ឧត្ដមសេនីយ៍យោធាផ្កាយ២មួយរូប កំពុងស្ថិតនៅក្រោមការស៊ើបអង្កេតរបស់ក្រុមអធិការកិច្ចកងទ័ព បន្ទាប់ពីមានឈ្មោះជាប់ពាក់ព័ន្ធនឹងជម្លោះដីធ្លីដ៏ហិង្សាជាមួយពលរដ្ឋនៅក្នុងខេត្តព្រះសីហនុកាលពីសប្ដាហ៍មុន ដែលបណ្ដាលឱ្យអ្នកភូមិមួយចំនួនរងរបួស។
ការប៉ះទង្គិចដ៏បង្ហូរឈាមមួយជុំវិញជម្លោះដីធ្លីមួយនៅខេត្តព្រះសីហនុ បានផ្ទុះឡើងកាលពីថ្ងៃអាទិត្យចុងសប្ដាហ៍កន្លងមកនេះ រវាងប្រជាពលរដ្ឋនៅឃុំអូរឧកញ៉ាហេង ស្ថិតក្នុងស្រុកព្រៃនប់ និងក្រុមមនុស្សមួយក្រុមដែលត្រូវបានអ្នកភូមិអះអាងថា ជាបក្ខពួករបស់លោក ភឺន ផល្លា។
ស្នងការនគរបាលខេត្តព្រះសីហនុ លោក ជួន ណារិន បានប្រាប់វីអូឌីកាលពីដើមសប្ដាហ៍នេះថា មនុស្ស៨នាក់ត្រូវបានចាប់ខ្លួននៅអំឡុងការប៉ះទង្គិចនោះ។
ក្នុងវីដេអូផ្សាយផ្ទាល់នៅលើបណ្ដាញសង្គមហ្វេសប៊ុកនៅថ្ងៃអាទិត្យកន្លងមកនេះ ក្រុមពលរដ្ឋជាច្រើននាក់បានរារាំងរថយន្តមួយគ្រឿង ដែលត្រូវបានសមត្ថកិច្ចមួយក្រុមព្យាយាមនាំចេញពីទីតាំងដែលក្រុមពលរដ្ឋអះអាងថាបានផ្ទុះហិង្សា។
បុរសមិនស្គាល់អត្តសញ្ញាណម្នាក់ បាននិយាយនៅក្នុងវីដេអូនោះថា ពលរដ្ឋរង់ចាំមើលចំណាត់ការរបស់សមត្ថកិច្ចទៅលើបក្ខពួករបស់លោក ភឺន ផល្លា ដែលត្រូវបានអះអាងថាជាមេបញ្ជាការរងកងពលតូចលេខ៧០។
ស្នងការនគរបាលខេត្តព្រះសីហនុ លោក ជួន ណារិន ប្រាប់ថា សមត្ថកិច្ចនឹងស៊ើបអង្កេតលើមនុស្សដទៃទៀតដែលពាក់ព័ន្ធនឹងអំពើហិង្សានេះ ប៉ុន្តែលោកបានចុចបិទទូរសព្ទនៅពេលត្រូវបានសាកសួរថា តើនរណាខ្លះត្រូវបានចាប់ខ្លួននៅក្នុងចំណោមមនុស្សទាំង៨នាក់នោះ។
អ្នកភូមិអូរឧកញ៉ាហេង លោក រឹម សាឡែន ប្រាប់វីអូឌីកាលពីដើមសប្ដាហ៍នេះថា អំពើហិង្សាជុំវិញជម្លោះដីធ្លី បានឈានដល់ផ្ទុះអាវុធ៤គ្រាប់ដែលបាញ់ដោយកូនចៅលោក ភឺន ផល្លា ដោយបណ្ដាលឱ្យអ្នកភូមិមួយចំនួនបានរងរបួស។
វីអូឌី មិនអាចស្វែងរកការបកស្រាយពីលោក ភឺន ផល្លា និងមេបញ្ជាការកងពលតូចលេខ៧០ លោក ម៉ៅ សុផាន់ បានទេ គិតត្រឹមថ្ងៃព្រហស្បតិ៍នេះ។
អ្នកនាំពាក្យកងទ័ពជើងគោក លោក ម៉ៅ ផល្លា បានប្រាប់វីអូឌីនៅថ្ងៃនេះថា អង្គភាពកងពលតូចលេខ៧០ បានត្រួតពិនិត្យរួចហើយចំពោះករណីនេះ ហើយលោកថា បញ្ជាការដ្ឋានកងពលតូចលេខ៧០ នឹងអនុវត្តវិន័យកងទ័ពទៅលើលោក ភឺន ផល្លា ប្រសិនបើរកឃើញថា ឧត្ដមសេនីយ៍យោធារូបនេះមានកំហុសមែននោះ។
