អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម បញ្ជាក់ថា ក្រសួងពុំដែលអនុញ្ញាតឱ្យមានការនាំចូលស៊ុតពីប្រទេសជិតខាងចូលមកទីផ្សារកម្ពុជាឡើយ។
ការបញ្ជាក់របស់ក្រសួងបានធ្វើឡើងក្រោយពីថ្មីៗនេះមានសាធារណជនមួយចំនួន ជាពិសេសអ្នកចិញ្ចឹមបក្សីយកស៊ុត បានចូលរួមផ្តល់យោបល់ក្នុងគណនីហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពាក់ព័ន្ធនឹងការធ្លាក់ចុះថ្លៃស៊ុតនៅលើទីផ្សារនៅប៉ុន្មានថ្ងៃចុងក្រោយនេះ។
សេចក្តីប្រកាសព័ត៌មានរបស់អគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម នៅថ្ងៃទី២១ ខែធ្នូ ឆ្នាំ២០២០នេះ បានលើកឡើងថា ករណីស៊ុតចុះថោកក្រោម៣០០រៀលក្នុងមួយគ្រាប់ និងពិបាករកទីផ្សារនៅតាមតំបន់មួយចំនួននោះ មានការលើកឡើងថា បណ្តាលមកពីការនាំចូលស៊ុតពីប្រទេសជិតខាង ដូចជា ប្រទេសវៀតណាម ជាដើម។
ករណីនេះ អគ្គនាយកដ្ឋានបានគូសបញ្ជាក់ថា ក្រសួងកសិកម្មពុំដែលអនុញ្ញាតជាគោលការណ៍ឱ្យនាំចូលស៊ុតពីប្រទេសជិតខាងចូលមកទីផ្សារកម្ពុជាឡើយ។
អគ្គនាយកដ្ឋានបានជំរុញអាជីវករ អ្នកចិញ្ចឹមសត្វ ជាពិសេសអ្នកចិញ្ចឹមមាន់-ទាយកស៊ុត ដែលបានដឹងព័ត៌មានពីការលួចនាំចូលស៊ុតមាន់-ទាពីប្រទេសជិតខាង រាយការណ៍ទៅអគ្គនាយកដ្ឋាន ដើម្បីចុះអន្តរាគមន៍បង្ក្រាបបទល្មើសចលនាសត្វ និងផលិតផលសត្វ ស្របតាមច្បាប់ស្តីពីសុខភាពសត្វនិងផលិតកម្មសត្វ។
អគ្គនាយកដ្ឋានសុខភាពសត្វ បានគូសបញ្ជាក់ដែរថា តម្រូវការស៊ុតត្រូវបានកាត់បន្ថយជាអតិបរមានេះ អាចបណ្តាលមកពីបញ្ហាជំងឺកូវីដ១៩ ដែលធ្វើឱ្យកម្មវិធីជួបជុំផ្សេងៗត្រូវបានផ្អាក និងនៅពេលមានការចិញ្ចឹមបក្សីយកស៊ុតមានការកើនឡើងនៅគ្រប់តំបន់ទូទាំងប្រទេស និងស្របពេលរដូវត្រី ដែលធ្វើឱ្យប្រជាពលរដ្ឋមួយចំនួនងាកមកបរិភោគត្រីជំនួសស៊ុតសត្វបក្សីវិញ៕
