ពលករខ្មែរដែលកំពុងធ្វើការនៅខេត្តសាមុតសាខនបារម្ភពីការប្រឈមនឹងការឆ្លងជំងឺកូវីដ១៩ ខណៈលោកនាយករដ្ឋមន្រ្តី ហ៊ុន សែន នៅថ្ងៃនេះអំពាវនាវឱ្យពលករខ្មែរដែលកំពុងរស់នៅប្រទេសថៃត្រូវជឿជាក់លើរដ្ឋាភិបាលថៃក្នុងការដោះស្រាយបញ្ហានេះ។
កាលពីម្សិលមិញក្រសួងសុខភាពសាធារណៈថៃ បានប្រកាសរកឃើញករណីឆ្លងកូវីដ១៩ក្នុងសហគមន៍ដែលបានផ្ទុះឡើងក្នុងផ្សារបោះដុំបង្គាមួយកន្លែងក្នុងខេត្តសាមុតសាខន ដែលអ្នកឆ្លងនោះភាគច្រើនជាពលករបរទេសដែលជាជនជាតិភូមា។ គិតត្រឹមល្ងាចថ្ងៃអាទិត្យនេះក្រសួងសុខភាពសាធារណៈថៃបានរកឃើញអ្នកឆ្លងកូវីដ១៩ក្នុងសហគមន៍ខេត្តសាមុតសាខនកើនដល់ជិត៦៩៤ករណី។ នេះបើតាមការសែតថៃThe Nation។
ពលករខ្មែរដែលជាកម្មករសំណង់និងជាអ្នករស់នៅក្បែរផែលក់បង្គាក្នុងខេត្តសាមុតសាខនដែលផ្ទុះកូវីដ១៩ លោក សូ សុធី បានលើកឡើងថាលោកបានទទួលព័ត៌មានពីករណីកូវីដ១៩ក្នុងសហគមន៍ដែលលោកកំពុងរស់នៅនេះកាលពីម្សិលមិញតាមរយៈអ្នកបើករថយន្តក្រុងដែលលោកជិះចេញពីធ្វើការ។ លោកបានប្រាប់វីអូឌីថាផ្សារដែលជាផែលក់បង្គារនោះមានចម្ងាយប្រហែលជាង៣០០ម៉ែត្រពីបន្ទប់ជួលដែលលោកនិងពលករខ្មែរប្រមាណជា៥០នាក់ផ្សេងទៀតកំពុងស្នាក់នោះ។
លោកបាននិយាយថា៖«ខ្ញុំបារម្ភ បារម្ភយកតែមែនទែន ព្រោះខ្ញុំនៅជិតផ្សារហ្នឹង»។
ទោះយ៉ាងណាក៏ដោយ លោក សូ សុធី បានប្រាប់ថាក្នុងរយៈពេលចុងក្រោយនេះលោកមិនបានទៅផ្សារលក់បង្គារនោះទេ។ លោក សុធី បាននិយាយថាលោកទើបមកពីផ្សារផ្សេងដើម្បីទិញត្រីសាច់ និងបន្លែសម្រាប់ទុកធ្វើម្ហូបយកទៅធ្វើការនៅព្រឹកស្អែក។
ពលករដែលធ្វើការនៅប្រទេសថៃរយៈពេល៩ឆ្នាំរូបនេះបានប្រាប់ថាលោកសព្វថ្ងៃរស់នៅជាមួយភរិយារបស់លោកដែលជាកម្មករសំណង់ដែរ។ លោកបានលើកឡើងថាអ្វីដែលធ្វើឱ្យលោកកាន់តែបារម្ភពីហានិភ័យក្នុងការឆ្លងនោះគឺដោយសារនៅការដ្ឋានសំណង់ និងកន្លែងរស់នៅរបស់លោកមានពលករបរទេសផ្សេងទៀតរស់នៅនិងធ្វើការ។
ក្រសួងសុខភាពសាធារណៈរបស់ថៃបានប្រកាសបិទខេត្តសាមុតសាខន និងដាក់បម្រាមគោចរចន្លោះពីម៉ោង១០យប់ដល់ម៉ោង៥ភ្លឺ ចាប់ពីថ្ងៃទី១៩ ខែធ្នូ ឆ្នាំ២០២០ ដល់ ថ្ងៃទី៣ ខែមករា ឆ្នាំ២០២១។ ចំណែកជនបរទេសមិនត្រូវបានអនុញ្ញាតិឱ្យចេញពីខេត្តនេះទេក្នុងរយៈពេល១៤ថ្ងៃនេះ។សម្រាប់ជនជាតិថៃអាចចេញទៅខេត្តផ្សេងបានតែត្រូវជូនដំណឹងដល់អាជ្ញាធរខេត្តដែលខ្លួននឹងទៅនោះជាមុនសិន។ ប្រភពដដែលឱ្យដឹងថាកន្លែងលក់ម្ហូបអាហារនិងភេសជ្ជៈអាចបើកបានជាធម្មតា ប៉ុន្តែមិនអនុញ្ញាតឱ្យភ្ញៀវនៅញ៉ាំនោះទេ ដោយតម្រូវឱ្យពួកគេខ្ចប់យកទៅផ្ទះវិញ។ ចំណែកសាលារៀន ទីតាំងលេងកីឡា និងសួនច្បារក្នុងខេត្តនេះត្រូវបិទទាំងអស់។
