ប្រជាពលរដ្ឋមួយចំនួននៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានបង្ហាញក្តីបារម្ភពីការបាក់ច្រាំងទន្លេនិងដីចម្ការ រួមនឹងផ្ទះសម្បែងរបស់ពួកគាត់ ខណៈមានសាឡង់បូមខ្សាច់ពី៣ទៅ៤គ្រឿង កំពុងប្រតិបត្តិការបូមខ្សាច់និងដីល្បាប់ពីទន្លេ។
អ្នកស្រី ឈិន តូច អាយុ៦៧ឆ្នាំ មានផ្ទះនិងដីចម្ការស្ថិតនៅតាមបណ្តោយច្រាំងទន្លេ នៅភូមិទួលរកា២ ក្នុងសង្កាត់ចាក់អង្រែក្រោម បានឱ្យដឹងនៅថ្ងៃចន្ទនេះថា ម៉ាស៊ីនបូមខ្សាច់បានចាប់ផ្តើមដំណើរការបូមខ្សាច់ពីបាតទន្លេ នៅចំពីក្រោយផ្ទះអ្នកស្រីប្រហែល១សប្តាហ៍មកហើយ។
អ្នកស្រីបន្តថា រូបគាត់មិនបានដឹងពីអ្វីដែលកំពុងកើតឡើង ឬទទួលបានការជូនដំណឹងពីអាជ្ញាធរដែនដីណាម្នាក់ អំពីលទ្ធភាពនៃផលប៉ះពាល់ដោយសារការបូមខ្សាច់នោះទេ។ តែយ៉ាងណា អ្នកស្រីថា ខ្លួនមិនបារម្ភពីការបាក់ផ្ទះនោះទេ ដោយសារផ្ទះអ្នកស្រីនៅឆ្ងាយពីច្រាំង តែអ្នកស្រីបារម្ភពីដីចម្ការនៅខាងក្រោយផ្ទះជាប់ច្រាំងទន្លេ។
អ្នកស្រី ឈិន តូច និយាយថា៖ «យើងគ្រាន់តែសុំថា កុំឱ្យបូមអស់ពេក។ តែបើរឿងឃាត់គេ យើងមិនអាចឃាត់បានទេ។ គេត្រូវតែបូមហើយ។ ប៉ុន្តែខ្ញុំគ្រាន់តែសុំប្រធានក្រុមគេមក ខ្ញុំសុំគេថា កុំឱ្យបូមអស់ពេក ទុកដីហ្នឹងដាំដំណាំ។ មិនមែនថាដាំមិនកើតទេ ដាំកើត គ្រាន់តែយើងឡើងមកវាពិបាក បើវាបាក់ទៅហើយ»។
អ្នកភូមិមួយរូបទៀតដែលមានផ្ទះជាប់ច្រាំងទន្លេក្បែរសាឡង់បូមខ្សាច់ដែរនោះ ឈ្មោះ ជួប ចំរើន ប្រាប់ថា អ្នកស្រីមិនបានទទួលព័ត៌មានពីសាឡង់បូមខ្សាច់នៅទន្លេក្បែរផ្ទះនោះទេ ប៉ុន្តែអ្នកស្រីបានឃើញសាឡង់ដឹកខ្សាច់និងបូមខ្សាច់ក្បែរផ្ទះអ្នកស្រីជាច្រើនឆ្នាំមកហើយ។
អ្នកស្រីប្រាប់ថា៖ «ចេះតែខ្លាចហើយ ផ្ទះនៅមាត់ទន្លេ ខ្លាចបាក់ដី។ តែបូមយូរទៅ វាអាចបាក់ដែរហ្នឹង តែមិនដឹងគេបូមនៅហ្នឹងឬបូមនៅណា យើងមិនដឹងដែរ។ យើងវាអត់មានបច្ចេកទេសខាងហ្នឹង ឃើញតែកប៉ាល់ សំឡេងងឺងៗ ឃើញបូមទឹកបាចចេញ តែយើងអត់ដឹង ព្រោះយើងអត់មានបច្ចេកទេសថាគេធ្វើអី»។
