វេលាព្រឹកព្រលឹមថ្ងៃពុធនេះ នៅពេលអាកាសធាតុត្រជាក់និងរងាផងនោះ មនុស្សរាប់រយនាក់បានសម្រុកចូលទៅផែនេសាទនានា ស្ថិតនៅតាមបណ្តោយបឹងមាត់ទន្លេសាប ក្នុងស្រុកពញាឮរបស់ខេត្តកណ្តាល ដើម្បីធ្វើប្រហុក បើទោះបីជាតម្លៃត្រីថ្លៃជាងឆ្នាំមុនក៏ដោយ។
អ្នកស្រី ម៉ ហម អាយុ៥៣ឆ្នាំ និងចៅស្រីបីនាក់របស់គាត់ដែលស្ថិតនៅក្នុងចំណោមមនុស្សរាប់រយនាក់នោះ កំពុងស៊ីឈ្នួលកាត់ក្បាលត្រីនៅកន្លែងផែត្រីលេខ១២ សម្រាប់ធ្វើជាប្រហុកឬផ្អក។
ស្ត្រីរូបនេះបានឱ្យដឹងថា ពេលគាត់កាត់ក្បាលត្រីបានមួយគីឡូក្រាម រូបគាត់នឹងទទួលបានអង្ករមួយកំប៉ុង ហើយថា ក្នុងមួយថ្ងៃគាត់និងចៅគាត់អាចកាត់ក្បាលត្រីបានរហូតដល់១០០គីឡូ ហើយអាចបានអង្ករមួយរយកំប៉ុង។
អ្នកស្រី ម៉ ហម និយាយថា៖ «ប្រហែលបាន១០០កំប៉ុង។ មួយឆ្នាំយើងកាត់បានតែមួយខែ។ ៥ ឬ៦ឆ្នាំមុន [ត្រីតម្លៃ] មួយគីឡូ ៣០០០រៀល ២៥០០រៀល ១៨០០រៀល តែឥលូវឡើង ៦០០០ ទៅ ៧០០០រៀលក្នុងមួយគីឡូ»។
ស្ត្រីរូបនេះបានរៀបរាប់បន្តថា ប្រជាពលរដ្ឋដែលទិញត្រីធ្វើប្រហុក ធ្វើដំណើរមកពីតាមបណ្តាខេត្តផ្សេងៗនៅក្នុងប្រទេសកម្ពុជា ហើយថា នៅពេលដែលពួកគេទិញត្រីបានហើយ បានមកជួលគាត់ឱ្យកាត់ក្បាលឱ្យ ហើយបន្ទាប់មកគេទៅជួលឱ្យគេឱ្យជាន់ដោយម៉ាស៊ីន ដែលយកស្រកាចេញ លាងសម្អាត និងសំដិល ហើយប្រឡាក់អំបិល។
អ្នកស្រី ម៉ ហម និយាយថា៖ «គេកាត់ក្បាលហើយ គេយកទៅវាយស្រកាឱ្យអស់ ហើយគេយកវាមកសំដិល។ មានម៉ាស៊ីនក្រឡុកវាយឱ្យអស់ស្រកា។ បន្ទាប់មកទៀត យើងប្រឡាក់អំបិល ហើយយើងដាក់ផ្អាប់ ហើយយើងស្រង់វាមក ហើយដាក់ផ្អាប់វាមួយសារទៀត ទើបប្រឡាក់អំបិលញាត់ក្រឡ»។
អ្នកស្រី ឃឹម អាយុ អាយុ៤០ឆ្នាំ ក៏ជាអ្នកស៊ីឈ្នួលកាត់ក្បាលត្រីផងដែរ បាននិយាយថា គាត់មកកាត់ក្បាលត្រីតាំងតែពីម៉ោង៦ព្រឹក ហើយកាត់ដល់ម៉ោង៦ល្ងាច រហូតដល់ចប់រដូវធ្វើប្រហុក ហើយគាត់អាចរកបាន៧០ទៅ៨០កំប៉ុងអង្ករក្នុងមួយថ្ងៃ ហើយថា ឆ្នាំនេះ ទឹកតូចដែលធ្វើឱ្យពុំសូវសម្បូរត្រីដូចឆ្នាំមុននោះទេ នាំឱ្យតម្លៃត្រីថ្លៃខុសពីរៀងរាល់ឆ្នាំ។
