សមត្ថកិច្ចខេត្តកណ្តាល ត្រៀមបញ្ជូនមន្ត្រីយោធាផ្កាយមួយម្នាក់ទៅសាលាដំបូងខេត្ត ក្រោយមន្ត្រីយោធារូបនោះបានប្រើអាវុធវាយក្បាលសន្តិសុខយាមគ្លីនិកឯកជនមួយ កាលពីម្សិលមិញនេះ ដោយសារតែរឿងបាត់ស្បែកជើង។
យោងតាមហ្វេសប៊ុកស្នងការដ្ឋាននគរបាលខេត្តកណ្តាល បានឱ្យដឹងថា កាលពីថ្ងៃទី៤ ខែមករា ឆ្នាំ២០២១ មន្ត្រីយោធាម្នាក់ ឈ្មោះ ហេង គាហុង អាយុ៤១ឆ្នាំ និងជាបុគ្គលិកមន្ទីរសម្រាកព្យាបាល និងសម្ភព សុខ ម៉េង ស្ថិតនៅភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល បានប្រើហិង្សាដោយចេតនា ដោយយកអាវុធខ្លីវាយទៅសន្តិសុខយាមគ្លីនិករហូតបែកក្បាល។
បើតាមស្នងការខេត្ត ដើមចមដែលបណ្តាលឱ្យកើតអំពើហិង្សានេះ គឺដោយសារមន្ត្រីយោធារូបនោះបានបាត់ស្បែកជើង អំឡុងពេលជនរងគ្រោះកំពុងយាមនៅមុខគ្លីនិក។
ស្នងការនគរបាលខេត្តកណ្តាល លោក ឈឿន សុចិត្ត ប្រាប់វីអូឌីនៅថ្ងៃអង្គារនេះថា ក្រោយទទួលបានព័ត៌មាន នគរបាលខេត្តសហការជាមួយនគរបាលស្រុកអង្គស្នួល បានចុះទៅដល់កន្លែងកើតហេតុ ដើម្បីស្រាវជ្រាវនិងស៊ើបអង្កេត ដោយរកឃើញថា ជនសង្ស័យបានប្រើអាវុធខ្លីមួយដើមម៉ាក CF98 ដែលក្នុងបង់មានគ្រាប់ចំនួនមួយផងនោះ បានវាយទៅលើជនរងគ្រោះ បណ្តាលឱ្យរងរបួសដេកដួលមុខគ្លីនិក។
ស្នងការរូបនេះបន្តថា សន្តិសុខដែលរងគ្រោះនោះមានឈ្មោះ ច្រឹក ស៊ីណា អាយុ៣០ឆ្នាំ ស្នាក់នៅភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល បានរងរបួសបែកក្បាលផ្នែកខាងឆ្វេង លើត្រចៀក១កន្លែង និងបានដេរ៣ថ្នេរ។ លោកថា បច្ចុប្បន្ន ជនសង្ស័យដែលជាមន្ត្រីយោធា ឈ្មោះ ហេង គាហុង កំពុងត្រូវបានបញ្ជូនពីស្រុកមកខេត្ត ហើយថា សមត្ថកិច្ចនឹងបញ្ជូនបន្តទៅតុលាការនៅរសៀលថ្ងៃនេះ។
លោកបន្ថែមថា៖ «នីតិវិធីយើងធ្វើចប់អស់ហើយ ឥលូវហ្នឹងគេកំពុងបញ្ជូនពីស្រុកមក ពេលមកដល់ខេត្តៗនឹងបញ្ជូនបន្តទៅតុលាការហើយនៅរសៀលនេះ»៕