លោក ម៉ៅ ផល្លា ប្រាប់ថា៖ «ខាងស្ថាប័នច្បាប់ គេនឹងគិតទៅតាមលក្ខន្តិកៈរបស់កងទ័ព ហើយតាមច្បាប់របស់កងទ័ព បើមានរឿងអី គេផ្អែកលើនោះ ដើម្បីគេដាក់ពិន័យយ៉ាងណា គេពិនិត្យមើលជាក់ស្ដែង។ នេះជាក្រុមការងាររបស់ច្បាប់របស់កងទ័ព គេអ្នកធ្វើ»។
លោក កុយ ចាន់ អាយុ២៧ឆ្នាំ បានប្រាប់ថា លោកបានរងរបួសបែកក្បាលនិងត្រូវចំឆ្អឹងជំនីរ ក្រោយពីក្បាលនិងរាងកាយរបស់គាត់បានរងការវាយនឹងវត្ថុរឹង នៅពេលអំពើហិង្សាបានផ្ទុះឡើងនៅម៉ោងជិត៣រសៀល ថ្ងៃទី២០ ខែធ្នូ។ លោកប្រាប់បន្តថា លោកបានងងឹតមុខដួលទៅលើដី ហើយបានព្យាយាមងើបដើរចេញពីកន្លែងហិង្សានោះ។
ខណៈដែលលោកប្រាប់ថា លោកនៅបន្តឈឺក្បាល និងមិនអាចជជែកបានយូរនោះ លោក ចាន់ បានរៀបរាប់ឡើងវិញថា ភ្លាមៗនោះ លោកក៏បានលឺស្នូរគ្រាប់កាំភ្លើងបានផ្ទុះឡើងចំនួន៣គ្រាប់។
អ្នកភូមិរូបនេះប្រាប់ថា លោកមិនបានដឹងពីប្រភេទកាំភ្លើងដែលត្រូវបានប្រើប្រាស់សម្រាប់បាញ់ប្រហារនាពេលនោះទេ ដោយសារលោកងងឹតមុខនិងឈាមហូរចេញពីក្បាលលោក ប៉ុន្តែលោកបញ្ជាក់ថា ស្នូរផ្ទុះគ្រាប់កាំភ្លើងបានលាន់ឮឡើងស្ថិតនៅចម្ងាយប្រហែល៣ម៉ែត្រពីខ្លួនលោក។
លោក កុយ ចាន់ ប្រាប់ថា៖ «ប្រើកាំភ្លើងតើ! បាញ់! ខ្ញុំអត់ដឹង ពេលនោះខ្ញុំរត់ចេញ នៅតែបងៗខ្ញុំគេឃាត់គេអីហ្នឹង។ ពេលវាយហ្នឹង បាញ់ហើយ ប៉ុន្តែមិនដឹងកាំភ្លើងម៉ាកអី។ ឮសូរផ្ទុះ២គ្រាប់ ហើយពេលខ្ញុំរត់ គេបាញ់១គ្រាប់ទៀត។ បាញ់១គ្រាប់ទៀត បានគ្រាប់ខ្ទាតត្រួវជើងខ្ញុំ។ គេបាញ់ហ្នឹងបម្រុងបំបាក់ជើងខ្ញុំឬមួយក៏ម៉េច ខ្ញុំអត់ដឹង ប៉ុន្តែថ្មខ្ទាតមកដីឡើងហុយ»។
បុរសរូបនេះរៀបរាប់បន្តថា៖ «រត់មក ឈាមហូរពេញអស់ហើយ។ ឈាមហូរដោយសារគេវាយ ងើបមករត់រួច គេអូសខ្ញុំទៅវាលស្រែក្រោយឡានគេ។ កាំភ្លើងចម្ងាយខ្ទង់២ទៅ៣ម៉ែត្រ។ មីងខ្ញុំថាបាញ់ពេលគេកំពុងវាយខ្ញុំ តែខ្ញុំអត់ដឹង ឮតែសូរកាំភ្លើង»។
ក្នុងវីដេអូដដែល ប្រជាពលរដ្ឋបានទាមទារទៅសមត្ថកិច្ចដែលចុះទៅអន្តរាគមន៍ដឹកនាំដោយអធិការនគរបាលស្រុកព្រៃនប់ លោក ហួ យ៉ៃ ឱ្យបង្ហាញកាំភ្លើងនិងដំបងដែលត្រូវបានប្រើប្រាស់នៅអំឡុងពេលផ្ទុះអំពើហិង្សានោះ។
