អាជ្ញាធរសង្កាត់ដង្កោ ខណ្ឌដង្កោ រាជធានីភ្នំពេញ កំពុងរៀបចំបញ្ជីឈ្មោះ ប្រជាពលរដ្ឋដែលរស់នៅលើទីលានចាក់សំរាមនៅក្នុងខណ្ឌនេះ ដើម្បីផ្តល់ជំនួយបន្ទាប់ពីជំនន់ទឹកភ្លៀងបានស្រក។
លោកស្រី សឿង សេរី ចៅសង្កាត់ដង្កោ បានឱ្យដឹងថា អាជ្ញាធរបានសហការជាមួយតំណាងពលរដ្ឋរស់នៅក្នុងគំនរសំរាមក្នុងភូមិតាឡី ដើម្បីកំណត់ចំនួនប្រជាពលរដ្ឋ ហើយបញ្ជូនទៅខណ្ឌដើម្បីបានជំនួយនៅឡើយនាពេលកន្លងមក។
លោកស្រី សឿង សេរី «ខ្ញុំទើបតែឱ្យគាត់(តំណាងពលរដ្ឋ)ស្រង់ស្ថិតិមកឱ្យមីង ទើបធ្វើសំណើ[…]គាត់(តំណាងពលរដ្ឋ)យកគ្រួសារដែលលំបាកហើយអត់ទាន់មានឈ្មោះនៅក្នុងបញ្ចីជាមួយក្រុមគំនរសំរាមគេ យើងធ្វើអញ្ចឹងកុំឱ្យជាន់គ្នា។មីងបានប្រឹងប្រែងទាក់ទងទៅគាត់(តំណាងពលរដ្ឋ)ម្តងហើយដើម្បីធ្វើតារាងឱ្យត្រឹមត្រូវ ច្បាស់លាស់»។
ចៅសង្កាត់ដង្កោ រូបនេះបានបញ្ជាក់ថា ពលរដ្ឋប្រកបរបររើសអេតចាយក្នុងគំនរសំរាមខណ្ឌដង្កោដែលខកខានទទួលជំនួយក្រោយទឹកស្រកដោយសារអាជ្ញាធរមិនមានរបាយការណ៍ស្តីពីការរស់នៅរបស់ពួកគេ។
លោកស្រី សឿង សេរី«ដោយសារកន្លែងហ្នឹង អត់មានរបាយការណ៍ពីណាទៅ។ កន្លែងហ្នឹងជាកន្លែងអង្គការធ្លាប់ជួយគាត់ អញ្ចឹងទៅវានៅដាច់ឡែកពីសហគមន៍ ដាច់ឡែកពីភូមិអត់មានអ្នកណាគ្រប់គ្រង»។
តំណាងពលរដ្ឋ លោក ឃិន សារ៉េត មានប្រសាសន៍ថា ក្រោយទឹកស្រកពលរដ្ឋបានប្រកបរបររើសអេតចាយបន្ត ប៉ុន្តែពួកគាត់កំពុងប្រឈមបញ្ហាជីវភាពនៅឡើយ។
លោក ឃិន សារ៉េត៖«គាត់ចេះតែប្រកបមុខរបរបណ្តើរៗ បើការខ្វះខាតនៅតែខ្វះខាត ព្រោះបើយើងមិនប្រឹងរកវាអត់ អញ្ចឹងចេះតែប្រឹងរកតក់ៗចិងទៅ»
លោក រស់ បុរី ជាពលរដ្ឋ ដែលប្រកបរបររើសអេតចាយ ក្បែរគំនរសំរាម៦ឆ្នាំមកហើយនោះបានត្អូញត្អែរពីបញ្ហាជីវភាពក្រោយពេលទឹកជំនន់ស្រក ដោយសារក្នុងទីលានចាក់សម្រាមមិនមានអេតចាយច្រើនសម្រាប់លោកយកទៅលក់។
លោករស់ បុរី«ឥឡូវមិនសូវសំបួរ(អេតចាយ)ដូចមុន ខ្វះខាតស្បៀង អញ្ជឹងវាលំបាកណាស់»។
ពលរដ្ឋរូបនេះបានបន្ថែមថា បច្ចុប្បន្ន លោកកំពុងស្នាក់នៅក្នុងតង់ក្បែរគំនរសំរាមដោយថាក្នុងអំឡុងពេលដែលទឹកជន់លិច ផ្ទះរបស់លោកបានត្រាំក្នុងទឹកយូថ្ងៃ បណ្តាលឱ្យខូចខាតទាំងស្រុង។
លោករស់ បុរី «ផ្ទះនៅបានព្រោះអីទឹកស្រកទៅវិញ ផ្ទះនៅធម្មតាប៉ុន្តែខូចខាត ពុកឈើ ផ្អៀងផ្ទះ ដំបូលអីធ្លុះធ្លាយ[…] ជួនកាលគេជូយតង់ម្នាក់មួយបានប្រក់បណ្តោះអាសន្ន»។
ស្រដៀងគ្នានេះដែរ លោក សៀង វ៉ាត ជាពលរដ្ឋរស់នៅក្បែរគំនរសំរាមនិយាយថាដោយសារអេតចាយតិចជាងមុនធ្វើឱ្យលោកមានការខ្វះខាត។ លោកបានសំណូមពរឱ្យអាជ្ញាធរជួយដល់រូបលោក និងពលរដ្ឋផ្សេងទៀត។
លោក សៀង វ៉ាត«កន្លែងនេះឥឡូវ វាអត់សូវមាន(អេតចាយ) អត់សូវសំបូរដូចពីមុន ហើយអ្នកខ្វះខាតក៏ខ្វះច្រើន[..]ចង់ឱ្យជួយបងប្អូនចាក់សំរាមទាំងអស់ដែលគាត់កំពុងតែខ្វះខាតជាស្បៀង អង្ករ ទឹកត្រីអីហ្នឹង»។
បើតាម តំណាងពលរដ្ឋលោក ឃិន សារ៉េត បានឱ្យដឹងថាបានឱ្យដឹងថា ប្រជាពលរដ្ឋដែលស្នាក់នៅក្បែរគំនរសំរាមជាអចិន្រ្តៃយ៍ មានចំនួន១២៥គ្រួសារ និងមានពលរដ្ឋចំនួន៥៧០គ្រូសារផ្សេងទៀតជាជនក្រីក្រមកពីតាមបណ្តាខេត្តនានា និងក្នុងរាជធានីភ្នំពេញដោយពួកគេពឹងផ្អែកលើរបររើសអេតចាយក្បែរគំនរសំរាមនេះ។លោកថាដោយសារ ជំនន់ទឺកភ្លៀងក្នុងឆ្នាំនេះមានភាពធ្ងន់ធ្ងជាងឆ្នាំមុនៗ ទើបធ្វើឱ្យពលរដ្ឋទាំងនោះបានបាត់បង់ចំណូល ហើយក៍ប្រឈមនឹងកាខ្វះខាតអាហារផងដែរ៕