តុលាការខេត្តកណ្តាល សម្រេចឃុំខ្លួនមន្ត្រីយោធាផ្កាយមួយម្នាក់ ក្រោយមន្ត្រីយោធារូបនោះ បានប្រើអាវុធវាយក្បាលសន្តិសុខយាមនៅគ្លីនិកឯកជនមួយ បណ្តាលឱ្យរបួសក្បាល។
យោងតាមហ្វេសប៊ុកស្នងការដ្ឋាននគរបាលខេត្តកណ្តាល បានឱ្យដឹងកាលពីថ្ងៃចន្ទថា កាលពីថ្ងៃទី៤ ខែមករា ឆ្នាំ២០២១ មន្ត្រីយោធាម្នាក់ ឈ្មោះ ហេង គាហុង អាយុ៤១ឆ្នាំ និងជាបុគ្គលិកមន្ទីរសម្រាកព្យាបាល និងសម្ភព សុខ ម៉េង ស្ថិតនៅភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល បានប្រើហិង្សាដោយចេតនា ដោយយកអាវុធខ្លីវាយទៅលើសន្តិសុខយាមគ្លីនិករហូតបែកក្បាល។
បើតាមស្នងការខេត្ត ដើមចមដែលបណ្តាលឱ្យកើតមានអំពើហិង្សានេះ គឺដោយសារមន្ត្រីយោធារូបនោះបានបាត់ស្បែកជើង អំឡុងពេលជនរងគ្រោះកំពុងយាមនៅមុខគ្លីនិក។
អ្នកនាំពាក្យសាលាដំបូងខេត្តកណ្តាល លោក សូ សារិន ប្រាប់វីអូឌីនៅថ្ងៃពុធនេះថា លោក ហេង គាហុង ជាមន្ត្រីយោធា ដែលបានប្រើអាវុធវាយទៅលើសន្តិសុខនោះ ត្រូវបានចៅក្រមស៊ើបសួរ សម្រេចឱ្យឃុំខ្លួនហើយកាលពីរសៀលថ្ងៃម្សិលមិញ ក្រោមបទចោទពីបទ «ហិង្សាដោយចេតនាមានស្ថានទម្ងន់ទោស និងប្រើប្រាស់អាវុធដោយគ្មានការអនុញ្ញាត»។
លោកបន្ថែមថា៖ «ក្រោយសាកសួររួច ចៅក្រមបានសម្រេចឱ្យឃុំខ្លួនហើយពីម្សិលមិញ»។
ស្នងការនគរបាលខេត្តកណ្តាល លោក ឈឿន សុចិត្ត ប្រាប់វីអូឌីកាលពីថ្ងៃអង្គារថា មន្ត្រីយោធា ឈ្មោះ ហេង គាហុង បានប្រើអាវុធខ្លីមួយដើមម៉ាក CF98 ដែលក្នុងបង់មានគ្រាប់ចំនួនមួយផងនោះ បានវាយទៅលើជនរងគ្រោះបណ្តាលឱ្យរងរបួសដេកដួលមុខគ្លីនិក។
ស្នងការរូបនេះបន្តថា សន្តិសុខដែលរងគ្រោះនោះមានឈ្មោះ ច្រឹក ស៊ីណា អាយុ៣០ឆ្នាំ ស្នាក់នៅភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល បានរងរបួសបែកក្បាលផ្នែកខាងឆ្វេងលើត្រចៀក១កន្លែង និងបានដេរ៣ថ្នេរ។
អ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថា ករណីមន្ត្រីយោធាយកកាំភ្លើងទៅវាយសន្តិសុខនោះ ជារឿងបុគ្គល មិនពាក់ព័ន្ធជាមួយការងាររបស់ក្រសួងឬស្ថាប័នឡើយ។ លោកថា ករណីនេះត្រូវអនុវត្តទៅតាមច្បាប់។
លោកបន្ថែមថា៖ «អាហ្នឹងជារឿងបុគ្គល រឿងហ្នឹងអត់ទាក់ទងជាមួយក្រសួងទេ យើងអនុវត្តតាមច្បាប់ទៅ។ យើងមានសមត្ថកិច្ច យើងមានអាជ្ញាធរដែនដី ធ្វើការងារតាមហ្នឹងទៅ ក្រសួងអត់មានពាក់ព័ន្ធទេ»។
នាយករងអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ករណីមន្ត្រីយោធាប្រើកាំភ្លើងវាយទៅលើសន្តិសុខនេះ ជាទង្វើខុសច្បាប់និងរំលោភសិទ្ធិមនុស្សធ្ងន់ធរ។
លោកបន្ថែមថា៖ «ពីព្រោះក្នុងនាមជាមន្ត្រីយោធា ទី១ ការប្រើប្រាស់អាវុធហ្នឹង គឺខុសច្បាប់ ទោះបីគាត់មានច្បាប់អនុញ្ញាតក៏ដោយ តែគាត់យកមកប្រើប្រាស់ខុសច្បាប់។ ទី២ វាជាបទល្មើសព្រហ្មទណ្ឌ។ ទី៣ ក្នុងនាមជាមន្ត្រីយោធា យើងប្រើអំពើហិង្សា វាកាន់តែជារឿងមួយកាន់តែធ្ងន់ធ្ងរទៀត។ អ៊ីចឹងករណីនេះ ត្រូវតែចាត់វិធានការ ដើម្បីកុំឱ្យករណីនេះកើតឡើងតទៅទៀត ហើយកុំឱ្យមាននិទណ្ឌភាពក្នុងការអនុវត្តច្បាប់»៕
