ក្រសួងសុខាភិបាល ណែនាំដល់អភិបាលរាជធានី-ខេត្ត ពង្រឹងការគ្រប់គ្រងចត្តាឡីស័កនិងអនុវត្តវិធានការសុខភាពសាធារណៈ ក្នុងនោះ ត្រូវចាត់វិធានការតាមផ្លូវច្បាប់ចំពោះបុគ្គលណាដែលមិនអនុវត្តឬគេចវេះពីការធ្វើចត្តាឡីស័ក។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានលើកឡើងក្នុងលិខិតជូនអភិបាលរាជធានី-ខេត្ត ចុះថ្ងៃទី២៣ ខែធ្នូ ឆ្នាំ២០២០ថា កន្លងមក ការងារទប់ស្កាត់ការរីករាលដាលជំងឺកូវីដ១៩ និងការគ្រប់គ្រងពលករចំណាកស្រុកមកពីប្រទេសថៃ មានលទ្ធផលល្អប្រសើរ។
ប៉ុន្តែក្រសួងថា មានខេត្តខ្លះ ការដាក់ពលករមកពីប្រទេសថៃឱ្យធ្វើចត្តាឡីស័ក អាចមានចំនួនលើសពីបន្ទុកដែលអាចគ្រប់គ្រងបាន ដែលបង្កជាការព្រួយបារម្ភសម្រាប់ការងារគ្រប់គ្រងអ្នកធ្វើចត្តាឡីស័ក។
ករណីនេះ ក្រសួងបានណែនាំដល់អភិបាលរាជធានី-ខេត្ត ត្រូវពង្រឹងការគ្រប់អ្នកអ្នកធ្វើចត្តាឡីស័កឱ្យបានចំនួន១៤ថ្ងៃ និងគ្រប់គ្រងអ្នកដំណើរចូលមកក្នុងប្រទេសកម្ពុជា តាមច្រកអន្តរជាតិនិងតាមច្រករបៀងទាំងអស់នៅតាមព្រំដែនកម្ពុជា-ថៃ ឱ្យបានហ្មត់ចត់បំផុត និងត្រូវអនុវត្តវិធានការសុខភាពសាធារណៈ ព្រមទាំងផ្គត់ផ្គង់អាហារនិងរបស់ប្រើប្រាស់សម្រាប់អ្នកធ្វើចត្តាឡីស័កជាដើម។
ក្រសួងបានសង្កត់ធ្ងន់ថា៖ «ប្រសិនបើបុគ្គលណាមិនគោរពអនុវត្តតាមវិធានការចត្តាឡីស័កចំនួន១៤ថ្ងៃ ឬរត់ចេញ ឬគេចវេះពីការធ្វើចត្តាឡីស័ក អាជ្ញាធរមានសមត្ថកិច្ចនៅនឹងកន្លែង ដោយមានការពិគ្រោះយោបល់ជាមួយអាជ្ញាធរខេត្ត ត្រូវចាត់វិធានការតាមផ្លូវច្បាប់ជាធរមាន ដោយមានការពិន័យអន្តរការណ៍ពី២០ម៉ឺនរៀលទៅ១លានរៀល និងទោសព្រហ្មទណ្ឌទៅតាមច្បាប់កំណត់»។
