ក្រោយពីមានករណីឆ្លងជាចង្កោមនៃជំងឺកូវីដ១៩ បានផ្ទុះចេញពីផ្សារលក់គ្រឿងសមុទ្រមួយកន្លែងនៅខេត្តសាមុតសាខន ប្រទេសថៃ ពលករកម្ពុជាដែលធ្វើការក្នុងខេត្តនោះ និយាយថា ពួកគេកំពុងតម្រង់ជួរធ្វើតេស្ត និងត្រូវអាជ្ញាធរថៃណែនាំមិនឱ្យចាកចេញពីកន្លែងធ្វើការនិងអគារស្នាក់នៅរបស់ពួកគេឡើយ ដើម្បីចៀសវាងការសាយភាយនៃមេរោគនេះ។
មនុស្សជាង១ពាន់នាក់ក្នុងប្រទេសថៃ ត្រូវបានរកឃើញមានផ្ទុកវីរុសកូវីដ១៩ ពាក់ព័ន្ធនឹងការចម្លងជាចង្កោមដែលផ្ទុះឡើងចេញពីផ្សារលក់បង្គារក្នុងខេត្តសាមុតសាខន កាលពីចុងសប្តាហ៍មុន។
កម្មករសំណង់ខ្មែរដែលធ្វើការនៅខេត្តសាមុតសាខន លោក សូ សុធី អាយុ៤៣ឆ្នាំ បាននិយាយកាលពីថ្ងៃពុធម្សិលមិញថា អាគារស្នាក់នៅរបស់កម្មករនៅក្រុមហ៊ុនរបស់គាត់ មានចម្ងាយប្រហែល៣០០ម៉ែត្រពីផ្សារដែលផ្ទុះជំងឺ ប៉ុន្តែគាត់និងកម្មករដទៃទៀតមិនទាន់ត្រូវបានស្នើឱ្យធ្វើតេស្តរកវិជ្ជមានកូវីដ១៩នៅឡើយ។ យ៉ាងណា លោកថា រោងចក្របានប្រើប្រាស់រថយន្តដឹកកម្មករទៅមកពីកន្លែងស្នាក់នៅនិងការដ្ឋាន ដោយមិនអនុញ្ញាតឱ្យទៅកន្លែងណាផ្សេងឡើយ សូម្បីតែទៅផ្សារបន្លែ។
លោកបន្ថែមថា លោកបារម្ភខ្លាចឆ្លងជំងឺមួយនេះ ដែលអាចនឹងត្រូវចំណាយប្រាក់លើថ្លៃព្យាបាល ខណៈប្រាក់ចំណូលធ្លាក់ចុះជិត៥០ភាគរយ ធៀបនឹងរយៈពេលមុនផ្ទុះជំងឺ ដោយសារពុំមានការងារថែមម៉ោង។
លោក សូ សុធី ប្រាប់ថា៖ «បារម្ភមែនទែនហ្នឹង មិនមែនបារម្ភលេងៗអី។ យើងពិបាកដែរហ្នឹង បើសិនជាឆ្លងទៅ យើងមានថ្នាំឯណាការពារ។ បើជា ក៏យើងមានបញ្ហាអស់លុយអស់កាក់ដែរ ថ្នាំពេទ្យគេមាន គ្រាន់តែយើងអស់លុយអស់កាក់»។
ពលករកម្ពុជាម្នាក់ទៀតនៅខេត្តសាមុតសាខន លោក នាង នៈ ប្រាប់ VOD តាមទូរសព្ទខណៈលោកកំពុងឈរតម្រង់ជួរដើម្បីធ្វើតេស្តរកកូវីដ១៩ ថាលោកមកផ្តល់សំណាកតាមការណែនាំរបស់អាជ្ញាធរដែនដី។ លោកបន្ថែមថា មានកម្មករកម្ពុជាប្រហែលពី៥០ទៅ៦០នាក់ធ្វើការក្នុងការដ្ឋានសាងសង់រោងចក្រជាមួយលោក។
លោក នាង នៈ ប្រាប់ថា៖ «ភ័យដែរហ្នឹង តែមិនដឹងធ្វើម៉េច។ យើងមកនៅស្រុកគេ មកធ្វើការ។ បើមិនធ្វើការ វាអត់មានអីហូបអញ្ចឹងណាបង»។
មន្រ្តីបណ្ដាញលើកកម្ពស់គុណភាពជីវិតពលករ (LPN) លោក ប្រាក់ ភក្រ្តា និយាយថា អាជ្ញាធរខេត្តក្បែរខាង គឺខេត្តឈុនបុរី បានប្រកាសនៅថ្ងៃពុធថា ស្រ្តីកម្ពុជាម្នាក់អាយុ១៩ឆ្នាំ បានឆ្លងដែនខុសច្បាប់ចូលទៅប្រទេសថៃនៅថ្ងៃទី១៧ ខែធ្នូ បានធ្វើតេស្តឃើញលទ្ធផលវិជ្ជមាន។
លោកបន្ថែមថា នាងនិងអ្នកពាក់ព័ន្ធ កំពុងត្រូវបានដាក់នៅដាច់ដោយឡែកនិងទទួលការព្យាបាល។
តែយ៉ាងណា អាជ្ញាធរកម្ពុជានិយាយនៅថ្ងៃព្រហស្បតិ៍នេះថា ករណីនេះមិនទាន់មានការបញ្ជាក់ជាផ្លូវការនៅឡើយ។