ទោះជាយ៉ាងណាក៏ដោយពលករខ្មែរដែលជំនាញផ្នែកបូកជញ្ជាំង វ័យ៤២ឆ្នាំរូបនេះ បានបញ្ជាក់ថាលោកនៅតែធ្វើការងារនៅការដ្ឋានសំណង់ជាមួយភរិយារបស់លោកជាធម្មតាដោយត្រូវចេញទៅនៅម៉ោងជាង៥ព្រឹក និងត្រលប់មកវិញនៅម៉ោង៥ល្ងាច។ លោកបានបញ្ជាក់ថាដោយត្រូវចេញទៅធ្វើការមិនអាចចៀសមិនបាន លោកត្រូវបង្កើនការប្រុងប្រយ័ត្នថែមទៀត ដោយលោកត្រូវពាក់ម៉ាស និងបាញ់កាល់អុលជាប្រចាំ។ បន្ថែមលើសលោកក៏ត្រូវគោរពតាមការបទបញ្ជាដោយមិនចេញពីកន្លែងលោករស់នៅនោះទេចាប់ពីម៉ោង១០យប់ដល់៥ព្រឹក។
សម្រាប់លោក សូ សុធី ប្រសិនបើអាជ្ញាធរថៃឱ្យពលករបរទេសធ្វើចត្តាឡីស័ក លោកព្រួយបារម្ភពីប្រាក់បម្រុងទុកសម្រាប់ចាយវាយព្រោះថាលោកមិនសូវមានលុយសន្សំនៅច្រើនទេ ដោយត្រូវផ្ញើមកឱ្យកូនដែលកំពុងរៀននៅស្រុកកំណើតនាប្រទេសកម្ពុជាជារៀងរាល់ខែ។ លោកបានអំពាវឱ្យរដ្ឋាភិបាលកម្ពុជាពិភាក្សាជាមួយរដ្ឋាភិបាលថៃដោយស្នើឱ្យភាគីថៃជួយផ្គត់ផ្គង់ដល់ពលករខ្មែរករណីមានការតម្រូវឱ្យពលករខ្មែរធ្វើចត្តាឡីស័ក។
មន្រ្តីបណ្ដាញលើកកម្ពស់គុណភាពជីវិតពលករ(LPN) លោក ប្រាក់ ភក្រ្តា បានប្រាប់វីអូឌីនៅរសៀលនេះថាលោកក៏មានការព្រួយបារម្ភពីហានិភ័យនៃការឆ្លងកូវីដ១៩ចំពោះពលករខ្មែរដែលកំពុងធ្វើការនៅខេត្តសាមុតសាខន និងបណ្តាខេត្តដែលជាប់នឹងខេត្តនេះផងដែរ។ លោកបានឱ្យដឹងថាការទទួល និងការផ្សព្វផ្សាយព័ត៌មានដល់ពលករខ្មែរទាក់ទងនឹងបញ្ហាជំងឺកូវីដ១៩នេះនៅមានកម្រិតនៅឡើយ។
លោកបានលើកឡើងថា៖«ខ្ញុំគិតថាហានិភ័យខ្ពស់មែនទែន ព្រោះថាពលករគាត់មិនទទួលបានព័ត៌មានពេញលេញដូចពលរដ្ឋថៃទេ ព្រោះថាពេលខ្លះគាត់នៅកន្លែងធ្វើការណាមួយអត់មានស្ថាប័នណាមួយដែលទៅផ្សព្វផ្សាយឱ្យដល់តំបន់ដែលគាត់នៅទេ»។
លោកបានលើកជាសំណើថា៖«ការសំណូមពររបស់ខ្ញុំគួរតែមានវិធានការមួយជួយប្រកាស ឬធ្វើយុទ្ធនាការណ៍ផ្សព្វផ្សាយឱ្យបានទួលំទូលាយដល់ពលករខ្មែរយើង ដែលនៅក្នុងខេត្តដែលប្រឈមដូចជាខេត្តសាមុតសាខន សាមុតប្រាកាន ឬខេត្តផ្សេងទៀតដែលមានព្រំប្រទល់ជាប់ខេត្តនេះ ដើម្បីឱ្យពលករខ្មែរយើងហ្នឹងបានត្រៀមខ្លួនក្នុងការប្រយុទ្ធប្រឆាំងនឹងជំងឺនេះ»។
