គណៈកម្មការវត្តចាក់អង្រែក្រោម ស្នើទៅអាជ្ញាធរឱ្យក្រុមហ៊ុនបូមខ្សាច់បង្វែរបណ្តាញទុយោបូមខ្សាច់ក្រោមដីចេញពីវត្ត ដើម្បីបញ្ចៀសបញ្ហាជាយថាហេតុនាពេលខាងមុខទៀត ដែលសំណើនេះធ្វើឡើងបន្ទាប់ពីកើតបញ្ហាផ្ទុះទុយោបូមខ្សាច់ប៉ះពាល់ដល់សាលាឆាន់។
កាលពីវេលាម៉ោង១០ព្រឹកថ្ងៃអង្គារ ទុយោបូមខ្សាច់មួយខ្សែក្នុងចំណោម៦ខ្សែដែលមានមុខកាត់ប្រវែង៣០សង់ទីម៉ែត្រ បានផ្ទុះឡើងធ្វើឱ្យរបើកផ្ទៃបេតុងជាប់សាលាឆាន់ក្នុងវត្តចាក់អង្រែក្រោម ធ្វើឱ្យដីខ្សាច់និងទឹកបាញ់ចេញមកចូលក្នុងនិងក្រៅបរិវេណសាលាឆាន់។
ប្រធានគណៈកម្មការវត្ត លោក ហោ យៀវ ប្រាប់វីអូឌីនៅថ្ងៃម្សិលមិញថា ទុយោបូមខ្សាច់នោះ ផ្ទុះបែកដោយសារបរិមាណខ្សាច់ក្នុងទុយោបុកខ្លាំងពេក និងនាំឱ្យរបើកបេតុងនៅក្បែរសាលាឆាន់ ហើយបាចសាចខ្សាច់លាយទឹកក្នុងសាលានិងហៀរចេញក្រៅ។ លោកថា បញ្ហានេះកើតឡើងបន្ទាប់ពីក្រុមហ៊ុនបើកដំណើរការបូមខ្សាច់ឡើងវិញក្នុងសប្តាហ៍នេះ បន្ទាប់ពីផ្អាកសកម្មភាពជិតមួយឆ្នាំ។
តាមប្រភពដដែល មុនគណៈកម្មការវត្តអនុញ្ញាតឱ្យក្រុមហ៊ុនបង្កប់បណ្តាញទុយោក្រោមដីឆ្លងកាត់បរិវេណវត្តកាលពីជិត២ឆ្នាំមុន គឺមានក្រុមហ៊ុន៤បានមកសុំជាហូរហែរ ប៉ុន្តែខាងគណៈគ្រប់គ្រងវត្តបដិសេធ ដោយសារបារម្ភពីផលប៉ះពាល់ទៅថ្ងៃក្រោយ។
លោក ហោ យៀវ ប្រាប់ថា៖ «យើងមិនអនុញ្ញាតឱ្យទេ យើងខ្លាចមានបញ្ហាប៉ះពាល់។ ដោយឡែក ក្រុមហ៊ុនចុងក្រោយនេះមានចំណារពីលោកអភិបាលក្រុង លោកស្នើសុំក្នុងគោលបំណងអភិវឌ្ឍទីក្រុងយើងនៅក្នុងបឹងខាងក្រោយ ហើយយើងក៏បានសម្រេចគ្នាប្រជុំគណៈកម្មការជាមួយលោក [សង្ឃ] ហើយអនុញ្ញាតតាមសំណើ តែមានលក្ខខណ្ឌជួសជុល ពេលមានបញ្ហាកើតឡើងអ៊ីចឹង»។
លោកបន្តថា ផលប៉ះពាល់ពីការផ្ទុះទុយោ ខាងក្រុមហ៊ុនជាអ្នកជួសជុលប៉ូវសងតាមលក្ខខណ្ឌក្នុងកិច្ចសន្យាដែលបានព្រមព្រៀងក្រោមការធានាពីសាលាក្រុង ប៉ុន្តែលោកបារម្ភបញ្ហានឹងកើតឡើងនៅពេលខាងមុខទៀត បើបណ្តាញបំពង់បញ្ជូនខ្សាច់មិនបង្វែរទៅបង្ហូរតាមផ្លូវវិញ។