លោក ភក្ត្រា បន្ថែមថា អាជ្ញាធរថៃគួរតែធ្វើឱ្យប្រាកដថា ពួកគេទទួលបានការជូនដំណឹងអំពីដំណើរវិវត្តនៃបញ្ហាសុខភាពសាធារណៈឱ្យល្អប្រសើរនិងទូលំទូលាយ។
លោក ភក្រ្តា ប្រាប់ថា៖ «ខ្ញុំគិតថា ហានិភ័យខ្ពស់មែនទែន ព្រោះថា ពលករគាត់មិនទទួលបានព័ត៌មានពេញលេញដូចពលរដ្ឋថៃទេ ព្រោះថា ពេលខ្លះគាត់នៅកន្លែងធ្វើការណាមួយ អត់មានស្ថាប័នណាមួយដែលទៅផ្សព្វផ្សាយឱ្យដល់តំបន់ដែលគាត់នៅទេ»។
លោក ភក្រ្តា ថា ពលករអន្តោប្រវេសន៍កម្ពុជាក្នុងប្រទេសថៃ គឺមានប្រមាណ១០ភាគរយក្នុងខេត្តសាមុតសាខន ដោយពួកគេភាគច្រើនធ្វើការក្នុងវិស័យសំណង់និងនេសាទ។ អ្នកបកប្រែភាសាថៃរូបនេះបន្ថែមថា អ្នកនេសាទជាក្រុមអ្នកប្រឈមហានិភ័យខ្ពស់ជាងគេ ដោយធ្វើការកៀកនឹងផ្សារលក់គ្រឿងសមុទ្រ។
របាយការណ៍ប្រចាំខែតុលា ឆ្នាំ២០២០ របស់ការិយាល័យរដ្ឋបាលពលករបរទេសរបស់ថៃបង្ហាញថា ពលករបរទេសដែលកំពុងធ្វើការនៅក្នុងប្រទេសថៃមានចំនួនជិត២លាន៥សែននាក់ (២ ៤៨២ ២៥៦នាក់) ដែលក្នុងនោះមានពលករខ្មែរចំនួនជាង៥សែននាក់។
យ៉ាងណា ដោយសារការឆ្លងដែនខុសច្បាប់មានកម្រិតខ្ពស់ តួលេខជនអន្តោប្រវេសន៍មានការប៉ាន់ប្រមាណខុសៗគ្នា។ មុនពេលកូវីដ១៩ ក្រសួងការងារកម្ពុជាថា ពលករកម្ពុជាក្នុងប្រទេសថៃ មាន១លាន១សែននាក់ ប៉ុន្តែក្រុមសង្គមស៊ីវិលមួយចំនួនថាមានជិត២លាននាក់។
អ្នកនាំពាក្យក្រសួងការបរទេសកម្ពុជា លោក កុយ គួង និយាយថា កម្មករកម្ពុជាជិត១ម៉ឺននាក់ កំពុងធ្វើការនៅខេត្តសាមុតសាខន ហើយគ្មាននរណាម្នាក់ត្រូវបានរកឃើញឆ្លងជំងឺកូវីដ១៩នោះទេ។ លោកនិយាយនៅថ្ងៃព្រហស្បតិ៍ថា របាយការណ៍ដែលថា មានស្រ្តីកម្ពុជាម្នាក់មានវិជ្ជមានមេរោគក្នុងខេត្តឈុនបុរី មិនទាន់ទទួលបានការបញ្ជាក់ជាផ្លូវការពីខាងស្ថានទូតកម្ពុជាប្រចាំប្រទេសថៃនៅឡើយ។
មេការកម្មករកម្ពុជា នៅរោងចក្រផលិតអាហាររបស់ក្រុមហ៊ុនជប៉ុនមួយក្នុងខេត្តអយុធ្យា ឋិតនៅភាគខាងជើងទីក្រុងបាងកក អ្នកនាង ធី មុន្ថា និយាយថា កម្មករនៅរោងចក្ររបស់នាងត្រូវបានរឹតបន្ដឹងការធ្វើដំណើរ ដោយហាមមិនឱ្យពួកគេទៅកន្លែងមានការជួបជុំច្រើន រាប់ទាំងទៅទិញម្ហូបអាហារនៅផ្សារក្នុងពេល២សប្តាហ៍ រហូតដល់ថ្ងៃទី៤ ខែមករា។
អ្នកនាងឱ្យដឹងថា នៅរោងចក្រមានកម្មករធ្វើការប្រមាណ៤០០នាក់ រាប់ទាំងកម្មករកម្ពុជា១៤០នាក់ រស់នៅក្នុងអាគារស្នាក់នៅតែមួយ ហើយអ្នកដែលចង់ចេញទៅក្រៅ ចាំបាច់ត្រូវស្នើសុំការអនុញ្ញាត។
អ្នកនាង មុន្ថា ប្រាប់ថា៖ «គឺគេមានបម្រាមដែរ ដូចថា បើសិនជាពលករយើងល្មើសនឹងច្បាប់វិន័យដែលរោងចក្រនីមួយៗបានកំណត់ហ្នឹង គេនឹងត្រូវដាក់ខ្លួន ហើយអត់អាចទទួលបានប្រាក់ឈ្នួលទេ»។