អាជ្ញាធរខេត្តឧត្តរមានជ័យ អះអាងថា ពលរដ្ឋខ្មែរដែលធ្វើការនៅប្រទេសថៃ បាននាំគ្នាសម្រុកមកប្រទេសកម្ពុជាវិញ ដែលធ្វើឱ្យខេត្តនេះប្រឈមនឹងខ្វះកន្លែងធ្វើចត្តាឡីស័ក ស្របពេលរដ្ឋាភិបាលថៃកំពុងរឹតបន្តឹងពលករបរទេសដែលធ្វើការនៅក្នុងប្រទេសនេះ។
អភិបាលរងខេត្តឧត្ដរមានជ័យ លោក លឹម សុខតូ ប្រាប់វីអូឌីថា នៅក្នុងខេត្តនេះ មានមណ្ឌលចត្តាឡីស័កចំនួន៥កន្លែង ហើយបច្ចុប្បន្នកំពុងរៀងចំមួយកន្លែងទៀត។ លោកបន្តថា កន្លែងធ្វើចត្តាឡីស័កមួយកន្លែងទៀតដែលរៀបចំនេះ សម្រាប់ដាក់ពលករដែលសង្ស័យមានកូវីដ១៩ និងដាក់ពលករខេត្តឧត្តរមានជ័យប៉ុណ្ណោះ។
លោកថា៖ «ទោះបីយ៉ាងណាក៏ដោយ យើងប្រឈមនឹងការខ្វះ ដោយសារពលករគាត់មកច្រើនទៅ យើងរៀបចំដាក់មិនគ្រប់គ្រាន់ទេ ដោយសារយើងទុកកន្លែងខ្លះសម្រាប់ដាក់អ្នកហានិភ័យ អ៊ីចឹងអ្នកដែលយកសំណាកហើយត្រូវដាក់នៅនោះរហូតអត់បញ្ហា។ យើងអាចជួបប្រទះនឹងការខ្វះខាតដែរ ប៉ុន្តែថ្ងៃស្អែកយើងសុំគោលការណ៍ថ្នាក់ដឹកនាំ អាចបញ្ជូនទៅបណ្ដាខេត្តផ្សេងខ្លះឬយ៉ាងម៉េច ចាំមើលថ្ងៃស្អែក»។
លោក លឹម សុខតូ បន្តថា គិតត្រឹមថ្ងៃទី២៣នេះ ពលករចំនួន៤០៣នាក់ ក្នុងនោះ ១៣១នាក់ត្រូវបានយកសំណាកទៅធ្វើតេស្ត ដោយសារពួកគាត់នៅជិតតំបន់ដែលមានផ្ទុះជំងឺកូវីដ១៩។
លោកបញ្ជាក់ថា ពលករដែលត្រឡប់មកប្រទេសកំណើតភាគច្រើន គ្មានការងារធ្វើ ខណៈខេត្តខ្លះត្រូវបានបិទ បន្ទាប់ពីមានផ្ទុះជំងឺកូវីដ១៩។
នាយករដ្ឋបាលសាលាខេត្តបាត់ដំបង លោក សឿម ប៊ុនរិទ្ធ បានឱ្យដឹងថា កន្លែងធ្វើចត្តាឡីស័កនៅក្នុងខេត្តនេះមិនទាន់ប្រឈមនឹងកង្វះទីតាំងទេ ព្រោះចាប់ពីថ្ងៃទី២១និង២២ ខែធ្នូនេះ ទើបមានពលករចំនួន១២១នាក់ប៉ុណ្ណោះ ហើយភាគច្រើនពលករទាំងនោះលួចឆ្លងដែនខុសច្បាប់ ដោយដើរកាត់ព្រៃតាមអូរឆ្លងប្រទេសថៃចូលមកកម្ពុជា។
លោកបន្តថា ពលករទាំង១២១នាក់ត្រូវបានគ្រូពេទ្យយកសំណាកទៅពិនិត្យរកកូវីដ១៩ និងបានដាក់ឱ្យពួកគេធ្វើចត្តាឡីស័ករយៈពេល១៤ថ្ងៃ បើទោះបីជាមិនមានអាការក្ដៅខ្លួនក៏ដោយ ខណៈពលករជាង១០០នាក់ ក្នុងនោះ ពលករ២នាក់មកពីខេត្តសាមុតសាខនដែលជាខេត្តផ្ទុះជំងឺកូវីដ១៩។
លោកថា៖ «គោលការណ៍យើងត្រូវឱ្យយកសំណាកទាំងអស់សិន ក្នុងកាលៈទេសៈនេះ យើងអត់អាចធ្វេសប្រហែសបាន។ បើធ្វេសប្រហែស យើងអាចមានបញ្ហា អ្វីដែលលទ្ធភាពយើងអាចធ្វើបាន យើងត្រូវយកសំណាកទាំងអស់ជាមុនសិន»។
លោក សឿម ប៊ុនរិទ្ធ បន្តថា អាជ្ញាធរខេត្តកំពុងដាក់វិធានការត្រួតពិនិត្យតាមផ្លូវជាតិ ៥៩ តាមក្រវាត់ព្រំដែនពីកូនដំរីមកដល់ប៉ៃលិន បន្ទាប់ពីមានពលករនៅតែបន្តលួចឆ្លងដែនពីថៃចូលកម្ពុជា ខណៈអាជ្ញាធរថៃមិនទាន់យល់ព្រមបើកច្រកព្រំដែនអន្តរជាតិដូង។
អភិបាលរងខេត្តបន្ទាយមានជ័យ លោក លី សារី បានឱ្យដឹងថា ពលករដែលវិលត្រឡប់ពីប្រទេសថៃចាប់ពីថ្ងៃទី២២ ខែធ្នូនេះ មន្ត្រីសុខាភិបាលនិងអាជ្ញាធរបានយកសំណាកធ្វើតេស្តទាំងអស់ បើទោះបីជាពួកគាត់មិនមានអាការក្ដៅខ្លួនក៏ដោយ ដោយថា ដើម្បីទប់ស្កាត់ការឆ្លងជំងឺកូវីដ១៩។
