ក្រសួងសុខាភិបាល ប្រកាសថា អ្នកជំងឺកូវីដ១៩ ចំនួន២នាក់ទៀតបានជាសះស្បើយនិងត្រូវបានអនុញ្ញាតឱ្យចេញពីមន្ទីរពេទ្យ ខណៈមិនមានករណីឆ្លងថ្មីក្នុងរយៈពេលប៉ុន្មានថ្ងៃចុងក្រោយនេះ។
សេចក្តីជូនដំណឹងរបស់ក្រសួងសុខាភិបាល នៅថ្ងៃទី២៤ ខែធ្នូ ឆ្នាំ២០២០ បានឱ្យដឹងថា ក្នុងចំណោមអ្នកជាសះស្បើយទាំង២នាក់នោះ មានម្នាក់ជាស្ត្រីអាយុ៣០ឆ្នាំ ជាភរិយារបស់បុរសម្នាក់ដែលធ្វើការនៅក្រសួងមហាផ្ទៃ រស់នៅខណ្ឌច្បារអំពៅ រាជធានីភ្នំពេញ និងជាអ្នកជំងឺឆ្លងក្នុងសហគមន៍ និងម្នាក់ទៀតជាបុរសជនជាតិខ្មែរអាមេរិក អាយុ៥៤ឆ្នាំ ដែលបានធ្វើដំណើរមកពីប្រទេសចិន។
ក្រសួងបន្តថា មិនមានករណីវិជ្ជមានវីរុសកូវីដ១៩ថ្មី នៅថ្ងៃទី២៣ ខែធ្នូ ឆ្នាំ២០២០។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី២៤ ខែធ្នូនេះ កម្ពុជារកឃើញអ្នកឆ្លងជំងឺកូវីដ១៩ សរុប៣៦៣នាក់ ក្នុងនោះព្យាបាលជាសះស្បើយ ចំនួន៣៥១នាក់ និងកំពុងសម្រាកព្យាបាលនៅមន្ទីរពេទ្យ ចំនួន១២នាក់។
ដោយឡែក បើគិតតែរបាយការណ៍ដែលឆ្លងក្នុងព្រឹត្តិការណ៍សហគមន៍២៨វិច្ឆិកាវិញ ក្រសួងថា អ្នកឆ្លងជំងឺកូវីដ១៩ សរុបចំនួន៤១នាក់ ក្នុងនោះបានព្យាបាលជាសះស្បើយ ចំនួន៣៣នាក់ និងកំពុងសម្រាកព្យាបាល ចំនួន៨នាក់៕