មន្ត្រីជាន់ខ្ពស់ក្រសួងសុខាភិបាល បានលើកការពន្យល់ណែនាំរបស់អង្គការសុខភាពពិភពលោកថា ការបាញ់សារធាតុ ឬទឹកសម្លាប់មេរោគ ឬអាល់កុល លើសរីរាង្គមនុស្ស មិនអាចជួយប្រឆាំងនឹងវីរុសកូវីដ-១៩បានទេ ហើយអាចនឹងបណ្តាលឱ្យមានគ្រោះថ្នាក់ដល់សុខភាពបាន។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានលើកយកនូវអត្ថបទបកប្រែក្រៅផ្លូវការពីអត្ថបទភាសាអង់គ្លេសរបស់អង្គការសុខភាពពិភពលោក មកផ្សព្វផ្សាយនៅថ្ងៃនេះថា យោងតាមការណែនាំតាំងពីខែមេសា ឆ្នាំ២០២០ បានបង្ហាញថា ការបាញ់អាល់កុល ឬថ្នាំសម្លាប់មេរោគ ឬសារធាតុសម្លាប់មេរោគ លើសរីរាង្គមនុស្ស មិនបានជួយដល់ការការពារខ្លួនពីវីរុសកូវីដ-១៩នោះឡើយ និងអាចធ្វើឱ្យមានគ្រោះថ្នាក់ដល់សុខភាពមនុស្សបាន។
អត្ថបទដដែលនោះបន្តថា អង្គការសុខភាពពិភពលោក បានណែនាំមិនត្រូវបាញ់ថ្នាំសម្លាប់មេរោគ ឬអាល់កុល ឬសារធាតុសម្លាប់មេរោគ ទៅលើខ្លួនមនុស្សនៅក្នុងគ្រប់កាលៈទេសៈ ខណៈសារធាតុទាំងនោះអាចធ្វើឱ្យពុលបាន ប្រសិនបើប៉ះមាត់ហើយលេបចូលទៅ និងបង្កផលប៉ះពាល់ដល់ស្បែក។
អត្ថបទនោះបញ្ជាក់ថា៖ «ថ្នាំសម្លាប់មេរោគ ឬសារធាតុសម្លាប់មេរោគ ត្រូវប្រើប្រាស់ដោយប្រុងប្រយ័ត្ន សម្រាប់លាងសម្អាតផ្ទៃទីកន្លែងណាមួយប៉ុណ្ណោះ […] សូមសម្គាល់ថា អាល់កុល ឬជែល អាចប្រើសម្រាប់សម្អាតដៃរបស់មនុស្សពីភាពកខ្វក់ដែលមានជាប់មេរោគនៅលើដៃ តែមិនត្រូវប្រើសម្រាប់បាញ់លើខ្លួនប្រាណឡើយ»។
លោកស្រី ឱ វណ្ណឌីន បានបញ្ជាក់បន្ថែមលើអត្ថបទនោះថា លេីកលែងតែការលាងសម្អាតដៃដោយសាប៊ូជាមួយទឹកស្អាត ឬអាល់កុល ឬជែល ដែលជាវិធានការសម្រាប់ការពារការចម្លងវីរុសកូវីដ-១៩បាន។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី២២ ខែធ្នូ ឆ្នាំ២០២០ កម្ពុជារកឃើញអ្នកឆ្លងជំងឺកូវីដ១៩ សរុបចំនួន៣៦៣នាក់ ក្នុងនោះព្យាបាលជាសះស្បើយចំនួន៣៤៧នាក់ និងកំពុងសម្រាកព្យាបាលនៅមន្ទីរពេទ្យចំនួន១៦នាក់៕