លោកបន្តថា គិតចាប់ពីថ្ងៃទី២០ ដល់ថ្ងៃទី២២ ខែធ្នូនេះ ពលករដែលវិលពីថៃចូលមកកម្ពុជាមានចំនួន៦៨៣នាក់ ហើយបច្ចុប្បន្ន អ្នកទាំងនោះត្រូវបានដាក់ឱ្យធ្វើចត្តាឡីស័កទៅតាមទីតាំងដែលបានរៀបចំ។
លោកថា៖ «ទី១ អត់ការងារធ្វើ ទី២ គាត់ទៅខុសច្បាប់ អត់មានឯកសារត្រឹមត្រូវ ថៃគេចាប់បញ្ជូនមកវិញ មិនមែនមកពីខេត្តសាមុតសាខនផ្ទុះជំងឺកូវីដទេ»។
ក្រោយពីមានផ្ទុះជំងឺកូវីដ១៩ នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃទី២១ ខែធ្នូ ឆ្នាំ២០២០ បានស្តីបន្ទោសពលករបរទេសថា ជាដើមចមនៃការផ្ទុះជំងឺកូវីដ១៩ចូលក្នុងសហគមន៍នៅខេត្តសាមុតសាខន។
លោក នាង នៈ ជាកម្មករសំណង់ដែលសាងសង់អគាររោងចក្រនៅខេត្តសាមុតសាខន ប្រាប់វីអូឌីនៅថ្ងៃនេះថា រូបលោកនិងកម្មករផ្សេងទៀតត្រូវបានក្រុមហ៊ុនឱ្យធ្វើតេស្តរកមេរោគកូវីដ១៩។
លោកបន្តថា នៅពេលដែលមានផ្ទុះជំងឺបែបនេះ លោកចង់មកស្រុកកំណើតវិញដែរ ប៉ុន្តែអាជ្ញាធរថៃបានបិទមិនឱ្យមានការចេញចូលឡើយ។
លោក នាង នៈ៖ «ភ័យដែរហ្នឹង តែមិនដឹងធ្វើម៉េច។ យើងមកនៅស្រុកគេ មកធ្វើការ។ បើមិនធ្វើការ វាអត់មានអីហូបអញ្ចឹងណាបង»។
លោក នាង នៈ បន្តថា សម្រាប់ពលករខ្មែរដែលមិនមាន Passport ឬលិខិតឆ្លងដែន និងឯកសារ ត្រូវបានចាប់បញ្ជូនមកប្រទេសកំណើតវិញ ប៉ុន្តែអ្នកខ្លះត្រូវក្រុមហ៊ុនផ្អាកការងារមួយរយៈសិន ខណៈអ្នកមាន Passport ឬលិខិតឆ្លងដែន និងឯកសារ ក្រុមហ៊ុននៅតែឱ្យធ្វើការធម្មតា គ្រាន់តែហាមមិនឱ្យចេញចូលទៅកន្លែងផ្សេងតែប៉ុណ្ណោះ។
លោក នាង នៈ និយាយថា៖ «វិធានការគេ វាតឹងតែងណាស់ណាបង! បើថាយើងមាន Passport ត្រឹមត្រូវ គឺយើងអត់ពិបាកភ័យព្រួយបារម្ភ ព្រោះអីគេមើលថែយើងល្អតើ! បើអត់មាន គេនឹងចាប់បញ្ជូន ព្រោះអីគេមិនឱ្យនៅ គេខ្លាចឆ្លង ព្រោះអីយើងដើររហេតរហូត»។
ស្ថានទូតកម្ពុជាប្រចាំប្រទេសថៃ តាមរយៈសេចក្ដីជូនដំណឹងដែលចេញផ្សាយនៅថ្ងៃនេះ បានអំពាវនាវទៅដល់ពលករខ្មែរនៅក្នុងប្រទេសថៃ ឱ្យអនុវត្តតាមវិធានការអនាម័យនិងសេចក្ដីណែនាំរបស់រដ្ឋាភិបាលថៃ ដើម្បីបញ្ចៀសការឆ្លងរីករាលដាលនៃជំងឺកូវីដ១៩ បន្ទាប់ពីប្រទេសនេះរកឃើញករណីឆ្លងច្រើន។
បើតាមសេចក្ដីជូនដំណឹងដដែលថា រដ្ឋាភិបាលថៃបានហាមឃាត់ថៅកែរោងចក្រ សហគ្រាស និងម្ចាស់ក្រុមហ៊ុននានា មិនឱ្យចល័តពលករបរទេសចេញឬចូលទីតាំងដែលជំងឺកូវីដ១៩កំពុងផ្ទុះរីករាលដាល។
ស្ថានទូតកម្ពុជាប្រចាំប្រទេសថៃ បញ្ជាក់ថា រដ្ឋាភិបាលថៃក៏បានដាក់ចេញវិធានការវេជ្ជសាស្ត្រមួយចំនួនសម្រាប់ត្រួតពិនិត្យទៅលើពលករបរទេសផងដែរ ដូចជា វាស់កម្ដៅរាងកាយ ត្រួតពិនិត្យអាការផ្លូវដង្ហើម ការសម្អាតដៃជាមួយទឹកអាល់កុល ការរក្សាគម្លាតអំឡុងពេលបំពេញការងារ ជាដើម៕