ក្រុមអ្នកវិភាគ លើកឡើងថា ការដំឡើងឋានៈលោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ជាបន្តបន្ទាប់ អាចជាការកៀរគរការគាំទ្រពីមហាជន និងជាសញ្ញាឱ្យក្មេងៗជំនាន់ក្រោយត្រៀមបន្តវេនដឹកនាំប្រទេសនៅថ្ងៃអនាគត។
កាលពីថ្ងៃម្សិលមិញ គណបក្សប្រជាជនកម្ពុជា បានចេញសេចក្តីសម្រេចដំឡើងឋានៈកូនប្រុសច្បងលោកនាយករដ្ឋមន្ត្រី ហ៊ុន សែន ជាអនុប្រធានគណៈចលនាមហាជនរបស់គណបក្សកាន់អំណាចមួយនេះ។ ការដំឡើងឋានៈនេះ បន្ទាប់ពីលោកត្រូវបានដំឡើងឱ្យកាន់តំណែងប្រធានចលនាយុវជនរបស់បក្ស កាលពីកន្លះឆ្នាំមុន។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍នៅថ្ងៃព្រហស្បតិ៍នេះថា ការដំឡើងឋានៈនិងតួនាទីថ្មីបន្ថែមទៅឱ្យកូនប្រុសច្បងលោកនាយករដ្ឋមន្ត្រី ហ៊ុន សែន ជាបន្តបន្ទាប់នោះ ដើម្បីជំរុញឱ្យយុវជនជំនាន់ក្រោយបញ្ចេញស្នាដៃជួយដល់សង្គមជាតិ និងកៀរគរសំឡេងគាំទ្រពីមហាជនឱ្យបានកាន់តែច្រើន មុននឹងឈានដល់ការដឹកនាំប្រទេសជាតិនាពេលខាងមុខនេះ។
ទោះជាយ៉ាងណា លោកវិភាគថា ដំណាក់កាលនេះ កូនប្រុសច្បងលោកនាយករដ្ឋមន្ត្រី មិនទាន់លេចធ្លោនៅក្នុងបក្ស ដើម្បីធ្វើឱ្យមហាជនគាំទ្របេក្ខភាពជានាយករដ្ឋមន្ត្រីនៅឡើយ។
លោកមានប្រសាសន៍ថា៖ «ពេលវេលាមិនទាន់អំណោយផល បានន័យថា ការកៀរគរ ប្រជាប្រិយភាពរបស់លោកមិនទាន់លេចធ្លោនៅក្នុងបក្សទេ បានន័យថា មានភាពប្រដំប្រសង អញ្ចឹងការរៀបចំ ការចង្អុលបង្ហាញរបស់មេដឹកនាំបក្ស អាចទៅរួច ការបោះឆ្នោត ការគាំទ្រសមាជបក្ស អាចទៅបាន ប៉ុន្តែវានៅសមត្ថភាពផ្ទាល់នូវការគ្រប់គ្រងឬការគាំទ្រពីមហាជន អញ្ចឹងហើយបានគេរៀបចំតែងតាំងជាឋានៈជាអ្នកដឹកនាំមកបន្ថែមទៀត»។
អ្នកវិភាគ លោក ហង្ស វិទូ មានប្រសាសន៍ថា លោក ហ៊ុន ម៉ាណែត មានសមត្ថភាពនិងចំណេះដឹងខ្ពស់ក្នុងការប្រកួតប្រជែងបេក្ខភាពនាយករដ្ឋមន្ត្រីនៅថ្ងៃអនាគតបាន ដរាបណាលោក ហ៊ុន ម៉ាណែត បញ្ចេញសមត្ថភាពជួយដល់សង្គមនិងប្រជាពលរដ្ឋដែលរងភាពអយុត្តិធម៌ ដើម្បីឱ្យមហាជនកាន់តែមានភាពជឿជាក់និងមានទំនុកចិត្តក្នុងការដឹកនាំ។
ប៉ុន្តែលោក វិទូ បង្ហាញការសោកស្តាយដែលថ្នាក់ដឹកនាំបក្សកាន់អំណាចព្យាយាមដំឡើងឋានៈលោក ហ៊ុន ម៉ាណែត ជាបន្តបន្ទាប់ក្នុងរយៈពេលខ្លី ដែលករណីនេះធ្វើឱ្យមហាជនមើលឃើញថា រដ្ឋាភិបាលព្យាយាមពង្រឹងអំណាចខ្លួនឯង ជាជាងគិតប្រយោជន៍ជាតិជាធំ។