មេនគរបាលស្រុកព្រៃនប់ លោក ហួ យ៉ៃ បានប្រាប់ថាជាប់រវល់ប្រជុំ នៅពេលត្រូវបានសាកសួរអំពីភស្តុតាងដែលត្រូវបានប្រមូលយកបានពីកន្លែងកើតហេតុផ្ទុះអំពើហិង្សានោះ។
អ្នកភូមិមួយរូបទៀត លោក សោម ច័ន្ទថុល បានប្រាប់ថា លោកចូលទៅជួយអ្នកភូមិម្នាក់ដែលត្រូវបានគេកាប់ ហើយក្បាលរបស់លោកក៏ត្រូវវាយនឹងវត្ថុរឹងផងដែរ ប៉ុន្តែលោកមិនដឹងថាជាវត្ថុអ្វីនោះឡើយ អំឡុងពេលប៉ះទង្គិចនោះ។ បុរសអាយុ២០ឆ្នាំរូបនេះ ប្រាប់ថា លោកបានប្រកាច់ធាក់ដីនៅកន្លែងផ្ទុះហិង្សា ហើយបានព្យាយាមងើបចេញពីកន្លែងផ្ទុះហិង្សាទាំងស្មារតីវង្វេងវង្វន់។
លោក សោម ច័ន្ទថុល និយាយថា៖ «ខ្ញុំត្រូវក្បាល ពេលនោះ ខ្ញុំឃើញគេហក់កាប់បងអ្នកជិតខាង ខ្ញុំក៏ចូលទៅជួយគេអ៊ីចឹង ក្រោយមកខ្ញុំងាកទៅក្រោយ មិនដឹងត្រូវនឹងស្អីទេ ខ្ញុំក៏ប្រកាច់ធាក់ដីនៅហ្នឹង។ ខ្ញុំមិនដឹងអ្នកណាវាយទេ ព្រោះមនុស្សច្រើនពេក ខ្ញុំដួល ពេលខ្ញុំដួលហ្នឹង ពេលនោះខ្ញុំទប់ជំហរខ្ញុំបាន ប៉ុន្តែខ្ញុំវង្វេងឡើងអត់រួច»។
លោក ច័ន្ទថុល រៀបរាប់បន្តថា៖ «អាវុធហ្នឹង ខ្ញុំឮបាញ់៣គ្រាប់។ ពេលគេបាញ់ហ្នឹង ខ្ញុំបានចូលទៅជួយគាត់ហ្នឹងហើយ។ ដំបូងគេបាញ់១គ្រាប់។ ពេលគេទប់មិនបាន គេបាញ់២គ្រាប់ទៀត បាញ់ទៅលើ២គ្រាប់ និងបាញ់ចុះមកដី១គ្រាប់។ ពេលនោះ មានត្រូវម្នាក់បែកក្បាលដែរ។ ខ្ញុំទៅពេទ្យពេលនោះ»។
អ្នកនាំពាក្យសាលាខេត្តព្រះសីហនុ លោក ឃាង ភារម្យ ប្រាប់ថា លោកសុំមិនធ្វើអត្ថាធិប្បាយជុំវិញអំពើហិង្សានោះទេ ដោយប្រាប់ថា សំណុំរឿងនេះស្ថិតនៅក្រោមចំណាត់ការរបស់តុលាការ។
លោក ឃាង ភារម្យ ប្រាប់ថា៖ «ពាក់ព័ន្ធនឹងអំពើហិង្សាប៉ះទង្គិចគ្នារវាងភាគីទំនាស់នេះ វាផ្ដើមចេញពីរឿងទំនាស់ដីធ្លីហ្នឹង ហើយបច្ចុប្បន្ន សំណុំរឿងនិងការប្រើអំពើហិង្សា កំពុងស្ថិតនៅក្នុងចំណាត់ការស្ថាប័នតុលាការ អ៊ីចឹងអាចសួរទៅអ្នកនាំពាក្យសាលាដំបូងខេត្តដែលលោកកំពុងកាន់សំណុំរឿងហ្នឹង»។
អ្នកនាំពាក្យសាលាដំបូងខេត្តព្រះសីហនុ លោក លឹម ប៊ុនហេង បានប្រាប់វីអូឌីតាមតេឡេក្រាមនៅថ្ងៃនេះថា មនុស្សទាំង៨នាក់នោះត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោសតាមមាត្រា២១៨ និងបទធ្វើឱ្យខូចខាតដោយចេតនាមានស្ថានទម្ងន់ទោសតាមមាត្រា៤១១ នៃក្រមព្រហ្មទណ្ឌ៕
