របាយការណ៍នៃបទល្មើសគ្រឿងញៀននៅតែកើនឡើង បើទោះបីជាក្នុងស្ថានភាពមេរោគកូវីដ១៩ មានការរឹតបន្តឹងការធ្វើដំណើរតាមព្រំដែន និងពេលខ្លះរឹតបន្តឹងការធ្វើដំណើរនៅក្នុងប្រទេសផងដែរ។
អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ ថ្លែងថា គិតត្រឹមខែវិច្ឆិកា ឆ្នាំ២០២០ អ្នកជាប់ពាក់ព័ន្ធគ្រឿងញៀនដែលត្រូវចាប់ឃាត់ខ្លួនកើនឡើងដល់ជិត២ម៉ឺនាក់ (១៩ ៣៩៤) គឺកើនឡើងប្រហែល២០ភាគរយ បើធៀបនឹងឆ្នាំមុនក្នុងរយៈពេលដូចគ្នា។ លោកថា ការកើនឡើងនេះមកពីតម្រូវការប្រើប្រាស់របស់យុវជនមានការកើនឡើង។
លោក មាស វីរិទ្ធ បញ្ជាក់ថា ការទប់ស្កាត់គ្រឿងញៀនឱ្យមានប្រសិទ្ធភាពត្រូវមានការចូលរួមពីគ្រប់ភាគីពាក់ព័ន្ធ។
លោក មាស វីរិទ្ធ មានប្រសាសន៍ថា៖ «ការប្រយុទ្ធប្រឆាំងគ្រឿងញៀន វាទាមទារឱ្យមានការចូលរួមពីគ្រប់ភាគីនិងតួអង្គដែលមានការពាក់ព័ន្ធ ពិសេសត្រូវផ្តើមចេញពីអ្នកប្រើប្រាស់ និងមុខសញ្ញាដែលងាយរងគ្រោះហើយងាយធ្លាក់ខ្លួនទៅក្នុងការអូសទាញរបស់ក្រុមជួញដូរគ្រឿងញៀន»។
នៅតាមប្រព័ន្ធផ្សព្វផ្សាយនានា ពិសេសទំព័រហ្វេសប៊ុករបស់នគរបាលជាតិ បានផ្សព្វផ្សាយរាល់ថ្ងៃនូវករណីគ្រឿងញៀន រួមទាំងអ្នកប្រើប្រាស់និងអ្នកជួញដូរ។
អ្នកប្រើប្រាស់ពេលខ្លះក៏មានទាំងកុមារផងដែរ មានទាំងការថតរូបបង្ហាញនៅកន្លែងប្រើប្រាស់ ថតរូបនៅការិយាល័យរបស់សមត្ថកិច្ច ជាដើម។ ចំណែកអ្នកជួញដូរមានគ្រាប់ថ្នាំញៀន២ទៅ៣កញ្ចប់តូចនៅជាប់ខ្លួន ក៏មានការចាប់ខ្លួនបានបន្តបន្ទាប់ដែរ។
ចំពោះករណីជួញដូរគ្រឿងញៀនរាប់សិបទៅរាប់រយគីឡូក្រាម ទាំងនៅក្នុងប្រទេសនិងការនាំចូល រួមមានទាំងជនជាតិខ្មែរនិងជនបរទេស ក៏ត្រូវបានសមត្ថកិច្ចចាប់ខ្លួនបានជាបន្តបន្ទាប់ដែរ។
បើតាមលោក ស ខេង រដ្ឋមន្ត្រីក្រសួងមហាផ្ទៃ អ្នកប្រើប្រាស់ភាគច្រើនអាយុពី១៥ទៅ៤០ឆ្នាំ ហើយផ្ទះខ្លះមានអ្នកប្រើប្រាស់៣ទៅ៤នាក់។ ចំណែកអ្នកដែលសមត្ថកិច្ចចាប់ខ្លួន៣ទៅ៤ដងហើយនូវករណីគ្រឿងញៀន នៅពេលលែងមកវិញ ក៏នៅបន្តសកម្មភាពដូចមុនដដែល។
