ក្រសួងធនធានទឹក និងឧតុនិយម ឱ្យដឹងថា ចាប់ពីថ្ងៃទី៩ ដល់ថ្ងៃទី១៤ ខែមករា ធាតុអាកាសនៅកម្ពុជានឹងចុះត្រជាក់ខ្លាំងនៅតំបន់មួយចំនួន ជាពិសេសនៅតំបន់ជួរភ្នំដងរែក និងខ្ពង់រាបភាគឦសាន ។
សេចក្តីជូនដំណឹងស្តីពីស្ថានភាពធាតុអាកាសនៅកម្ពុជា របស់ក្រសួងធនធានទឹក និងឧតុនិយម នៅថ្ងៃទី០៥ ខែមករា ឆ្នាំ២០២១ បានឱ្យដឹងថា ចាប់ពីថ្ងៃទី៦ ដល់ទី១២ ខែមករា កម្ពុជានឹងទទួលឥទ្ធិពលពីខ្យល់មូសុងឦសានជាមធ្យមទៅខ្លាំង ដែលស្ថានភាពបែបនេះនឹងធ្វើឱ្យអាកាសធាតុចុះត្រជាក់ខ្លាំង ចាប់ពីថ្ងៃទី៩ ដល់ថ្ងៃទី១៤ ខែមករា។
សេចក្តីជូនដំណឹងបន្តថា បណ្តាខេត្តនៅតំបន់វាលទំនាបកណ្តាល ចាប់ពីថ្ងៃទី៩ ដល់ថ្ងៃទី១៩ នឹងមានសីតុណ្ហភាពអប្បបរមាពី ១៥ – ១៧°C (អង្សាសេ) និងសីតុណ្ហភាពអតិបរមាមានពី ២៤ – ២៧°C ខណៈបណ្តាខេត្តជាប់ជួរភ្នំដងរែក និងខ្ពង់រាបភាគឦសាន នឹងមានសីតុណ្ហភាពអប្បបរមាពី ១២ - ១៤°C និងសីតុណ្ហភាពអតិបរមាពី ២៣ - ២៦°C ជាមួយខ្យល់ខ្លាំង។
ចំណែកនៅតំបន់មាត់សមុទ្រ ក្រសួងថា នឹងមានសីតុណ្ហភាពអប្បបរមាពី ១៨ - ២១°C និងសីតុណ្ហភាពអតិបរមាមានពី ២៥ - ២៨°C ជាមួយខ្យល់ខ្លាំង និងរលកសមុទ្រខ្ពស់ៗនៅថ្ងៃទី១២ ខែមករា។
ករណីនេះ ក្រសួងបានអំពាវនាវដល់ប្រជាពលរដ្ឋ និងជាពិសេសកងទ័ពនិងកងកម្លាំងនគរបាល រស់នៅនិងឈរជើងនៅតំបន់ជួរភ្នំដងរែកនិងខ្ពង់រាបភាគឦសាន បង្កើនការយកចិត្តទុកដាក់ថែរក្សាសុខភាពចំពោះធាតុអាកាសចុះត្រជាក់ខ្លាំងនេះ។
ដោយឡែក សម្រាប់ប្រជានេសាទនិងអ្នកដំណើរសមុទ្រ ក្រសួងក៏បានអំពាវនាវឱ្យមានការប្រុងប្រយ័ត្នចំពោះខ្យល់បក់ខ្លាំងនិងរលកសមុទ្រខ្ពស់ផងដែរ៕