ប្រធានភូមិទួលរកា១ លោក ហោ យៀវ បានប្រាប់ VOD ថា សាឡង់ទាំងនោះបានចាប់ដំណើរការប្រមាណ១ខែហើយ ដោយមានការអនុញ្ញាតពីរដ្ឋបាលរាជធានីភ្នំពេញ ឱ្យធ្វើការបូមស្តារខ្សាច់បាតទន្លេ ចាប់ពីគល់ស្ពានព្រែកសំរោង ក្រុងតាខ្មៅ រហូតដល់កោះពេជ្រ។
លោក យៀវ សង្ឃឹមថា ក្រុមហ៊ុននឹងប្រើប្រាស់បច្ចេកទេសបូមស្តារត្រឹមត្រូវនិងមិនហួសពីកម្រិតបច្ចេកទេសកំណត់ ដើម្បីកុំឱ្យមានការបាក់ច្រាំងទន្លេដូចនៅតំបន់ដទៃ។
លោក ហោ យៀវ និយាយថា៖ «ការស្តារទន្លេ បើសិនតាមបច្ចេកទេសគេនេះ វាអត់អីទេ កុំឱ្យតែខាងអ្នកស្តារមិនមានបច្ចេកទេសស្តារ យើងអាចបារម្ភដែរ ព្រោះកន្លងមកកន្លែងផ្សេងៗវាមានបញ្ហាដែលទាញ ទំនាញវាទាញ ទាញរអិល»។
កាលពីខែកុម្ភៈ ពលរដ្ឋមួយចំនួនក្នុងខេត្តកណ្តាល បានបាត់បង់ផ្ទះសម្បែងរបស់ពួកគេដែលឋិតនៅតាមបណ្តោយទន្លេបាសាក់ ដោយសារការបាក់ច្រាំង។
អ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ និយាយថា សកម្មភាពបូមខ្សាច់ទន្លេបាសាក់ទាំងនោះ មិនមែនជារបស់ក្រុមហ៊ុនបូមខ្សាច់ជាង ៩០ ដែលទទួលបានអាជ្ញាបណ្ណពីក្រសួងនោះទេ ប៉ុន្តែលោកថា វាអាចជាគម្រោងស្តារទន្លេមួយដែលគ្រប់គ្រងដោយសាលារាជធានីភ្នំពេញ។
លោក មុនីរ៉ាត់ និយាយថា ប្រតិបត្តិករថ្មីមួយឈ្មោះ Chaktomuk Resources Supply បានចាប់ផ្តើមអាជីវកម្មបូមខ្សាច់តាំងពីខែមុន ដោយផ្អែកលើអាជ្ញាបណ្ណបូមខ្សាច់និងល្បាប់ភក់ ក្នុងផ្ទៃដីជាង៨០០ហិតតា នៅតំបន់៤ផ្សេងគ្នាតាមដងទន្លេបាសាក់ និងទន្លេមេគង្គក្រោម។
លោកថា ក្រុមហ៊ុនបានជូនដំណឹងនិងពិគ្រោះជាមួយប្រជាពលរដ្ឋក្នុងតំបន់ មុនពេលចាប់ផ្តើមប្រតិបត្តិការបូមបាតទន្លេ ហើយក្រុមហ៊ុនក៏បានសិក្សាពីផលប៉ះពាល់និងបានគោរពតាមលក្ខខណ្ឌតឹងរ៉ឹង ដែលមិនឱ្យបូមជ្រៅពេកនិងហួសដែនកំណត់ដែរ។ លោកបន្តថា មន្រ្តីរដ្ឋាភិបាលនឹងចុះទៅវាស់វែង១លើកទៅ២លើកក្នុង១ខែ។
លោកបន្ថែមថា ខ្សាច់ដែលបានបូមអាចត្រូវបានលក់សម្រាប់ទីផ្សារក្នុងស្រុកតាមតម្រូវការជាមុន មុននឹងនាំចេញទៅក្រៅប្រទេសនៅពេលដែលនៅសល់។
