ក្រសួងសុខាភិបាល ប្រកាសថា អ្នកជំងឺកូវីដ១៩ ចំនួន១៧នាក់ទៀត បានព្យាបាលជាសះស្បើយ ដែលភាគច្រើនជាបុគ្គលិកនិងអ្នកចូលហាង Pedro និង Zendo ខណៈមិនមានករណីឆ្លងថ្មី។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី១៨ ខែធ្នូ ឆ្នាំ២០២០ ឱ្យដឹងថា អ្នកជាសះស្បើយពីជំងឺកូវីដ១៩ ចំនួន១៧នាក់ ក្នុងនោះមានអ្នកឆ្លងក្នុងសហគមន៍១៥នាក់ និងអ្នកធ្វើដំណើរមកពីក្រៅប្រទេស២នាក់ ។
ក្រសួងបន្តថា អ្នកដែលឆ្លងជំងឺកូវីដ១៩ ក្នុងសហគមន៍ចំនួន១៥នាក់ដែលជាសះស្បើយនោះ រួមមាន បុគ្គលិកហាង Pedro (ផ្លូវព្រះសីហនុ) ចំនួន០៦នាក់, អ្នកចូលហាង Pedro និង Zendo ចំនួន០៣នាក់, បុគ្គលិកហាង Carl’s Jr Burger ទួលទំពូង ០១នាក់, បុគ្គលិកហាងលក់កំព្យូទ័រឌីម ផ្លូវព្រះសីហនុ ០១នាក់, កូនស្រីច្បងរបស់អគ្គនាយកពន្ធនាគារ និងសាច់ញាតិរបស់អ្នកបើកបរឱ្យអគ្គនាយកពន្ធនាគារចំនួន០៤នាក់។
ក្រសួងបញ្ជាក់ទៀតថា នៅថ្ងៃទី១៧ ខែធ្នូ ឆ្នាំ២០២០ មិនមានករណីឆ្លងថ្មីនោះទេ។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី១៨ ខែធ្នូ ឆ្នាំ២០២០ កម្ពុជាបានរកឃើញករណីអ្នកឆ្លងជំងឺកូវីដ១៩ សរុបចំនួន៣៦២នាក់ ក្នុងនោះបានព្យាបាលជាសះស្បើយចំនួន៣៤១នាក់ និងអ្នកកំពុងសម្រាកព្យាបាលចំនួន២១នាក់។
ដោយឡែក បើគិតតែចំនួនអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកាវិញ ក្រសួងថា គិតមកដល់ថ្ងៃម្សិលមិញ មានអ្នកជំងឺសរុប៤១នាក់ ក្នុងនោះបានព្យាបាលជាសះស្បើយ២៨នាក់៕