ក្រសួងអេកូឡូស៊ី និងបរិស្ថាននៃប្រទេសចិន ផ្តល់ជំនួយជាសម្ភារនិងបរិក្ខារកាត់បន្ថយការបញ្ចេញកាបូនដល់ប្រទេសកម្ពុជា ដែលមានទឹកប្រាក់ប្រមាណ៣លានដុល្លារសហរដ្ឋអាមេរិក។
អ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់អ្នកសារព័ត៌មានតាមបណ្តាញសង្គមតេឡេក្រាមថា ពិធីប្រគល់សម្ភារជានិមិត្តរូបដែលជាជំនួយរបស់ក្រសួងអេកូឡូស៊ី និងបរិស្ថាននៃប្រទេសចិន តាមរយៈក្រុមហ៊ុន Spark Co., Ltd កាលពីថ្ងៃទី២១ ខែធ្នូ ឆ្នាំ២០២០ នៅទីស្តីការក្រសួងបរិស្ថាន។
លោកបន្តថា ជំនួយជាសម្ភារនិងបរិក្ខារកាត់បន្ថយការបញ្ចេញកាបូននេះ ធ្វើឡើងតាមរយៈអនុស្សរណៈយោគយល់គ្នា ស្តីពី កិច្ចសហប្រតិបត្តិការគម្រោងសាកល្បងបញ្ចេញកាបូនតិចនៅខេត្តព្រះសីហនុ ដែលបានចុះហត្ថលេខាកាលពីឆ្នាំកន្លងទៅ រវាងក្រសួងបរិស្ថានកម្ពុជា និងក្រសួងអេកូឡូស៊ីនិងបរិស្ថានចិន។
លោក នេត្រ ភក្ត្រា បានបន្ថែមថា ជំនួយសម្ភារនិងបរិក្ខារទាំងនោះ រួមមាន អំពូលបំភ្លឺផ្លូវចំនួន២ ៨០០ដើម, សូឡា PV ចំនួន២០០គ្រឿង, ម៉ូតូអាគុយចំនួន២០០គ្រឿង និងឧបករណ៍សម្រាប់មន្ទីរពិសោធន៍ត្រួតពិនិត្យគុណភាពខ្យល់ចំនួន២០សម្រាប់ សរុបជាទឹកប្រាក់ប្រមាណ៣លានដុល្លារសហរដ្ឋអាមេរិក។
លោក Wang Wentian ឯកអគ្គរដ្ឋទូតចិនប្រចាំកម្ពុជា ត្រូវបានក្រសួងបរិស្ថានស្រង់ប្រសាសន៍ថា ជំនួយជាសម្ភារទាំងនេះគឺជាការរឹតចំណងមិត្តភាពរវាងប្រទេសទាំងពីរ ហើយនឹងជួយប្រទេសកម្ពុជាលើផ្នែកវិស័យបរិស្ថាន។
រដ្ឋមន្ត្រីក្រសួងបរិស្ថានកម្ពុជា លោក សាយ សំអាល់ បានថ្លែងថា សម្ភារបំភ្លឺទាំងនោះនឹងត្រូវដាក់ឱ្យប្រើនៅតាមទីសាធារណៈនិងសាលារៀននានាក្នុងខេត្តព្រះសីហនុ ហើយក៏ដើម្បីអនុញ្ញាតឱ្យសិស្សានុសិស្សបានសិក្សាពីសម្ភារប្រើប្រាស់ថាមពលព្រះអាទិត្យ ក៏ដូចជាជួយបំភ្លឺកន្លែងហាត់កីឡានានា។
លោកបន្តថា៖ «គោលដៅសំខាន់ គឺធ្វើឱ្យឪពុកម្តាយសិស្សវិលត្រឡប់មកសាលារៀន ដើម្បីហាត់កីឡា និងមានឱកាសអាចជជែកពិភាក្សាជាមួយលោកគ្រូអ្នកគ្រូ […] ម៉ូតូអាគុយនិងឧបករណ៍សម្រាប់ត្រួតពិនិត្យគុណភាពខ្យល់ ត្រូវបានយកមកប្រើប្រាស់នៅទីស្តីការក្រសួងបរិស្ថាន នៅមន្ទីរពិសោធន៍និងតាមទីតាំងត្រួតពិនិត្យតាមដានរបស់ក្រសួងបរិស្ថាន»។
បើតាមក្រសួងបរិស្ថាន ចាប់តាំងពីឆ្នាំ២០១៥ ដល់២០២០ ក្រសួងបានចុះអនុស្សរណៈយោគយល់ និងកិច្ចព្រមព្រៀងជាមួយស្ថាប័នសំខាន់ៗនៃសាធារណរដ្ឋប្រជាមានិតចិនមួយចំនួន រួមមាន កិច្ចសហប្រតិបត្តិការគាំពារបរិស្ថានកម្ពុជា-ចិន, ការបង្កើតការិយាល័យរៀបចំមជ្ឈមណ្ឌលកិច្ចសហប្រតិបត្តិការបរិស្ថានកម្ពុជា-ចិន, ការផ្ដល់ជំនួយឧបករណ៍ប្រព្រឹត្តកម្មទឹកកខ្វក់, កិច្ចសហប្រតិបត្តិការសាកល្បងក្នុងការអភិរក្សជីវចម្រុះ និងប្រព័ន្ធអេកូឡូស៊ី, ការរៀបចំមន្ទីរពិសោធន៍សហប្រតិបត្ដិការ កម្ពុជា-ចិន, ការរៀបចំតំបន់បញ្ចេញកាបូនតិច និង ការផ្ដល់ជំនួយស្ថានីយតាមដានគុណភាពទឹកស្វ័យប្រវត្តិ ជាដើម៕