អ្នកស្រី ឃឹម និយាយថា៖ «ត្រីមិនសូវត្រូវ ទឹកវាអត់សូវឡើងផងហ្នឹងឆ្នាំហ្នឹង ទឹកឡើងមិនបានកន្លះខែផង ទឹកទៅវិញ។ ទឹកទន្លេ មិនឡើងទេ កុំតែបានភ្លៀង ឆ្នាំហ្នឹងទឹកនៅបាតទន្លេ»។
បុរសម្នាក់ឈ្មោះ សោម សំណាង អាយុ៥៣ឆ្នាំ ដែលបានមកទិញត្រីធ្វើប្រហុក បានប្រាប់ថា ត្រីឆ្នាំនេះមានតម្លៃថ្លៃជាងឆ្នាំមុនឆ្ងាយ។
លោក សោម សំណាង និយាយថា៖ «ឥលូវ ៦០០០រៀល ហើយអាធំគឺ ១២០០០រៀល។ ដូច្នេះហើយធ្វើតែបន្តិច ដោយសារតែវាជាតម្រូវការចាំបាច់។ អ្នកស្រែត្រូវតែមានប្រហុកផ្អកដូច្នេះហើយ ខែយើងច្រូតដកស្ទូងបានវាជួយជំនួស ហើយស្លដាំ យើងត្រូវការវា បើអត់ វាមិនកើតទេ»។
លោកបានញ្ជាក់បន្ថែមថា ម្នាក់ៗធ្លាប់ធ្វើចន្លោះពី៥០ទៅ១០០គីឡូក្នុង១ឆ្នាំ ប៉ុន្តែលោកថា ឥលូវមកធ្វើតែ៣០ទៅ៤០គីឡូទេ ដោយសារតែលុយលែងគ្រប់ ដោយលោកអះអាងថា ឆ្នាំនេះ លោកបានចំណាយទិញត្រីអស់៦០ម៉ឺន បានតែ១០០គីឡូ ហើយត្រូវជួលគេកាត់ក្បាល និងសម្អាតអស់១០ម៉ឺន តែឆ្នាំមុន លោកចំណាយត្រឹមតែ៣៥ម៉ឺនទៅ៤០ម៉ឺនក្នុង១០០គីឡូក្រាម។
ប្រធានរដ្ឋបាលជលផលខេត្តកណ្ដាល លោក ហេង សុភារិទ្ធ បានថ្លែងតាមទូរសព្ទថា ការចាប់ត្រីមានកម្រិតទាបនៅឆ្នាំនេះ ដោយសារតែកម្រិតទឹកទាបដែលធ្វើឱ្យបរិមាណត្រីធ្វើប្រហុកធ្លាក់ចុះ៣០ភាគរយ ដោយសារកម្ពស់ទឹកជំនន់ទន្លេមេគង្គស្ថិតក្នុងកម្រិតទាប ហើយបានអូសបន្លាយជាងមួយខែ វិសាលភាពនៃទឹកជំនន់ក្នុងបឹងទន្លេសាប និងការប្រែប្រួលអាកាសធាតុ។
លោក ហេង សុភារិទ្ធ ប្រាប់ថា៖ «ត្រីឆ្នាំនេះ បើយើងធ្វើការវាយតម្លៃ ប្រជានេសាទដែលនេសាទសាធារណៈនៅក្នុងរដូវបើកនេសាទក្នុងប៉ុន្មានខែកន្លងមក យើងឃើញថា កម្រិតមានការថយចុះ១៨ភាគរយ ដោយសារអាកាសធាតុនិងទឹកភ្លៀងមិនអាចធ្លាក់ចំអាងទន្លេមេគង្គ។ ដូច្នេះធ្វើឱ្យទឹកមានការថយចុះ ដូច្នេះទឹកមិនអាចឡើងទៅដល់បឹងព្រែកមួយចំនួនដែលធ្វើឱ្យត្រីមិនអាចពងកូនបាន»។
លោក សុភារិទ្ធ បានបន្តថា៖ «សភាពត្រីប្រហុក គឺមានការថយចុះ៣០ភាគរយពីឆ្នាំទៅ។ ដូច្នេះ វាអាចធ្វើឱ្យតម្លៃត្រីកើនឡើងពីឆ្នាំទៅ ហើយត្រីនៅថ្ងៃនេះ ត្រីប្រហុកមួយគីឡូ៤០០០រៀល»៕