ឪពុកម្តាយមួយចំនួន ទន្ទឹមនឹងកូនមិនបានធ្វើការ បំផ្លាញទ្រព្យសម្បត្តិ ហើយអ្នកខ្លះត្រូវចំណាយលុយសម្រាប់ឱ្យសមត្ថកិច្ចចាប់កូនខ្លួនទៅមណ្ឌលបន្សាបគ្រឿងញៀនដែលត្រូវចំណាយលុយរាល់ខែទៀតផង។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងក្នុងកិច្ចប្រជុំថ្នាក់រដ្ឋមន្ត្រីអាស៊ាន កាលពីថ្ងៃទី២៦ ខែវិច្ឆិកា ឆ្នាំ២០២០ ថាគ្រឿងញៀននៅតែជាបញ្ហាក្កៅគគុក បង្កផលប៉ះពាល់ដល់សន្តិសុខសង្គមនិងជីវភាពប្រជាពលរដ្ឋ។ លោកក៏បានអំពាវនាវដល់ប្រទេសនៅក្នុងតំបន់ សហការគ្នាទប់ស្កាត់ការចរាចរគ្រឿងញៀនឱ្យមានប្រសិទ្ធភាព។
ប្រធានវិទ្យាស្ថានប្រជាធិបតេយ្យកម្ពុជា និងអ្នកស្រាវជ្រាវបញ្ហាសង្គម លោក ប៉ា ចន្ទរឿន លើកឡើងថា បញ្ហាគ្រឿងញៀនមិនមែនការនាំចូលឬការផលិតទៅតាមតម្រូវការអ្នកទិញដូចជាតម្រូវការផលិតផលផ្សេងនោះទេ។ លោកបន្តថា បើសិនជាអាជ្ញាធរពង្រឹងសមត្ថភាពទប់ស្កាត់មិនឱ្យមានការនាំចូលឬចរាចរណ៍លក់ នោះនឹងមិនមានអ្នកប្រើប្រាស់នោះទេ។
លោក ប៉ា ចន្ទរឿន៖ «បើសិនជាមានព័ត៌មានបង្ហាញថា មានចរាចរណ៍ហ្នឹងកើនឡើង មានន័យថា វិធានការទប់ស្កាត់ប្រយុទ្ធប្រឆាំងគ្រឿងញៀនកាន់តែមិនមានប្រសិទ្ធភាព។ រឿងគ្រឿងញៀននេះ មិនមែនជាការចរាចរទំនិញធម្មតា មាន Demand និង Supply Size អីទេ ទាល់តែមានតម្រូវការខ្លាំង បានមានការផ្គត់ផ្គង់។ អ៊ីចឹងទេ! អានេះជាការចរាចរសារធាតុខុសច្បាប់នៅក្នុងសង្គម»។
បើទោះជាថ្នាក់ដឹកនាំរដ្ឋាភិបាលអះអាងថា កម្ពុជាជាប្រទេសរងគ្រោះពីការជួញដូរគ្រឿងញៀនឬជាប្រទេសដែលនាំចូលគ្រឿងញៀនពីក្រៅប្រទេសក៏ដោយ ក៏មានករណីខ្លះ សមត្ថកិច្ចចាប់ម៉ាស៊ីនកែច្នៃឬផលិតគ្រឿងញៀននៅក្នុងប្រទេសដែរ។
ការដោះស្រាយបញ្ហាគ្រឿងញៀន អ្នកខ្លះលើកឡើងថា ឱ្យតែទប់ស្កាត់ការនាំចូលតាមព្រំដែនបាននោះនឹងមានប្រសិទ្ធភាពហើយ អ្នកខ្លះទៀតថា ត្រូវចាត់វិធានការលើឈ្មួញគ្រឿងញៀនធំដែលមានអ្នកមានអំណាចចាំជួយការពារជាខ្នងបង្អែក ឬ ខ្លះទៀតថា ត្រូវកម្ចាត់អំពើពុករលួយ ព្រោះអ្នកជួញដូរគ្រឿងញៀន មានលុយច្រើន តែងតែសូកប៉ាន់អ្នកពាក់ព័ន្ធដើម្បីខ្លួនគេនិងមុខរបរគេមានសុវត្ថិភាព។
ចំពោះសមត្ថភាពរបស់រដ្ឋាភិបាលក្នុងការទប់ស្កាត់គ្រឿងញៀននេះ មានទាំងមន្ត្រីជំនាញតាមផ្នែក និងថែមទាំងមានកម្មវិធីភូមិឃុំមានសុវត្ថិភាពដែលក្នុងចំណោម៩ចំណុច ក៏មានការលើកឡើងពីការទប់ស្កាត់ការប្រើប្រាស់និងជួញដូរគ្រឿងញៀនផងដែរ។
