សមត្ថកិច្ចរាជធានីភ្នំពេញ បានឱ្យដឹងថា សមត្ថកិច្ចជំនាញកំពុងស្រាវជ្រាវនិងស្វែងរកចាប់ខ្លួនខ្មាន់កាំភ្លើងម្នាក់ដែលបានបាញ់ប្រហារសម្លាប់មន្ត្រីនគរបាលមួយរូប កាលពីយប់រំលងអធ្រាត្រឈានចូលថ្ងៃពុធនេះ នៅក្នុងខណ្ឌពោធិ៍សែនជ័យ។
របាយការណ៍នគរបាលខណ្ឌពោធិ៍សែនជ័យ បានឱ្យដឹងថា មន្ត្រីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ លោក រ៉េត ស៊ីណែត អាយុ៣៩ឆ្នាំ ត្រូវបានខ្មាន់កាំភ្លើងបាញ់២គ្រាប់ចំដងខ្លួន និង១គ្រាប់ចំក្បាល បណ្ដាលឱ្យស្លាប់នៅទីកន្លែងកើតហេតុ តាមបណ្ដោយផ្លូវសហព័ន្ធរុស្ស៊ី នៅមុខព្រលានយន្តហោះអន្តរជាតិភ្នំពេញ នៅវេលាម៉ោង១២យប់ឈានចូលថ្ងៃពុធ ក្រោយពីមានទំនាស់ជុំវិញបញ្ហាគ្រោះថ្នាក់ចរាចរណ៍។
មេបញ្ជាការកងរាជអាវុធហត្ថរាជធានីភ្នំពេញ លោក រ័ត្ន ស៊្រាង បានប្រាប់វីអូឌីនៅថ្ងៃនេះថា កម្លាំងអាវុធហត្ថកំពុងស្រាវជ្រាវរកអត្តសញ្ញាណខ្មាន់កាំភ្លើង ដើម្បីចាប់ខ្លួនយកមកផ្ដន្ទាទោសទៅតាមច្បាប់។
របាយការណ៍របស់សមត្ថកិច្ចដដែលនោះ បញ្ជាក់ថា ខ្មាន់កាំភ្លើងបានបើកបររថយន្ត Lexus RX300 មួយគ្រឿង ពាក់ស្លាកលេខ «សៀមរាប 2A 4546» ហើយរថយន្តនោះបានប៉ះគ្នាជាមួយរថយន្តរបស់ជនរងគ្រោះ។
មេប៉េអឹមរាជធានីភ្នំពេញ បានឱ្យដឹងផងដែរថា សមត្ថកិច្ចបានរកឃើញស្លាកលេខរថយន្តដែលខ្មាន់កាំភ្លើងបើកបរហើយ ប៉ុន្តែលោកបដិសេធបកស្រាយលម្អិត ដោយថា វាស្ថិតក្នុងដំណាក់កាលនៃការស៊ើបអង្កេតរបស់សមត្ថកិច្ច។
លោក រ័ត្ន ស៊្រាង មានប្រសាសន៍ថា៖ «ជាទូទៅ រឿងខ្លះ យើងចេះតែយល់ច្រឡំ ខ្ញុំឃើញបងប្អូនយើងគាត់ចេះតែថា សមត្ថកិច្ចស្ងាត់ៗ អត់ធ្វើការ តាមពិតសមត្ថកិច្ចគេអត់ដែលបណ្តោយរឿងបទឧក្រិដ្ឋណាមួយដល់ថ្នាក់មិនធ្វើទេ គេធ្វើ គេតាមណាស់! ប៉ុន្តែគេមិនផ្សាយលើហ្វេសប៊ុកកំពុងធ្វើអ្វីៗទេ ជាទូទៅ វិជ្ជាជីវៈរបស់សមត្ថកិច្ច គេធ្វើដោយស្ងប់ស្ងាត់ៗ»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានឱ្យដឹងថា ការបាញ់ប្រហារនេះកើតចេញពីទំនាស់គ្រោះថ្នាក់ចរាចរណ៍ មិនមែនជារឿងគំនុំនោះទេ។
អ្នកនាំពាក្យរូបនេះប្រាប់ទៀតថា សមត្ថកិច្ចកំពុងសហការគ្នាជាមួយស្ថាប័នជំនាញ ដើម្បីចាប់ខ្មាន់កាំភ្លើងមកផ្តន្ទាទោសតាមច្បាប់ ខណៈបច្ចុប្បន្ននេះ សមត្ថកិច្ចបានកំណត់អត្តសញ្ញាណជនល្មើសបានខ្លះហើយ។ ប៉ុន្តែសមត្ថកិច្ចមិនអាចបង្ហាញអត្តសញ្ញាណជាសាធារណៈនោះទេ ខ្លាចប៉ះពាល់ដល់នីតិវិធីនៃការស៊ើបអង្កេត។
