ក្រសួងសុខាភិបាលប្រកាសថា អ្នកជំងឺកូវីដ១៩ដែលឆ្លងក្នុងសហគមន៍ចំនួន៥នាក់ទៀតបានជាសះស្បើយពីជំងឺ និងមានមានករណីឆ្លងថ្មី។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី១៧ ខែធ្នូ ឆ្នាំ២០២០ ឱ្យដឹងថា អ្នកជំងឺកូវីដ១៩ ដែលជាសះស្បើយនោះ រួមមាន ស្រ្តីជាភរិយាអនុប្រធាននាយកដ្ឋានពន្ធនាគារនៃក្រសួងមហាផ្ទៃ, ស្ត្រីនិងកូនអាយុ៧ខែ ជាប្អូនស្រីរបស់អ្នកបើកបរឱ្យអគ្គនាយកពន្ធនាគារ, បុគ្គលិកធនាគារចិន និងបុគ្គលិកហាង Pedro ផ្លូវព្រះសីហនុ។
ក្រសួងបន្តថា មិនមានករណីវិជ្ជមានវីរុសកូវីដ១៩ថ្មី នៅថ្ងៃទី១៦ ខែធ្នូ ឆ្នាំ២០២០។
ក្រសួងបន្តទៀតថា អ្នកជំងឺកូវីដដែលបានរកឃើញពាក់ព័ន្ធនឹងព្រឹត្តិការណ៍ឆ្លងក្នុងសហគមន៍២៨វិច្ឆិកា គិតមកដល់ថ្ងៃទី១៦ ខែធ្នូ ឆ្នាំ២០២០ សរុបមានចំនួន៤១នាក់ ក្នុងនោះបានព្យាបាលជាសះស្បើយចំនួន១៣នាក់។
ជាមួយគ្នានេះដែរ ក្រសួងសុខាភិបាលក៏បានក្រើនរំឭកជាថ្មីដល់ប្រជាពលរដ្ឋដែលធ្លាប់បានទៅអង្គុយពិសាកាហ្វេនៅហាងឈ្មោះ Hidden Coffee ដែលមានទីតាំងនៅហាងលេខ១២៥ ផ្លូវ២០២០ សង្កាត់ទឹកថ្លា ខណ្ឌសែនសុខ នៅថ្ងៃទី៤ ខែធ្នូ ឆ្នាំ២០២០ ទៅធ្វើតេស្តនៅវិទ្យាស្ថានជាតិសុខភាពសាធារណៈ និងត្រូវធ្វើចត្តាឡីស័កនៅតាមផ្ទះរបស់ខ្លួនឱ្យបានចំនួន១៤ថ្ងៃ ព្រមទាំងត្រូវតាមដានសុខភាពផ្ទាល់ខ្លួនឱ្យបានហ្មត់ចត់។
បើតាមក្រសួង គិតមកដល់ម៉ោង៧ព្រឹក ថ្ងៃទី១៧ ខែធ្នូ ឆ្នាំ២០២០ កម្ពុជារកឃើញអ្នកឆ្លងជំងឺកូវីដ១៩ សរុបចំនួន៣៦២នាក់ ក្នុងនោះព្យាបាលជាសះស្បើយចំនួន៣២៤នាក់ និងកំពុងសម្រាកព្យាបាលចំនួន៣៨នាក់៕