ចំពោះលោកនាយករដ្ឋមន្ត្រី ហ៊ុន សែន ដែលលោកតែងតែអះអាងពីសមត្ថភាពក្នុងពន្លត់ភ្លើងសង្គ្រាមនាំប្រទេសឱ្យមានសន្តិភាពនោះ លោកក៏តែងតែលើកឡើងពីសមត្ថភាពរបស់លោកក្នុងការគ្រប់គ្រងសន្តិសុខសណ្តាប់ធ្នាប់ មិនឱ្យកើតមានហិង្សាឬចលាចលក្នុងសង្គមដែរ។
លោកនាយករដ្ឋមន្ត្រីក៏បានអះអាងថា លោកមានសមត្ថភាព មានក្រុមការងារច្រើនក្នុងការតាមដានការងារផ្សេងៗ សូម្បីតែរឿងស្នេហាឯកជនឬរឿងរ៉ាវផ្ទែក្នុងរបស់គណបក្សប្រឆាំង ក៏លោកនាយករដ្ឋមន្ត្រីបានដឹងឬទទួលបានសំឡេងដែលគេចរចានោះជាហូហែដែរ។
នៅក្នុងជំនួបសំណេះសំណាលជាមួយមេធាវីរដ្ឋាភិបាល និងមេធាវីស្ម័គ្រចិត្ត នៅវិមានសន្តិភាព កាលពីថ្ងៃទី២៥ ខែវិច្ឆិកា លោកនាយករដ្ឋមន្ត្រី ហ៊ុន សែន បានថ្លែងជាសាធារណៈថា បណ្តុំមនុស្សដែលមានចំនួនចាប់ពី៥នាក់ឡើងទៅ គឺអាចមានគ្នារបស់លោកក្នុងនោះហើយ។
លោកនាយករដ្ឋមន្ត្រី ហ៊ុន សែន បន្តថា លោក ហូរ វ៉ាន់ អតីតមន្ត្រីបក្សប្រឆាំង បានផ្ញើសារជាសំឡេងតាមបណ្តាញសង្គម (Group Chat) ពីសហរដ្ឋអាមេរិក ទៅកាន់ក្រុមអ្នកតវ៉ានៅកម្ពុជា អំពីផែនការធ្វើបាតុកម្មនៅមុខស្ថានទូតចិន ក៏លោកដឹង ព្រោះមានមនុស្សលោកនៅក្នុងនោះដែរ។
លោកនាយករដ្ឋមន្ត្រី ហ៊ុន សែន បានថ្លែងដូច្នេះថា៖ «ខ្ញុំសូមផ្តាំទៅវិញ នៅក្នុងគ្រុបហ្វេសប៊ុក ហើយនៅក្នុងគ្រុបហ្វេសប៊ុក មានមនុស្សរបស់យើងនៅក្នុងហ្នឹង អ៊ីចឹងវាមានរឿងអីដែលជាអាថ៌កំបាំង បញ្ជាមកតាមគ្រុបហ្វេសប៊ុក មនុស្សឱ្យតែចាប់ពី៥នាក់ឡើងទៅ វាមានមនុស្ស ហ៊ុន សែន នៅក្នុងនោះហើយ កុំឆ្ងល់ពេក។ អ៊ីចឹងវាមានអីជាអាថ៌កំបាំង ព្រោះអ្នកនៅក្នុងក្រុមហ្នុង មានរាប់សិបនាក់ឯណោះ ហើយអ្នកហ្នុង គេបញ្ចេញមកឱ្យយើង។ អ្នកឯងចងក្រុមទៀតទៅ ហើយគេចូលមើលតាមជាមួយអ៊ីចឹង ក្រុមតេឡេក្រាម ក្រុមស៊ូម [Zoom] ក្រុមហ្វេសប៊ុក អាហ្នឹងមានទាស់អី»។
បើលោកនាយករដ្ឋមន្ត្រីមានក្រុមការងារច្រើនបែបនេះមែន ហើយយកជំនាញនេះទៅប្រើដើម្បីទប់ស្កាត់គ្រឿងញៀននោះ កាន់តែមានប្រសិទ្ធភាពហើយ។
អង្គការសហប្រជាជាតិលើកឡើងក្នុងរបាយការណ៍មួយកាលពីខែឧសភា ឆ្នាំ២០២០ ថាកម្ពុជាឋិតក្នុងចំណោមប្រទេសអាស៊ានចំនួន៤ ដែលរកឃើញករណីជួញដូរថ្នាំញៀនខុសច្បាប់ច្រើនជាងគេបំផុតក្នុងតំបន់ ខណៈតម្លៃធ្លាក់ចុះកាន់តែទាប តែគុណភាពថ្នាំកាន់តែខ្ពស់៕
