉ាស៊ីន] សម្រាប់បម្រើឱ្យ SMEs [Small and medium-sized enterprises] ពាណិជ្ជកម្ម ជាមួយចិន»។
ចំណែកអ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ថា ការប្រកាសកាត់ពន្ធលើមុខទំនិញមួយចំនួនរបស់រដ្ឋាភិបាលកម្ពុជាកាលពីថ្ងៃម្សិលមិញនេះ មិនសំដៅសម្រាប់តែកិច្ចព្រមព្រៀងពាណិជ្ជកម្មសេរីរវាងកម្ពុជា-ចិននោះទេ គឺសម្រាប់គ្រប់ប្រភពនាំចូលទាំងអស់។
លោកបន្តថា កិច្ចព្រមព្រៀងពាណិជ្ជកម្មសេរីកម្ពុជា-ចិន ដែលបានចុះហត្ថលេខាដោយរដ្ឋមន្ត្រីក្រសួងពាណិជ្ជកម្មនៃប្រទេសទាំងពីរ កាលពីថ្ងៃទី១២ ខែតុលា ឆ្នាំ២០២០ នឹងចូលជាធរមានក្នុងរយៈពេល៣០ថ្ងៃ បន្ទាប់ពីកាលបរិច្ឆេទដែលភាគីទាំងពីរបានផ្លាស់ប្តូរសេចក្តីជូនដំណឹង អំពីការបញ្ចប់នីតិវិធីផ្ទៃក្នុងរបស់ខ្លួន រួមមាន ការទទួលបានការអនុម័តពីសភាជាតិ និងការឡាយព្រះហត្តលេខាផ្តល់សច្ចាប័នពីអង្គព្រះមហាក្សត្រ ឬអាចចូលជាធរមាននៅកាលបរិច្ឆេទផ្សេងពីនេះ តាមការឯកភាពគ្នារវាងភាគីទាំងពីរ។
លោកបានគូសបញ្ជាក់ថា៖ «សព្វថ្ងៃ ក្រុមការងារភាគីកម្ពុជាកំពុងបំពេញការងាររបស់ខ្លួន ដើម្បីបញ្ចប់នីតិវិធីផ្ទៃក្នុង ឈានទៅផ្លាស់ប្តូរសេចក្តីជូនដំណឹងជាមួយភាគីចិន»។
បើតាមមន្ត្រីក្រសួងពាណិជ្ជកម្ម ធ្លាប់ប្រាប់អ្នកសារព័ត៌មានក្នុងវេទិកានៅរាជបណ្ឌិត្យសភានាពេលថ្មីៗនេះថា នៅពេលកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន (FTA) ចូលជាធរមាននៅដើមឆ្នាំ២០២១ នឹងជួយឱ្យទំនិញកម្ពុជាជាង៣៤០មុខ អាចនាំចេញទៅប្រទេសចិន។
ចំណែកកម្ពុជាទទួលបានទីផ្សារចិនសម្រាប់ទំនិញរបស់ខ្លួនប្រមាណ៩៨ភាគរយនៃមុខទំនិញសរុប ខណៈកម្ពុជាបានបើកទីផ្សារឱ្យភាគីចិន៩០ភាគរយនៃបន្ទាត់ពន្ធគយសរុប។
បើយោងតាមរបាយការណ៍ពីស្ថានទូតចិនប្រចាំនៅកម្ពុជា ទំហំពាណិជ្ជកម្មទ្វេភាគីរវាងប្រទេសកម្ពុជានិងចិន មានទឹកប្រាក់ប្រមាណ៩,៤២ពាន់លានដុល្លារ កាលពីឆ្នាំ២០១៩ កើនឡើង២៧,២៩ភាគរយ បើធៀបនឹងឆ្នាំ២០១៨ ដែលមានទឹកប្រាក់ប្រមាណ៧,៤ពាន់លានដុល្លារ៕
