មជ្ឈមណ្ឌលសិទ្ធិមនុស្សកម្ពុជា(CCHR)ទាមទារឱ្យរដ្ឋាភិបាល និងក្រុមហ៊ុនមួយចំនួន ឈប់ប្រើប្រព័ន្ធតុលាការ និងកងកម្លាំងប្រដាប់អាវុធគំរាមក្រុមអ្នកមានជម្លោះដីធ្លី ខណៈរកឃើញថា កសិករ ១៨០០គ្រួសារបាត់បង់ដីស្រែចម្ការពាក់ព័ន្ធនឹងទំនាស់ដីធ្លីជាមួយក្រុមហ៊ុន៥ ដែលទទួលបានដីសម្បទានពីរដ្ឋាភិបាលសម្រាប់វិនិយោគ។
ការទាមទាររបស់CCHRនេះ ធ្វើឡើងតាមរយៈសេចក្តីប្រកាសព័ត៌មានស្តីពីធុរកិច្ច និងសិទ្ធិមនុស្ស គណនេយ្យភាពសាជីវកម្មចំពោះការរំលោភបំពានសិទ្ធិដីធ្លី ចេញផ្សាយថ្ងៃទី២៥ ខែធ្នូ។
អង្គការសិទ្ធិមនុសុ្សមួយនេះ និយាយថា ការរំលោភបំពានដីធ្លីដែលមានលក្ខណៈជាប្រព័ន្ធ គឺជាបញ្ហាមួយក្នុងចំណោមបញ្ហាសិទ្ធិមនុស្សនានា ដែលកើតឡើងជាញឹកញាប់ក្នុងយុគសម័យទំនើបបច្ចុប្បន្ន។
អង្គការនេះបន្តថា ផ្នែកមួយដ៏សំខាន់នេះ គឺជាការលំបាកក្នុងការបញ្ចុះបញ្ចូលក្រុមហ៊ុននានាឱ្យធានានូវគណនេយ្យភាពចំពោះផលប៉ះពាល់លើសិទ្ធិមនុស្សរបស់ខ្លួន ដែលថា ក្រុមហ៊ុនតែងត្រូវបានចោទប្រកាន់អំពីការរឹបអូសយកដី ការបណ្តេញចេញដោយបង្ខំ និងការមិនគោរពសិទ្ធិដីធ្លីរបស់ជនជាតិដើមភាគតិចជាដើម។
អង្គការនេះ គូសបញ្ជាក់ថា តាមការសិក្សាលើក្រុមហ៊ុនចំនួន៥ ដែលទទួលបានដីសម្បទានសេដ្ឋកិច្ចពីរដ្ឋាភិបាល ធ្វើឱ្យពលរដ្ឋ១៨០០គ្រួសារបាត់បង់ដីស្រែចម្ការ។
អ្នកសម្របសម្រួលគម្រោងធុរកិច្ច និងសិទ្ធិមនុស្សមជ្ឈមណ្ឌលនេះ គឺលោក វណ្ណ សុផាត មានប្រសាសន៍បន្ថែមថា កត្តាចម្បងនៃបញ្ហានេះ វាបានកើតឡើងមកពីកង្វះការប្តេជ្ញាចិត្តចូលរួមជំរុញឱ្យមានតម្លាភាពពីសំណាកអាជ្ញាធរ និងស្ថាប័នពាក់ព័ន្ធ។
លោកថា មួយវិញទៀត ក្រុមហ៊ុនខ្វះការទទួលខុសត្រូវ ធានានូវគណនេយ្យភាព ដោយសំអាងតែលើសិទ្ធិអនុញ្ញាតពីរដ្ឋាភិបាលចាប់ផ្តើមឈូសឆាយយកតែម្តង ឬប្រើប្រព័ន្ធតុលាការ និងកងកម្លាំង ចុះបង្ក្រាប ឬបណ្តេញចេញ ដើម្បីបើកផ្លូវគម្រោងវិនិយោគដោយឈរលើស្មារតីដោះស្រាយផលប៉ះពាល់ជាក់ស្តែង។
លោក វណ្ណ សុផាត ប្រាប់ថា៖ «ទី៧ ពេលដែលសហគមន៍តស៊ូមតិដើម្បីស្វែងរកដំណោះស្រាយគឺមានការគំរាមកំហែង រារាំង បំភិតបំភ័យ ឬក៏ចោទប្រកាន់តាមផ្លូវតុលការចាប់ពួកគាត់ដាក់ពន្ធនាគារជាដើម ដែលភាគច្រើនប៉ះពាល់ទៅលើស្ត្រី»។
លោក វណ្ណ សុផាត មានប្រសាសន៍ទៀតថា រាល់ការដាក់បណ្តឹងរបស់ពលរដ្ឋទៅអាជ្ញាធរពាក់ព័ន្ធដើម្បីស្វែងរកដំណោះស្រាយ គ្មានប្រសិទ្ធិភាពទេ តែពួកគេច្រើនតែរងបណ្តឹងបកវិញថា ជាអ្នកញុះញង់ ឬអាជ្ញាធរបញ្ចេញកម្លាំងរារាំង ឬចាប់ខ្លួន ពេលពួកគេចេញតស៊ូមតិស្វែងរកដំណោះស្រាយពីក្រសួងពាក់ព័ន្ធនៅថ្នាក់ជាតិ។
អ្នកសម្របសម្រួលរូបនេះ គូសបញ្ជាក់ថា ពលរដ្ឋ ១៨០០គ្រួសារនេះ ខ្លះបានបាត់បង់ដីតាំងពីឆ្នាំ២០០៦ ហើយបច្ចុប្បន្នមិនទាន់មានដំណោះស្រាយនៅឡើយ ខណៈខ្លួនសិក្សាទៅលើក្រុមហ៊ុន៥ ដូចជាក្រុមហ៊ុនចម្ការកៅស៊ូ សុកហ្វីន ខេ ស៊ី ឌី នៅខេត្តមណ្ឌលគិរី ក្រុមហ៊ុនមួយនៅខេត្តឧត្តរមានជ័យ តំបន់សេដ្ឋកិច្ចពិសេសក្នុងខេត្តពោធិ៍សាត់ និង២ទៀតនៅខេត្តកោះកុង។
អ្នកនាំពាក្យក្រសួងដែនដី នរគរូបនីយកម្ម និងសំណង់ លោក សេង ឡូត មានប្រសាសន៍ថា លោកនឹងឆ្លើយតប ក្រោយពីអានសេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជានេះចប់៕
