កម្មកររោងចក្រនិងកម្មករសំណង់មួយចំនួនបារម្ភពីការខ្វះខាតជីវភាព បន្ទាប់ពីតម្លៃសាច់ជ្រូកនិងសាច់មាន់ជាដើម បន្តឡើងថ្លៃក្នុងមួយរយៈចុងក្រោយ ដែលបញ្ហានេះ ប្រធានសមាគមអ្នកចិញ្ចឹមសត្វថា កើតឡើងដោយសារកង្វះផលិតកម្មសត្វក្នុងប្រទេស។
កម្មករផ្នែកដេរនៅរោងចក្រ Y&W Garment Factory នៅខណ្ឌដង្កោ លោក វែន អ៊ីហុង លើកឡើងថា តម្លៃសាច់ជ្រូកដាក់លក់នៅមុខរោងចក្រ បានកើនពី១៨ ០០០រៀលដល់ទៅ២២ ០០០ពាន់រៀល ដែលធ្វើឱ្យលោកត្រូវកាត់បន្ថយការចំណាយមិនចាំបាច់ផ្សេងៗ និងប្តូរមកទិញម្ហូបណាដែលមានតម្លៃទាប។
លោក អ៊ីហុង ប្រាប់ថា៖ «ម្ហូបយើងក៏អត់សូវហ៊ានហូបឆ្ងាញ់ដែរ ព្រោះអីវាថ្លៃ អ៊ីចឹងអត់សូវហ៊ានហូបឆ្ងាញ់ទេ យើងហូបតែត្រី។ និយាយទៅ ជួនកាលខ្ញុំអត់ហ៊ានសូវទិញអ៊ីចឹងទៅ ទិញមី ទិញត្រីខអ៊ីចឹងទៅ ទុកហូប ជួនកាលបណ្តោះៗពងទាអ៊ីចឹងទៅ។ ព្រោះអីបន្លែនិងសាច់វាឡើង»។
លោកបន្ថែមថា៖ «ខ្ញុំអត់ដឹងថាម៉េចដែរ ព្រោះឥលូវវាស្បើយការងាររោងចក្រទៀត បើបន្លែសាច់នៅតែថ្លៃទៀត មិនដឹងជាអនាគតទៅម៉េចដែរ»។
កម្មការិនីនៅរោងចក្រដដែល ឈ្មោះ ចន សាវៀន លើកឡើងថា នាងបានកាត់បន្ថយការទិញសាច់ជ្រូក ហើយទិញសាច់ត្រីជំនួសវិញ ដើម្បីរក្សាការចំណាយលើថ្លៃម្ហូបឱ្យនៅត្រឹម១៥ ០០០ពាន់រៀល ទៅ២០ ០០០រៀល ក្នុង១ថ្ងៃ សម្រាប់គ្នា២នាក់ប្តីប្រពន្ធនិងកូនតូចមួយ ខណៈចំណូលប្រចាំខែពីការធ្វើការងារទទួលបានពី២០០ដុល្លារទៅ២៥០ដុល្លារ បូករួមទាំងប្រាក់ឈ្នួលថែមម៉ោង។
កម្មការិនី ចន សាវៀន និយាយថា៖ «ពេលខ្លះអត់សូវហ៊ានហូបសាច់អ៊ីចឹងទៅ ទិញតែត្រីថោកៗល្មមៗ វាជួយកាត់បន្ថយការហូបសាច់ច្រើនអ៊ីចឹងទៅ។»
សាវៀន បន្ថែមថា៖ «បារម្ភរឿងខ្លាចប្រាក់ខែឡើងថ្លៃតិចតួច ម្ហូបឡើងកាន់តែច្រើនអ៊ីចឹង ហើយបារម្ភខ្លាចទប់ទល់គ្រួសារមិនឈ្នះ»។
