រាជរដ្ឋាភិបាលកម្ពុជា បង្ហាញការប្តេជ្ញាក្នុងការធ្វើការងារជាមួយរដ្ឋបាលដែលដឹកនាំដោយប្រធានាធិបតីថ្មីរបស់សហរដ្ឋអាមេរិក ដើម្បីពង្រឹងទំនាក់ទំនងទ្វេភាគីឱ្យកាន់តែល្អប្រសើរ។
ក្នុងលិខិតរបស់លោកនាយករដ្ឋមន្ត្រី ហ៊ុន សែន ផ្ញើជូនលោក ចូសែប រ៉ូប៊ីនណែត បៃដិន ជេ អរ (Joseph Robinette Biden Jr.) ប្រធានាធិបតីជាប់ឆ្នោតនៃសហរដ្ឋអាមេរិក ដែលត្រូវបានផ្សព្វផ្សាយជាសាធារណៈកាលពីថ្ងៃម្សិលមិញ បានលើកឡើងថា កម្ពុជាសាទរចំពោះលោក ចូ បៃដិន ដែលបានជាប់ឆ្នោតជាប្រធានាធិបតីសហរដ្ឋអាមេរិក ទី៤៦។
លិខិតដដែល លោកនាយករដ្ឋមន្ត្រី ហ៊ុន សែន ក៏បានជឿជាក់ដែរថា ក្រោមការដឹកនាំរបស់លោក បៃដិន សហរដ្ឋអាមេរិកនឹងបន្តរីកចម្រើនទៅមុខ ព្រមទាំងនាំពិភពលោកមានស្ថិរភាពនិងវិបុលភាពកាន់តែល្អប្រសើរថែមទៀត។
លោកនាយករដ្ឋមន្ត្រី ហ៊ុន សែន បានគូសបញ្ជាក់បន្ថែមក្នុងលិខិតថា៖ «រាជរដ្ឋាភិបាលរបស់ខ្ញុំ បានប្តេជ្ញាចិត្តយ៉ាងពេញលេញ ក្នុងការធ្វើការងារជាមួយរដ្ឋបាលរបស់ឯកឧត្តម ដើម្បីជំរុញទំនាក់ទំនងទ្វេភាគីឱ្យកាន់តែល្អប្រសើរបន្ថែមទៀត»។
បើតាមសារព័ត៌មាន CNA អង្គបោះឆ្នោតនៅសហរដ្ឋអាមេរិក កាលពីថ្ងៃទី១៤ ខែធ្នូ ឆ្នាំ២០២០ បានបោះឆ្នោតទទួលស្គាល់ជាផ្លូវការហើយលើជ័យជម្នះរបស់លោក ចូ បៃដិន ដើម្បីឱ្យលោកក្លាយជាប្រធានាធិបតីថ្មីរបស់សហរដ្ឋអាមេរិក។
ប្រភពដដែលបន្តថា លទ្ធផលបោះឆ្នោតនៃអង្គបោះឆ្នោត នឹងត្រូវរង់ចាំការប្រកាសនិងទទួលស្គាល់ជាផ្លូវការពីសំណាក់សភាទាំង២ ដែលនឹងត្រូវបើកសម័យប្រជុំនៅថ្ងៃទី០៦ ខែមករា ឆ្នាំ២០២១ ក្រោមការដឹកនាំដោយផ្ទាល់ពីអនុប្រធានាធិបតីអាមេរិក លោក ម៉ៃក៍ ភែន៕