លោក សាន សុខសីហា មានប្រសាសន៍ថា៖ «ឃាតករ ជនបង្ក យើងឃើញផ្លាកលេខដែលប្រើប្រាស់រថយន្តហ្នឹងហើយ ប៉ុន្តែគ្រាន់តែថា ការប្រើប្រាស់រថយន្ត យើងគ្រាន់តែដឹងថា យើងមិនដឹងថាជារថយន្តម្ចាស់ដើមឬក៏លក់អីយ៉ាងម៉េច យើងអត់ទាន់ថាម៉េច អ្នកជំនាញកំពុងធ្វើការ ដុតដៃដុតជើង ដើម្បីស្វែងរកឃាតករ ជនបង្ក»។
របាយការណ៍របស់នគរបាលខណ្ឌពោធិ៍សែនជ័យ បានឱ្យដឹងទៀតថា ខ្មាន់កាំភ្លើងបានប្រើប្រាស់កាំភ្លើងខ្លីមួយដើមដែលគេមិនស្គាល់ប្រភេទ ហើយបានបាញ់ប្រហារចំនួន៩គ្រាប់។ ចំណែកមន្ត្រីនគរបាល រ៉េត ស៊ីណែត បានដកកាំភ្លើង Glock ១៩ មួយដើម ភ្ជង់ទៅលើខ្មាន់កាំភ្លើងនៅក្នុងហេតុការណ៍គ្រោះថ្នាក់ចរាចរណ៍នោះ។
ការប្រើប្រាស់កាំភ្លើងសម្រាប់បាញ់ប្រហារនិងគំរាមកំហែង បានកើតឡើងជារឿយៗនៅក្នុងប្រទេសកម្ពុជានៅឆ្នាំនេះ។ កាលពីខែកញ្ញាកន្លងមកនេះ ប្រធាននាយកដ្ឋានប្រឆាំងភេរវកម្មនៃក្រសួងមហាផ្ទៃ លោក ថ្លាង ភិនរ៉ា បានរងបណ្ដឹងដោយចោទថា បានប្រើកាំភ្លើងខ្លីគំរាមថៅកែភោជនីយដ្ឋានមួយនៅម្ដុំទួលគោក អំឡុងពេលផឹកស៊ី។
៣ថ្ងៃក្រោយមក ជាងកាត់សក់ម្នាក់ត្រូវបានបាញ់សម្លាប់នៅជិតសាលារៀនទួលគោក ស្ថិតក្នុងខណ្ឌទួលគោកផងដែរ ហើយខ្មាន់កាំភ្លើងត្រូវបានសមត្ថកិច្ចបញ្ជាក់ថា ជាមន្ត្រីនគរបាល។
កាលពីខែសីហា មន្ត្រីនគរបាល៧រូបនៅស្រុកសំរោងទង ត្រូវបានស៊ើបអង្កេតដោយសាលាដំបូងខេត្តកំពង់ស្ពឺ ជុំវិញការប្រើកាំភ្លើងបាញ់បោះសេរី។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា សមត្ថកិច្ចត្រូវធ្វើការស្រាវជ្រាវចាប់ជនល្មើសមកផ្តន្ទាទោសតាមច្បាប់ ហើយតុលាការត្រូវកាត់សេចក្តីឈរលើគោលការណ៍ឯករាជ្យ ដើម្បីលុបបំបាត់វប្បធម៌ហិង្សានៅកម្ពុជាបានប្រសិទ្ធភាពខ្ពស់។
លោក យង់ គិមអេង មានប្រសាសន៍ថា៖ «ពង្រឹងប្រព័ន្ធតុលាការឱ្យបានកាន់តែប្រសើរ កុំឱ្យប្រព័ន្ធតុលាការដែលអាចត្រូវបានគេចោទប្រកាន់ជាបន្តបន្ទាប់ ដោយថា មិនអាចរកយុត្តិធម៌ពិតប្រាកដ ហើយអ្នកខ្លះចោទប្រកាន់តុលាការពីរឿងសំណូកសូកប៉ាន់ជាដើម បើយើងជម្រះមន្ទិលអស់ហ្នឹង ដើម្បីឱ្យប្រជាពលរដ្ឋគាត់មានការជឿជាក់លើប្រព័ន្ធច្បាប់របស់យើង»៕
