រដ្ឋាភិបាលបានសម្រេចកាត់ដីបឹងតាមោកជាង២០០ហិកតាបន្ថែមទៀត ប្រគល់ទៅឱ្យបុគ្គលឯកជនដើម្បីគ្រប់គ្រងជាកម្មសិទ្ធិ។
យោងតាមលិខិតរបស់រដ្ឋលេខាធិការទីស្តីការគណៈរដ្ឋមន្ត្រី លោក កែន សត្ថា ដែលផ្ញើទៅរដ្ឋមន្ត្រីក្រសួងធនធានទឹក ក្រសួងរៀបចំដែនដី ក្រសួងសេដ្ឋកិច្ច និងអភិបាលរាជធានីភ្នំពេញ កាលពីថ្ងៃទី២៤ ខែធ្នូ ឆ្នាំ២០២០ បានលើកឡើងថា ចំពោះសំណើដែលក្រសួងនិងស្ថាប័នទាំងនោះស្នើសុំកាត់ឆ្វៀលដីទំហំ២៧៥ហិកតា ចេញពីផ្ទៃដីបឹងតាមោក (បឹងកប់ស្រូវ) ក្នុងសង្កាត់ពញាពន់ ខណ្ឌព្រែកព្នៅ រាជធានីភ្នំពេញ រដ្ឋាភិបាលបានយល់ព្រមអនុញ្ញាតឱ្យកាត់ផ្ទៃដីតែទំហំជាង១៩៦ហិកតាប៉ុណ្ណោះ ដើម្បីធ្វើប្រទានកម្មទៅឱ្យលោកស្រី អ៊ុយ បូរី និងលោកស្រី គង់ សុធី ដើម្បីគ្រប់គ្រងជាកម្មសិទ្ធិ។
លិខិតដដែលនោះពុំបានបញ្ជាក់ពីតួនាទីរបស់លោកស្រី អ៊ុយ បូរី និងលោកស្រី គង់ សុធី និងថាតើការកាត់ដីបឹងនោះយកទៅអភិវឌ្ឍសម្រាប់ធ្វើអ្វីនោះដែរ។
ដោយឡែក លិខិតមួយទៀតរបស់រដ្ឋលេខាធិការទីស្តីការគណៈរដ្ឋមន្ត្រី លោក កែន សត្ថា ផ្ញើទៅរដ្ឋមន្ត្រីក្រសួងពាក់ព័ន្ធ និងអភិបាលរាជធានីភ្នំពេញ កាលពីថ្ងៃទី២៣ ខែធ្នូ ឆ្នាំ២០២០ ឱ្យដឹងដែរថា រដ្ឋាភិបាលបានអនុញ្ញាតឱ្យកាត់ផ្ទៃដីបឹងតាមោកទំហំ២០ហិកតាទៀត នៅសង្កាត់គោករកា ខណ្ឌព្រែកព្នៅ ទៅឱ្យលោក លន់ ហាក់ និងអ្នកស្រី ឈុន ចាន់ធី ដើម្បីជាការដោះដូរ ដីទំហំជាង១ ៥៧១ម៉ែត្រក្រឡា ស្ថិតនៅសង្កាត់ស្រះចក ខណ្ឌដូនពេញ របស់បុគ្គលទាំងពីររូបនេះ។
លិខិតដដែលបញ្ជាក់ថា ការដោះដូរដីនេះ គឺដើម្បីសាងសង់អគារទីបញ្ជាការស្រាលនៅលើដីទំហំជាង១ ៥៧១ម៉ែត្រក្រឡា ជូនរដ្ឋបាលរាជធានីភ្នំពេញ។
វីអូឌី មិនអាចសុំការបញ្ជាក់បន្ថែមពីលោក កែន សត្ថា ពាក់ព័ន្ធនឹងការកាត់ផ្ទៃដីបឹងតាមោកនេះបានទេ នៅថ្ងៃចន្ទនេះ។
អ្នកនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍ថា លោកពុំបានដឹងទេថា តើរដ្ឋកាត់ផ្ទៃដីបឹងតាមោកទៅឱ្យបុគ្គលឯកជនសម្រាប់អភិវឌ្ឍអ្វីនោះទេ ដោយលោកបង្វែរសំណួរនេះទៅរដ្ឋបាលរាជធានីភ្នំពេញ ឬក្រសួងសេដ្ឋកិច្ច និងក្រសួងដែនដី រួមទាំងស្ថាប័នពាក់ព័ន្ធផ្សេងទៀត។
លោកថា៖ «ជាគោលការណ៍ នៅក្នុងការធ្វើលទ្ធកម្មកាត់ឆ្វៀលដីសាធារណៈរបស់រដ្ឋមួយទៅឱ្យអ្នកណាហ្នឹង ជាសម្បទានឬដោះដូរឱ្យអ្នកណាហ្នឹង តែងតែមានប្រជុំអន្តរក្រសួង»។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សុំមិនធ្វើអត្ថាធិប្បាយចំពោះរឿងនេះ។
លោកថា៖ «ក្រសួងសេដ្ឋកិច្ចគ្រាន់តែដឹងឮរឿងការបង់ពន្ធ ប៉ុន្តែការគ្រប់គ្រងអីស្ថិតនៅលើក្រសួងម្ចាស់សាម៉ី»។
រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ មានប្រសាសន៍ថា លោកបានឃើញលិខិតជុំវិញការកាត់បឹងតាមោកនេះហើយ ប៉ុន្តែលោកសុំមិនធ្វើអត្ថាធិប្បាយលម្អិត ដោយឱ្យសួរទៅខាងរដ្ឋបាលរាជធានីភ្នំពេញវិញ។
លោកថា៖ «ជាធម្មតាទេ បឹងវាមានសារៈប្រយោជន៍ ប៉ុន្តែបឹងមួយចំនួនមានសារៈប្រយោជន៍ទាបជាងការអភិវឌ្ឍ អ៊ីចឹងគេអាចថ្លឹងថ្លែងមើលកន្លែងណាដែលចំណេញ កន្លែងណាដែលខាត មិនមែនបឹងទាំងអស់ហ្នឹងលុបមិនបានទេ។ ទាល់តែមើលពីការសិក្សាច្បាស់លាស់ តើបឹងហ្នឹងមានសារៈប្រយោជន៍ទេ? បើមានសារៈប្រយោជន៍ ត្រូវរក្សាទុកជាបឹង ប៉ុន្តែបើអត់ គេអាចមានវិធានការធ្វើការអភិវឌ្ឍ»។
វីអូឌី មិនអាចសុំការអត្ថាធិប្បាយពីអភិបាលរាជធានីភ្នំពេញ លោក ឃួង ស្រេង បានទេ ជុំវិញរឿងនេះ ខណៈអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី ប្រាប់ថាជាប់រវល់។
នាយកប្រតិបត្តិអង្គការសមធម៌កម្ពុជា លោក អៀង វុទ្ធី ស្នើទៅរដ្ឋាភិបាលនិងក្រសួងពាក់ព័ន្ធធ្វើការពិចារណាឡើងវិញពីការលុបបឹងធម្មជាតិ ព្រោះបឹងនេះមានសារៈសំខាន់សម្រាប់រំដោះទឹកពីរាជធានីភ្នំពេញ ខណៈកន្លងមក លោកសង្កេតឃើញតំបន់ខ្លះក្នុងរាជធានីភ្នំពេញបានរងនូវការជន់លិច ក្រោយពីមានការលុបបឹងធម្មជាតិជាបន្តបន្ទាប់។
លោកថា៖ «ក្រៅអំពីស្តុបទឹកនិងរក្សាផលប៉ះពាល់ដែលអាចកើតឡើងពីទឹកជំនន់ បឹងដើរតួនាទីសំខាន់ទៅដល់ជីវភាពប្រជាពលរដ្ឋរាប់រយគ្រួសារដែលរស់នៅជុំវិញហ្នឹង ដូចជា ប្រើប្រាស់ទឹក នេសាទ និងដំាបន្លែ ជាដើម។ មួយទៀត វាជាសោភ័ណភាពទីក្រុង អាចបង្កើនបរិយាកាសល្អ វាធ្វើឱ្យប្រជាពលរដ្ឋមានសុខភាពល្អ បើយើងមើលទៅប្រទេសផ្សេងៗ ដូចជាវៀតណាម និងប្រទេសផ្សេងទៀត គឺបឹងនៅកណ្ដាលទីក្រុង គេរក្សាបឹងទាំងអស់ហ្នឹងជាកន្លែងលំហទីក្រុង ដើម្បីឱ្យមានខ្យល់ឱកាសចេញចូលល្អនិងមានសោភ័ណភាព»។
កាលពីដើមខែកុម្ភៈ ឆ្នាំ២០១៦ រដ្ឋាភិបាលកម្ពុជា បានចេញអនុក្រឹត្យស្ដីពីការកំណត់ផ្ទៃបឹងតាមោក ជាសម្បតិ្តរបស់រដ្ឋ ដែលមានផ្ទៃដីសរុបប្រមាណ៣ ២៣៩ហិកតា សម្រាប់ស្តុកទឹកកខ្វក់និងរំដោះទឹកចេញពីរាជធានីភ្នំពេញ។
បើតាមលិខិតរបស់រដ្ឋាភិបាលជាបន្តបន្ទាប់ ចាប់តាំងពីឆ្នាំ២០១៨ ដល់ឆ្នាំ២០២០ ផ្ទៃបឹងតាមោកប្រហែល១ ០០០ហិកតាហើយ ត្រូវបានរដ្ឋាភិបាលកាត់និងដោះដូរទៅឱ្យស្ថាប័នរដ្ឋនិងក្រុមហ៊ុនឯកជន សម្រាប់សាងសង់អគារនិងហេដ្ឋារចនាសម្ព័ន្ធផ្សេងៗ។
របាយការណ៍ដែលចេញផ្សាយដោយសមាគមធាងត្នោត កាលពីថ្ងៃទី២៦ ខែធ្នូ ឆ្នាំ២០១៩ បង្ហាញថា បឹងធម្មជាតិទាំងអស់នៅរាជធានីភ្នំពេញ កំពុងប្រឈមនឹងការចាក់ដីលុបអស់ទាំងស្រុង។ របាយការណ៍បញ្ជាក់ថា គិតចាប់ពីឆ្នាំ១៩៩០មក បឹងចំនួន១៦ហើយត្រូវបានចាក់ដីលុបទាំងស្រុង ខណៈបឹងចំនួន១០ទៀតត្រូវគេចាក់លុបមួយផ្នែកៗជាបណ្ដើរៗ៕