មន្ត្រីកម្ពុជាអះអាងថា ស្ថានទូតកម្ពុជាប្រចាំប្រទេសថៃកំពុងសម្របសម្រួលជាមួយអាជ្ញាធរថៃ ឱ្យបញ្ជូនត្រឡប់មកកម្ពុជាវិញនូវពលករខ្មែរ១១នាក់ដែលត្រូវបានសមត្ថកិច្ចថៃចាប់ខ្លួន។
យោងទៅតាមកាសែតបាំងកកប៉ុស្តិ៍ ពលករកម្ពុជាចំនួន១១នាក់ និងជនជាតិចិនម្នាក់ ត្រូវបានតម្រួតថៃចាប់ខ្លួនក្នុងអគារកែច្នៃដែលជារោងចក្រតូចមួយពាក់ព័ន្ធនឹងការផលិតសម្ភារពេទ្យ ដែលគ្មានការអនុញ្ញាត ស្ថិតនៅស្រុកឡាំលោកា ក្នុងខេតផាធុមថានី កាលពីថ្ងៃសៅរ៍ចុងសប្ដាហ៍កន្លងមកនេះ។
ប្រភពដដែលបានឱ្យដឹងថា ជនជាតិចិននិងពលករខ្មែរអស់ទាំងនោះបានចូលមកធ្វើការក្នុងប្រទេសថៃដោយខុសច្បាប់។
អ្នកនាំពាក្យក្រសួងការបរទេសកម្ពុជា លោក កុយ គួង បានឱ្យដឹងថា ស្ថានទូតកម្ពុជាប្រចាំប្រទេសថៃ កំពុងតាមដាននិងសហការជាមួយអាជ្ញាធរថៃ ដើម្បីដោះស្រាយករណីនេះហើយ។
អ្នកនាំពាក្យរូបនេះនិយាយទៀតថា ពលករទាំង១១នាក់នោះត្រូវបានបញ្ជូនទៅតុលាការជាមុនសិន ទើបបញ្ជូនមកកម្ពុជាតាមក្រោយ។ លោកបន្តថា តុលាការបានចោទប្រកាន់ពួកគេពីបទចូលទៅប្រទេសថៃដោយខុសច្បាប់។
លោកបញ្ជាក់ថា ដំណើរការកាត់ក្ដីនៅតុលាការប្រហែលជាមិនត្រូវប្រើពេលយូរនោះទេ ហើយពួកគេនឹងត្រូវបញ្ជូនមកកម្ពុជាវិញក្នុងរយៈពេលឆាប់ៗនេះ។
តួលេខផ្ដល់ឱ្យដោយអគ្គនាយកដ្ឋានអន្តោប្រវេសន៍កម្ពុជា បង្ហាញថា ពលរដ្ឋខ្មែរ៤៦នាក់ ក្នុងនោះមានស្ត្រី១៦នាក់ ត្រូវបានសមត្ថកិច្ចថៃចាប់បញ្ជូនមកកម្ពុជាវិញ នៅចន្លោះថ្ងៃទី២០ ដល់ថ្ងៃទី២៨ ខែធ្នូនេះ៕