គណបក្សប្រជាធិបតេយ្យមូលដ្ឋាន (គបម) គាំទ្ររដ្ឋាភិបាលដែលសម្រេចឱ្យសិស្សដែលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) និងមធ្យមសិក្សាបឋមភូមិ ជាប់ជាស្ថាពរ ប៉ុន្តែគណបក្សនេះស្នើដល់ក្រសួងអប់រំ គួរកំណត់និទ្ទេសដល់សិស្សដើម្បីធានាគុណភាពអប់រំ។
គណបក្សប្រជាធិបតេយ្យមូលដ្ឋាន បានចេញសេចក្តីថ្លែងការណ៍មួយនៅថ្ងៃព្រហស្បតិ៍នេះ ដោយលើកឡើថា ក្រសួងអប់រំ នៅថ្ងៃទី១៦ ខែធ្នូ បានសម្រេចឱ្យសិស្សដែលត្រូវប្រឡងសញ្ញាបត្រមធ្យមសិក្សាទុតិយភូមិ និងមធ្យមសិក្សាបឋមភូមិ ក្នុងឆ្នាំសិក្សា២០១៩-២០២០នេះ ជាប់ជាស្ថាពរ ដោយគ្មានការកំណត់និទ្ទេស។
ករណីនេះ គណបក្ស គបម បានបង្ហាញការគាំទ្រចំពោះការសម្រេចនេះ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ដែលកំពុងបង្កហានិភ័យដល់ពិភពលោកនិងប្រទេសកម្ពុជា។
ប៉ុន្តែគណបក្សនេះយល់ឃើញថា ក្រសួងអប់រំ គប្បីយកលទ្ធផលនៃការប្រឡងឆមាសទី១និងឆមាសទី២ មកគិតនិទ្ទេសដែលជាករណីពិសេសបំផុត ដើម្បីជំរុញនិងលើកទឹកចិត្តដល់សិស្សក្នុងការខិតខំរៀនសូត្រ និងធានាគុណភាពនៃការអប់រំដែលក្រសួងបានព្យាយាមកែទម្រង់កន្លងមក។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍ថា ក្រសួងអប់រំ បានកំណត់ឱ្យ “ជាប់ជាស្ថាពរ” ចំពោះបេក្ខជនទាំងអស់ (រួមទាំងបេក្ខជនស្វៃរិន បំពេញវិជ្ជា និងស្វៃរិនបំពេញវិជ្ជា) ដែលបានចុះឈ្មោះប្រឡង ឆ្នាំសិក្សា២០១៩-២០២០ ដោយគ្មានការកំណត់និទ្ទេស។ លោកបន្តថា ក្រសួងក៏នឹងជម្រាបជូនដំណឹងបន្ថែមស្តីពីទិដ្ឋភាពពាក់ព័ន្ធក្នុងពេលឆាប់ៗនេះ។
បើតាមក្រសួងអប់រំ បេក្ខជនដែលបានដាក់ពាក្យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២០នេះ មានចំនួនជាង១២១ ១០៨នាក់។ ចំណែក បេក្ខជនដែលបានចូលរួមការប្រឡងមធ្យមសិក្សាបឋមភូមិ កាលពីថ្ងៃទី៣០ ខែវិច្ឆិកា ឆ្នាំ២០២០ មានចំនួន១៥៨ ៧១៧នាក់៕