លោកវិភាគថា៖ «ការដំឡើងតំណែងញឹកញាប់ពេក ធ្វើឱ្យមហាជនមើលឃើញថា គាត់ព្យាយាមពង្រឹងអំណាចខ្លួនឯង ហើយលើកកូនលើកចៅឱ្យធ្វើធំគ្រប់គ្នា ប្រជាពលរដ្ឋគាត់មើលឃើញអញ្ចឹង។ អ្នកមានសមត្ថភាពមានច្រើន មិនមែនមានតែកូនលោកនាយករដ្ឋមន្ត្រីទេ។ អញ្ចឹងខ្ញុំយល់ថា ការដំឡើងតំណែងនោះ ទោះបីជាសមត្ថកិច្ចភាពកម្រិតណាក៏ដោយ ក៏គួរតែមានរយៈពេលសមរម្យ មិនមែនក្នុងមួយឆ្នាំដំឡើងពីតំណែងពីរទៅបីតំណែង ខ្ញុំគិតថា វាមិនសមស្របទេ បើសិនជាមើលក្នុងរយៈពេលខ្លីពេក»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ពន្យល់ថា តួនាទីចលនាមហាជនរបស់គណបក្សកាន់អំណាច គឺជាអ្នកផ្សព្វផ្សាយឃោសនាអំពីកម្មវិធីនយោបាយរបស់បក្សឱ្យប្រជាពលរដ្ឋនៅមូលដ្ឋានដើរតាម និងដើរតាមរដ្ឋាភិបាលជាដើម។
អ្នកនាំពាក្យរូបនោះ អះអាងថា ការដំឡើងឋានៈលោក ហ៊ុន ម៉ាណែត ធ្វើឡើងដោយគណៈកម្មាធិការអចិន្ត្រៃយ៍របស់បក្ស ដោយមិនមានការប្រកួតប្រជែងជាមួយសមាជិកបក្សផ្សេងទេ យោងតាមបទបញ្ជាផ្ទៃក្នុងរបស់បក្ស។ ប៉ុន្តែលោកមិនចាប់អារម្មណ៍ការរិះគន់ពីមហាជនដែលថា រដ្ឋាភិបាលគ្រោងរៀបចំឱ្យលោក ហ៊ុន ម៉ាណែត ធ្វើជាបេក្ខភាពនាយករដ្ឋមន្ត្រី នាពេលខាងមុខនោះទេ ព្រោះមានបេក្ខភាពនាយករដ្ឋមន្ត្រី មានយុវជនច្រើននៅក្នុងបក្ស ត្រូវបន្តវេននៅថ្ងៃអនាគត។
លោកមានប្រសាសន៍ថា៖ «រឿងដាក់បេក្ខភាពនាយករដ្ឋមន្ត្រី អាស្រ័យលើការធ្វើមហាសន្និបាតរបស់បក្សទូទាំងប្រទេស លើអង្គការចាត់តាំងខ្ពស់បំផុតរបស់គណបក្ស មិនអាចអ្នកណាដាក់បានតាមតែអំពើចិត្តនោះទេ កុំឱ្យមានការយល់ច្រឡំ។ ថ្ងៃមុនសម្តេច [លោកនាយករដ្ឋមន្ត្រី ហ៊ុន សែន] ក៏បានលើកឡើងមុខសញ្ញាមួយទៀត គឺឯកឧត្តម អូន ព័ន្ធមុន្នីរ័ត្ន ជាមុខសញ្ញាមួយ អញ្ចឹងទេ! ការកសាងយុវជនបន្តវេនដែលគេហៅថាទំពាំងស្នងឫស្សី វាមានមុខសញ្ញាច្រើន យើងធ្វើស្របទៅតាមគោលការណ៍ប្រជាធិបតេយ្យនៅក្នុងបក្សត្រឹមត្រូវ»។
ជាកូនប្រុសច្បងរបស់លោក ហ៊ុន សែន ដែលជាប្រធានគណបក្សកាន់អំណាច លោក ហ៊ុន ម៉ាណែត អាយុ៤៣ឆ្នាំ គឺជាសមាជិកមួយរូបក្នុងចំណោមសមាជិក៣៤រូបនៅក្នុងគណៈអចិន្ត្រៃយ៍នៃគណៈកម្មាធិការកណ្ដាលគណបក្ស មុននឹងត្រូវបានដំឡើងឋានៈថ្មីនេះ។
ជាអ្នកបញ្ចប់ការសិក្សាពីបណ្ឌិតសភាយោធាអាមេរិក West Point លោក ហ៊ុន ម៉ាណែត ត្រូវបានដំឡើងឋានន្តរសក្តិទៅជាឧត្ដមសេនីយ៍ទោនៅឆ្នាំ២០១១ ក្នុងអាយុ៣៤ឆ្នាំ ហើយត្រូវបានដំឡើងទៅជាឧត្ដមសេនីយ៍ឯកផ្កាយ៣ នៅក្នុងរយៈពេល២ឆ្នាំក្រោយមក។
ក្នុងរយៈពេលមិនដល់១ខែផង មុនការបោះឆ្នោតជាតិនៅខែកក្កដា ឆ្នាំ២០១៨ លោក ហ៊ុន ម៉ាណែត ត្រូវបានដំឡើងទៅជាអគ្គមេបញ្ជាការរងកងទ័ព និងជាមេបញ្ជាការកងទ័ពជើងគោកទៀតផង៕