នាយករដ្ឋមន្ត្រី នៅថ្ងៃនេះ ប្រកាសបិទបញ្ចប់ព្រឹត្តិការណ៍សហគមន៍២៨វិច្ឆិកា ដោយសារកម្ពុជា បានគ្រប់គ្រងស្ថានការណ៍នៃការឆ្លងជំងឺកូវី១៩បាន និងពុំមានរកឃើញករណីឆ្លងក្នុងសហគមន៍ថ្មីក្នុងរយៈពេល១៤ថ្ងៃកន្លងមកនេះ។
តាមរយៈការថ្លែងសារវីដេអូពិសេសមួយនៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានថ្លែងថា ព្រឹត្តិការណ៍សហគមន៍២៨វិច្ឆិកា ត្រូវប្រកាសបិទបញ្ចប់ដោយសារមូលហេតុសំខាន់ៗចំនួន៣។
លោកនាយករដ្ឋមន្ត្រី បានលើកឡើងនូវមូលហេតុទាំងនោះថា ដោយសារកម្ពុជាអាចគ្រប់គ្រងបានហើយសម្រាប់ព្រឹត្តិការណ៍២៨វិច្ឆិកា ដោយមិនមានរកឃើញអ្នកជំងឺកូវីដ១៩ថ្មីក្នុងរយៈពេល១៤ថ្ងៃ ខណៈអ្នកជំងឺក្នុងព្រឹត្តិការណ៍នេះបានជាសះស្បើយជាបន្តបន្ទាប់ដែលនៅសល់តែ៣នាក់កំពុងព្យាបាល ហើយក្រៅពីនោះ អ្នកដែលត្រូវយកសំណាកទៅធ្វើតេស្តនៅសល់តែ៨នាក់ដែលពុំមានហានិភ័យនៃការឆ្លង។
ចំពោះពលករខ្មែរដែលត្រឡប់មកពីប្រទេសថៃ ចាប់តាំងពីមានការផ្ទុះជំងឺកូវីដ១៩នៅប្រទេសថៃ កាលពីថ្ងៃទី២០ ខែធ្នូ ឆ្នាំ២០២០នោះ មកដល់ពេលនេះ លោកនាយករដ្ឋមន្ត្រី ហ៊ុន សែន បញ្ជាក់ថា ក៏ពុំទាន់រកឃើញថា មានការឆ្លងជំងឺនេះមកពីប្រទេសជិតខាងដែរ។
លោកបានគូសបញ្ជាក់ថា៖ «បើទោះថ្ងៃនេះយើងបិទបញ្ចប់ព្រឹត្តិការណ៍២៨វិច្ឆិកាក៏ពិតមែន ក៏ប៉ុន្តែមិនមែនមានន័យថា កូវីដត្រូវបានបញ្ចប់ទេ បញ្ហាកូវីដអត់ទាន់ចប់ទេ ប្រហែសតែបន្តិចគឺកើតរឿង»។
លោកនាយករដ្ឋមន្ត្រី ហ៊ុន សែន ក៏បានក្រើនរំឭកជាថ្មីនូវវិធានការការពារការឆ្លងជំងឺកូវីដ១៩ផងដែរ ជាពិសេសត្រូវអនុវត្តនូវវិធានការ៣ការពារ រួមមាន ពាក់ម៉ាស់ លាងដៃ និងរក្សាគម្លាតសុវត្ថិភាព១ម៉ែត្រកន្លះឡើង ហើយក្រៅពីនោះ អ្នកដែលត្រូវធ្វើចត្តាឡីស័កក៏ត្រូវអនុវត្តឱ្យបានគ្រប់១៤ថ្ងៃ។
បើតាមការជូនដំណឹងរបស់ក្រសួងសុខាភិបាលនៅថ្ងៃទី២៩ ខែធ្នូ ឆ្នាំ២០២០នេះ អ្នកជំងឺកូវីដ១៩ដែលបានរកឃើញក្នុងព្រឹត្តិការណ៍សហគមន៍២៨វិច្ឆិកា មានចំនួន៤១នាក់ ក្នុងនោះបានព្យាបាលជាសះស្បើយចំនួន៣៨នាក់ ខណៈសំណាកដែលត្រូវធ្វើតេស្តរកជំងឺកូវីដ១៩នៅសល់ចំនួន៨សំណាក ក៏មានលទ្ធផលអវិជ្ជមានទាំងអស់។
គិតមកដល់ព្រឹកថ្ងៃទី២៩ ខែធ្នូ ឆ្នាំ២០២០នេះ កម្ពុជាបានរកឃើញអ្នកជំងឺកូវីដ១៩ សរុបចំនួន៣៦៤នាក់ ក្នុងនោះបានព្យាបាលជាសះស្បើយចំនួន៣៦០នាក់ និងកំពុងសម្រាកព្យាបាលនៅមន្ទីរពេទ្យចំនួន៤នាក់៕
