រដ្ឋាភិបាលសម្រេចអនុញ្ញាតឱ្យគ្រឹះស្ថានសិក្សាឯកជនបើកដំណើរការឡើងវិញចាប់ពីថ្ងៃនេះទៅ ខណៈការបើកបវេសនកាលឆ្នាំសិក្សាថ្មីសម្រាប់គ្រឹះស្ថានចំណេះទូទៅសាធារណៈ (សាលារដ្ឋ) នឹងធ្វើឡើងនៅថ្ងៃទី១១ ខែមករា ខាងមុខ។
នៅក្នុងការថ្លែងសារពិសេសតាមវីដេអូក្នុងទំព័រហ្វេសប៊ុកនៅថ្ងៃនេះ លោកនាយករដ្ឋមន្ត្រី ហ៊ុន សែន បានប្រកាសឱ្យក្រសួងអប់រំ យុវជន និងកីឡា កំណត់យកថ្ងៃទី១១ ខែមករា ឆ្នាំ២០២១ សម្រាប់បើកបវេសនកាលឆ្នាំសិក្សាថ្មី ស្របពេលព្រឹត្តិការណ៍នៃការឆ្លងជំងឺកូវីដ១៩ក្នុងសហគមន៍២៨វិច្ឆិកា ត្រូវបានបិទបញ្ចប់នៅថ្ងៃនេះ។
លោកនាយករដ្ឋមន្ត្រី ហ៊ុន សែន បានបន្តថា ក្នុងដំណាក់កាលដែលកម្ពុជាមានករណីឆ្លងជំងឺកូវីដ១៩នេះ បានធ្វើឱ្យមានផលប៉ះពាល់ខ្លាំងដល់វិស័យអប់រំ ក្នុងនោះបានតម្រូវឱ្យសិស្សរៀនតាមប្រព័ន្ធអនឡាញនិងមធ្យោបាយមួយចំនួនទៀត។
ជាមួយគ្នានេះដែរ លោកក៏បានទទួលស្គាល់ដែរថា ការសិក្សាតាមប្រព័ន្ធអនឡាញហាក់មិនសូវមានប្រសិទ្ធភាពនោះទេ ដោយសារសិស្សមួយចំនួនចាប់មេរៀនមិនសូវបាន និងសិស្សខ្លះងងុយគេងក្នុងពេលរៀន ជាដើម។
ភ្លាមៗនេះដែរ ក្រសួងអប់រំ យុវជន និងកីឡា ក៏បានចេញសេចក្តីជូនដំណឹងមួយដោយកំណត់យកថ្ងៃទី១១ ខែមករា ឆ្នាំ២០២០ ជាថ្ងៃបរិច្ឆេទនៃការបើកបវេសនកាលឆ្នាំសិក្សា២០២០-២០២១ សម្រាប់គ្រឹះស្ថានសិក្សាចំណេះទូទៅសាធារណៈ និងបានអនុញ្ញាតឱ្យគ្រឹះស្ថានសិក្សាឯកជនបើកដំណើរការឡើងវិញផងដែរចាប់ពីថ្ងៃនេះ។
ក្រសួងបន្តថា ការអនុញ្ញាតនេះសំដៅលើគ្រឹះស្ថានសិក្សាឯកជនដែលទទួលបានការអនុញ្ញាតឱ្យដំណើរការឡើងវិញក្នុងដំណាក់កាលទី១ និងទី២។
ក្រសួងអប់រំ ក៏បានតម្រូវឱ្យគ្រប់គ្រឹះស្ថានសិក្សាទាំងរដ្ឋនិងឯកជន ត្រូវបន្តអនុវត្តគោលការណ៍ប្រតិបត្តិស្តង់ដារក្នុងបរិបទកូវីដ១៩ និងរក្សាគម្លាតសុវត្ថិភាពសង្គមនិងបុគ្គល និងក្នុងករណីចាំបាច់ត្រូវពាក់ម៉ាស់ការពារនៅក្នុងបរិវេណគ្រឹះស្ថានសិក្សា៕