វីអូឌី មិនអាចទាក់ទងសុំការឆ្លើយតបពីអ្នកនាំពាក្យក្រសួងការបរទេសកម្ពុជា លោក កុយ គួង បាននៅឡើយទេទាក់ទងនឹងការផ្សព្វផ្សាយរឿងកូវីដ១៩ដល់ពលករខ្មែរនៅប្រទេសថៃ។
បើតាមលោក ប្រាក់ ភក្រ្តា ពលករខ្មែរប្រមាណ១០ភាគរយធ្វើការនៅខេត្តសាមុតសាខន ហើយភាគច្រើនពួកគេធ្វើការសំណង់ និងជាកម្មករនេសាទ។ លោកបានលើកឡើងទៀតថាពលករខ្មែរដែលជាអ្នកនេសាទប្រឈមនឹងហានិភ័យជាងគេព្រោះថាពួកគេត្រូវលើកដាក់ត្រីនិងគ្រឿងសមុទ្រនៅផែហើយត្រូវជួបជាមួយថៅកែដែលជាអ្នកលក់គ្រឿងសមុទ្រ។
លោកក៏បានអំពាវនាវឱ្យពលករខ្មែរទាំងអស់ត្រូវបង្កើនការការពារ និងតាមដានសុខភាពរបស់ខ្លួនជាប្រចាំ បើមានភាពមិនប្រក្រតីត្រូវទៅពិនិត្យជាបន្ទាន់ និងស្តាប់ការណែនាំរបស់ក្រសួងសុខាភិបាលថៃ។ លោកបានស្នើឱ្យពលករខ្មែរទាំងអស់មិនត្រូវចាកចេញពីកន្លែងដែលខ្លួនរស់នៅនោះទេ ដើម្បីបញ្ចៀសការផាកពិន័យ និងការពារខ្លួនពីជំងឺកូវីដ១៩។
បន្ថែមលើនេះលោកភក្រ្តាបានអំពាវនាវដល់អាជ្ញាធរថៃផ្តល់ជំនួយដល់ពលករបរទេសឱ្យបានដូចពលរដ្ឋថៃដែរ ប្រសិនបើពួកគេត្រូវផ្អាកការងារបណ្តោះអាសន្នដោយសារវិបត្តិកូវីដ១៩។
របាយការណ៍ប្រចាំខែតុលា ឆ្នាំ២០២០ របស់ការិយាល័យរដ្ឋបាលពលករបរទេសរបស់ថៃបង្ហាញថាពលករបរទេសដែលកំពុងធ្វើការនៅក្នុងប្រទេសថៃមានចំនួន២ ៤៨២ ២៥៦នាក់ ដែលក្នុងនោះមានពលករខ្មែរចំនួន៥០១ ៩៥០នាក់។
ក្នុងសារជាសម្លេងដែលផ្សព្វផ្សាយលើទំព័រហ្វេសប៊ុករបស់លោកនៅថ្ងៃនេះ លោកនាយករដ្ឋមន្រ្តី ហ៊ុន សែន បានអំពាវនាវឱ្យពលករខ្មែរដែលកំពុងរស់នៅប្រទេសថៃត្រូវជឿជាក់លើរដ្ឋាភិបាលថៃក្នុងការគ្រប់គ្រងសភាពការណ៍នៃការឆ្លងកូវីដ១៩ក្នុងសហគមន៍ប្រទេសនេះ។ លោកជឿជាក់ថារដ្ឋាភិបាលមានសមត្ថភាពគ្រប់គ្រាន់ក្នុងការដោះស្រាយបញ្ហានេះ ព្រោះនេះមិនមែនជាលើកទី១ដែលថៃប្រឈមនឹងបញ្ហានេះ។
លោកបានថ្លែងថា៖«សង្ឈឹមថាប្អូនកម្មករកម្មការិនីរបស់យើងដែលធ្វើការនៅក្នុងប្រទេសថៃជឿទុកចិត្តទៅលើសមត្ថភាពនៃការដោះស្រាយរបស់រាជរដ្ឋាភិបាលថៃ របស់សមត្ថកិច្ចពាក់ព័ន្ធរបស់ថៃ ដែលធ្វើការនៅទីនោះ មិនគួររត់ចាកចេញពីប្រទេសថៃក្នុងពេលដែលថៃមានការលំបាក»។