លោក ហោ យៀវ ប្រាប់បន្តថា៖ «ធម្មតា ទុយោវានៅក្នុងដី យើងនៅលើ យើងមើលអត់ឃើញទេ អ៊ីចឹងបារម្ភខ្លាចតែវាផ្ទុះទៀត។ ខ្លាចតែវានេះទៀត ដល់អ៊ីចឹងចង់ប្រាប់ទៅខាងតំណាងក្រុមហ៊ុនឱ្យទំនាក់ទំនងទៅសាលារាជធានីភ្នំពេញ សូមឱ្យគាត់ប្តូរទិសឱ្យចេញពីវិហារ ចេញពីសាលាឆាន់ហ្នឹង ឱ្យវានៅលើផ្លូវវិញ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី លើកឡើងថា លោកពុំទាន់ទទួលបានរបាយការណ៍លម្អិតជុំវិញមូលហេតុនៃការផ្ទុះនេះទេ និងមិនទាន់បានស្គាល់ក្រុមហ៊ុនដែលទទួលបានអាជ្ញាបណ្ណបូមខ្សាច់ពីអភិបាលរាជធានីភ្នំពេញនៅទីនោះនៅឡើយ។
លោក ម៉េត មាសភក្តី និយាយថា៖ «ខ្ញុំអត់ទាន់ទទួលបានព័ត៌មានពេញលេញ ហើយម្សិលមិញនៅឆែកជាមួយនឹងអ្នកកាន់ការងារហ្នឹងនៅឡើយ។ ចាំបានព័ត៌មានហ្នឹង ចាំខ្ញុំជម្រាបជូនអ្នកសារព័ត៌មានតាមក្រោយវិញ»។
អភិបាលរងខណ្ឌមានជ័យ លោក ឌី រ័ត្នខេមរុណ មិនអាចប្រាប់ពីឈ្មោះក្រុមហ៊ុនដែលទទួលខុសត្រូវលើការបូមខ្សាច់ពីសាឡង់នៅទន្លេបាសាក់ ទៅចាក់បំពេញបឹងជើងឯកនោះទេ ដោយលោកថា លោកមិនបានចាំឈ្មោះក្រុមហ៊ុន ហើយលោកក៏មិនដឹងថា ក្រុមហ៊ុននោះបូមខ្សាច់ទៅណាផងដែរ ដោយថា នោះជារឿងឯកជនរបស់ក្រុមហ៊ុន មិនមែនជាសមត្ថកិច្ចរបស់អាជ្ញាធរដែនដី។
យ៉ាងណាលោកលើកឡើងថា បញ្ហាបែកធ្លាយទុយោ គឺដោយសារបណ្តាញទុយោត្រូវបានតច្រើនឆ្នាំ មានសភាពចាស់ងាយធ្លុះធ្លាយ ហើយខាងអាជ្ញាធរបានបញ្ជាទៅក្រុមហ៊ុនឱ្យផ្អាកការបូមបណ្តោះអាសន្ន និងណែនាំឱ្យពួកគេពិនិត្យលទ្ធភាពបង្វែរខ្សែបណ្តាញចេញពីវត្ត និងរៀបចំកែសម្រួលប្រព័ន្ធវាឡើងវិញ ចៀសវាងបង្កបញ្ហាជាថ្មី។
លោក ឌី រ័ត្នខេមរុណ៖ «ឥលូវនេះ យើងកំពុងរៀបចំឱ្យគាត់បង្វែរទិសដៅ និងរៀបចំលក្ខណៈប្រព័ន្ធបច្ចេកទេសឱ្យបានត្រឹមត្រូវ ហើយនិងគុណភាពខ្ពស់ជាងមុន។ និយាយរួម មិនឱ្យមានលើកទី២ទេ ហើយបើមានជាលើកទី២ យើងនឹងបិទជាស្ថាពរតែម្តង»។
អាជ្ញាធរខណ្ឌរូបនេះបានប្រាប់ថា លោកមិនដឹងពីអាជីវកម្មរបស់ក្រុមហ៊ុន ឬប្រភពខ្សាច់ដែលត្រូវបានបូមយកមកដែរ។
បឹងស្ទើរទាំងអស់នៅរាជធានីភ្នំពេញ ត្រូវបានចាក់ដីលុប ដែលភាគច្រើនបើកផ្លូវសម្រាប់គម្រោងអភិវឌ្ឍន៍នានា។ បឹងជើងឯក និងបឹងទំពន់ ស្ថិតនៅផ្នែកខាងត្បូងរាជធានីភ្នំពេញ កំពុងត្រូវបានចាក់លុបសម្រាប់គម្រោងអភិវឌ្ឍន៍ទីក្រុងរណបដ៏ធំរបស់ក្រុមហ៊ុន ING។
សមាគមធាងត្នោត បាននិយាយក្នុងរបាយការណ៍របស់ខ្លួនថា អភិវឌ្ឍន៍ទីក្រុង បឹងនានាមាន«សារៈសំខាន់» សម្រាប់ការចម្រោះទឹកកខ្វក់ និងការពារទឹកជំនន់៕