ក្រសួងសុខាភិបាលប្រកាសថា អ្នកជំងឺកូវីដ១៩ចំនួន២នាក់បានជាសះស្បើយ ក្នុងនោះមានអ្នកឆ្លងក្នុងសហគមន៍ម្នាក់និងអ្នកដំណើរមកពីក្រៅប្រទេសម្នាក់ និងមិនមានករណីឆ្លងថ្មីនោះទេ។
សេចក្តីជូនដំណឹងរបស់ក្រសួងសុខាភិបាលនៅថ្ងៃទី២២ ខែធ្នូ ឆ្នាំ២០២០នេះ ឱ្យដឹងថា អ្នកជាសះស្បើយពីជំងឺកូវីដ១៩ ជាស្ត្រីអាយុ៣២ឆ្នាំ ស្នាក់នៅក្នុងបុរី លឹម ឈាងហាក់ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ និងបុរសជនជាតិខ្មែរម្នាក់ទៀតអាយុ៧៥ឆ្នាំ ជាអ្នកដំណើរមកពីប្រទេសចិន។
ក្រសួងបន្តថា នៅថ្ងៃទី២១ ខែធ្នូ ឆ្នាំ២០២០ មិនមានករណីវិជ្ជមានកូវីដ១៩ទេ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន កាលពីយប់ថ្ងៃចន្ទម្សិលមិញ បានអំពាវនាវជាថ្មីដល់ប្រជាពលរដ្ឋបន្តអនុវត្តនូវវិធានការការពារសំខាន់ៗចំនួន៣ រួមមាន ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង។
លោកស្រីក៏បានណែនាំនូវវិធានការ «កុំ ៣» ផងដែរ ដូចជា កុំទៅកន្លែងមានមនុស្សច្រើន កុំទៅកន្លែងដែលបិទជិតគ្មានខ្យល់ចេញចូល ប្រើម៉ាស៊ីនត្រជាក់ច្រើន និងកុំប៉ះពាល់គ្នា ដូចជាពេលជួប កុំចាប់ដៃគ្នា កុំឱបគ្នា កុំកៀកគ្នា ជាដើម។
លោកស្រីបន្តថា៖ «ការធ្វេសប្រហែសរបស់បុគ្គលនឹងអាចនាំមកនូវការចម្លងវីរុសកូវីដ-១៩ ក្នុងគ្រួសារនិងក្នុងសហគមន៌ដោយមិនដឹងខ្លួន ដូច្នេះការខិតខំអនុវត្តវិធានការសុខាភិបាលឱ្យបានខ្ជាប់ខ្ជួន ព្រមទាំងចេះកែប្រែឥរិយាបថរបស់ខ្លួនសម្រាប់ការរស់នៅធម្មតាតាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ ជាភារកិច្ចរបស់បុគ្គលម្នាក់ៗ»។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី២២ ខែធ្នូ ឆ្នាំ២០២០ កម្ពុជារកឃើញអ្នកឆ្លងជំងឺកូវីដ១៩ សរុបចំនួន៣៦៣នាក់ ក្នុងនោះព្យាបាលជាសះស្បើយចំនួន៣៤៧នាក់ និងកំពុងសម្រាកព្យាបាលនៅមន្ទីរពេទ្យចំនួន១៦នាក់៕