លោកនាយករដ្ឋមន្រ្តីបានលើកឡើងទៀតថាការមិនធ្វើដំណើរចាកចេញពីប្រទេសថៃអាចជួយការពារខ្លួននៅនឹងកន្លែងសម្រាប់ពលករខ្មែរ ព្រោះថារដ្ឋាភិបាលថៃនឹងផ្តល់កិច្ចការពារ ហើយម្យ៉ាងទៀតវាក៏អាចទប់ស្កាត់ការនាំចូលកូវីដ១៩មកកម្ពុជាផងដែរ។ លោកក៏បានអំពាវនាវផងដែរឱ្យពលរដ្ឋប្រាប់ដល់សាច់ញាតិកំពុងរស់នៅប្រទេសថៃឱ្យស្ថិតនៅទីនោះជាបន្តសិន។
លោកបានថ្លែងបន្តថាប្រសិនបើពលករខ្មែរចង់ត្រលប់មកកម្ពុជាវិញនោះជាដាច់ខាតពួកគេត្រូវធ្វើតេស្តរកកូវីដ១៩ និងធ្វើចត្តាឡីស័កឱ្យគ្រប់ចំនួន១៤ថ្ងៃ។
លោកនាយករដ្ឋមន្រ្តី ក៏បានបញ្ជាដល់មន្រ្តីក្រោមឱវាទឱ្យពង្រឹងការធ្វើចត្តាឡីស័កលើអ្នកដែលមកពីប្រទេសថៃឱ្យបានម៉ត់ចត់ថែមទៀត ដោយលោកឱ្យបើកតែច្រកទ្វារអន្តរជាតិចំនួន៣តែប៉ុណ្ណោះដើម្បីងាយស្រួលគ្រប់គ្រង ដែលក្នុងនោះមានច្រកអូរស្មាច់ ដូង និងប៉ោយប៉ែត។ លោកក៏បានបញ្ជាឱ្យមានការត្រៀមរថយន្តកងទ័ពទុកដឹកពលករសម្រាប់ធ្វើចត្តាឡីស័កផងដែរ។
លោកបានបញ្ជាឱ្យក្រសួងសុខាភិបាលបញ្ជូនបន្ថែមនូវម៉ាសក្រណាត់ និងម៉ាសធម្មតាដល់ខេត្តជាប់ព្រំដែនថៃ ដើម្បីឱ្យពលករដែលត្រលប់ចូលកម្ពុជាវិញ ដែលក្នុងនោះម្នាក់អាចទទួលបានម៉ាសចំនួន២។
ក្រសួងសុខាភិបាលកម្ពុជា បានចេញសេចក្តីណែនាំបន្ទាន់មួយនៅថ្ងៃនេះដោយឱ្យអាជ្ញាធរនៅខេត្តតាមបណ្តោយព្រំដែនថៃមានកោះកុង ពោធិ៍សាត់ បាត់ដំបង បន្ទាយមានជ័យ និងឧត្តរមានជ័យជាដើមត្រូវបង្កើនការប្រុងប្រយ័ត្ន និងពិនិត្យឱ្យបានម៉ឺងម៉ាត់ជាពិសេសវាស់កំដៅ និងបំពេញទម្រង់ពិនិត្យសុខភាពអ្នកដំណើរឱ្យបានត្រឹមត្រូវបំផុត និងត្រូវមានការរៀបចំការរក្សាគម្លាតពីគ្នាឱ្យបានពី១ម៉ែត្រកន្លះឡើង។ចំណែកសំណាករបស់អ្នកដំណើរត្រូវយក និងបញ្ជូនមកធ្វើតេស្តនៅវិទ្យាស្ថានប៉ាស្ទ័រកម្ពុជា វិទ្យាសា្ថនសុខភាពសាធារណៈ និងមន្ទីរពេទ្យខេត្តសៀមរាប នៅថ្ងៃដែលពួកគេមកដល់ច្រកចូលកម្ពុជា។
ក្រសួងសុខាភិបាល ក៏បានអំពាវនាវឱ្យអាជ្ញាធរថ្នាក់ក្រោមជាតិត្រូវធ្វើការត្រួតពិនិត្យការធ្វើចត្តាឡីស័ករបស់អ្នកដំណើរឱ្យបានត្រឹមត្រូវ ដើម្បីបង្ការការរបូតចេញពីការធ្វើចត្តាឡីស័កជាយថាហេតុណាមួយ។ ចំណែកពលរដ្ឋត្រូវចូលរួមផ្តល់ព័ត៌មានទៅអាជ្ញាធរ ប្រសិនបើមានអ្នកចំណូលថ្មីណាម្នាក់ចូលក្នុងសហគមន៍ខ្លួនដោយមិនបានធ្វើការត្រួតពិនិត្យសុខភាព និងធ្វើចត្តាឡីស័កឱ្យបានគ្រប់១៤ថ្ងៃ៕