លោកថា៖ «អត់មានការកំណត់ត្រូវនាំទៅប្រទេសណាទេ គឺថានាំចេញទីផ្សារណាដែលទទួលយកបាន គឺគេនាំចេញទៅទីនោះ។»
លោក មុនីរ៉ាត់ បន្ថែមថា៖ «យើងមិនមែនថា ក្នុងស្រុក ១ថ្ងៃត្រូវការតែ១[ទៅ]២ពាន់ម៉ែត្រគូប ហើយមិនដឹងស្តារទន្លេតាំងពីព្រំដែនរហូតដល់កំពង់ចាម ក្រចេះ។ មិនដឹងថាស្តារបាតទន្លេហ្នឹងជ្រៅទេ! អញ្ចឹងក៏យើងអនុញ្ញាតឱ្យស្តារ ហើយបើមានតម្រូវការក្នុងស្រុក ផ្គត់ផ្គង់ក្នុងស្រុក ហើយបើលើសពីតម្រូវការ ឱ្យធ្វើការនាំចេញ»។
នាយកក្រុមហ៊ុន Chaktomuk Resources Supply អ្នកនាង វិចិត្រ រាសី បានបដិសេធអត្ថាធិប្បាយលម្អិត ដោយគ្រាន់តែបញ្ជាក់ថា ក្រុមហ៊ុននេះបានស្នើសុំអាជ្ញាបណ្ណរួចហើយ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី មិនបានឆ្លើយតបនឹងសំណួរនេះទេ។
ស្ថាបនិកក្រុមសកម្មជនបរិស្ថានមាតាធម្មជាតិ ដែលកំពុងស្ថិតនៅក្រៅប្រទេស លោក Alejandro Gonzalez-Davidson និយាយថា ការបូមខ្សាច់កំពុងតែមានប្រតិបត្តិការកាន់តែច្រើនគួរឱ្យកត់សម្គាល់ សម្រាប់តម្រូវការចាក់លុបដីក្នុងស្រុក ជាងការនាំចេញក្នុងរយៈពេលប៉ុន្មានខែកន្លងទៅ។
លោកនិយាយថា ក្រុមបរិស្ថានរបស់លោកមានការបារម្ភអំពីផលប៉ះពាល់ផ្នែកសង្គមនិងបរិស្ថាន ដោយសារការចាក់លុបបឹង ក៏ដូចជាសុខភាពរបស់ទន្លេ និងជីវភាពរស់នៅរបស់ពលរដ្ឋដែលពឹងអាស្រ័យលើផលនេសាទ ដោយសារការបូមយកខ្សាច់ហួសប្រមាណនេះផងដែរ។
លោក Alex និយាយថា រដ្ឋាភិបាលគួរតែបង្ហាញភស្តុតាង ដើម្បីគាំទ្រអំណះអំណាងរបស់ពួកគេ ដែលថា ការបូមខ្សាច់មិនធ្វើឱ្យខូចខាត។
លោក Alex ប្រាប់ថា៖ «នៅខ្មែរ បូមខ្សាច់អត់មានកម្រិតអី អត់មានការស្រាវជ្រាវច្បាស់លាស់ អត់មានរបាយការណ៍ស្តីពីផលប៉ះពាល់បរិស្ថាននិងសង្គមជាសាធារណៈ ប្រជាជនមូលដ្ឋានមិនអាចបញ្ចេញយោបល់បាន ហើយរដ្ឋាភិបាល គេមិនដែលខ្វល់អំពីអ្វីដែលសង្គមស៊ីវិលឬសកម្មជននិយាយ»។
លោកបន្ថែមថា៖ «ក្នុងនាមយើងសកម្មជនបរិស្ថាន សកម្មជនសិទ្ធិមនុស្សហ្នឹង យើងបារម្ភខ្លាំងណាស់»៕