កម្មករសំណង់ផ្នែកវាយឥដ្ឋម្នាក់ដែលធ្វើការក្បែររោងចក្រ អ្នកស្រី ណែត ចិន្តា លើកឡើងថា បច្ចុប្បន្ន គាត់ត្រូវចំណាយលើថ្លៃម្ហូបប្រចាំថ្ងៃសម្រាប់សមាជិកគ្រួសារ៤នាក់ ចន្លោះពី ៣០ ០០០ទៅ៤០ ០០០រៀល ឬអាចដល់៥០ ០០០រៀល ខុសពីមុនពេលផ្ទុះកូវីដចុងក្រោយនៅមុនខែវិច្ឆិកា ដែលគាត់ចំណាយអស់ចន្លោះពី២០ ០០០ទៅ៣០ ០០០រៀល។
អ្នកស្រីថា បញ្ហាម្ហូបឡើងថ្លៃនេះ ធ្វើឱ្យអ្នកស្រីពិបាកសន្សំលុយសម្រាប់សងរំលស់ប្រាក់កម្ចីពីធនាគារដែលអ្នកស្រីបានខ្ចីនាពេលកន្លងមក។
អ្នកស្រី ចិន្តា ប្រាប់ថា៖ «ចំណូលយើងចូលដូចថាមួយថ្ងៃ៣០ ០០០អ៊ីចឹង យើងនៅតែ៣០ ០០០ដដែល ហើយដល់ពេលម្ហូបឡើងថ្លៃអ៊ីចឹង វាចំណាយអស់ច្រើន។ អ៊ីចឹងយើងចូលតិចអ៊ីចឹងវាមិនសូវសល់លុយដូចមុន»។
អ្នកលក់សាច់ជ្រូកម្នាក់នៅពីមុខរោងចក្រ Y&W លោក មុត ភាព ប្រាប់ថា បច្ចុប្បន្ន លោកលក់ចេញសាច់ជ្រូកក្នុងមួយគីឡូពី២០ ០០០ទៅ២២ ០០០រៀល ដោយតម្លៃទិញចូលជាង១៧ ០០០ ដោយបានកើនឡើងពី១៥ ០០០រៀលកាលពី២ខែមុន។ លោកថា ការកើនឡើងនេះ ធ្វើឱ្យលោកត្រូវបន្ថយការទិញចូលសាច់ពី៤០គីឡូក្រាមក្នុងមួយថ្ងៃ មកនៅត្រឹម២០គីឡូក្រាមប៉ុណ្ណោះ។
លោក មុត ភាព និយាយថា៖ «បាទថយៗ! សូម្បីលក់នៅផ្សារបឹងត្របែកសព្វថ្ងៃហ្នឹង គ្មានមនុស្សដើរ។ ប្រពន្ធខ្ញុំធ្លាប់លក់បាន១លានជាង ៧០[ទៅ]៨០ម៉ឺន ឥលូវធ្លាក់មកសល់៣០ម៉ឺនមុនម៉ោង១អីហ្នឹង។ មកដល់ផ្ទះ បានត្រឹម៣០ម៉ឺន»។
រីឯអ្នកលក់សាច់មាន់ម្នាក់ លោក គឹម ជា ប្រាប់ថា ចាប់ពីខែវិច្ឆិកាមក សាច់មាន់ក្នុង១គីឡូក្រាមបានកើនជាបន្តបន្ទាប់ពីជាង៤ ០០០ ដល់៧ ០០០ ទៅ៨ ០០០រៀល ដែលធ្វើឱ្យបរិមាណសាច់ដែលធ្លាក់លក់បានជាង១០០គីឡូក្នុង១ថ្ងៃ បានធ្លាក់ចុះជិត៥០ភាគរយ។
លោក គឹម ជា ប្រាប់ថា៖ «តែមួយខែហ្នឹង ផ្ទុះកូវីដម្តងទៀតហ្នឹង»។
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ លើកឡើងថា ក្នុងរយៈពេល១០ថ្ងៃចុងក្រោយ តម្លៃជ្រូករស់បានឡើងពី១២ ០០០ពាន់រៀល ដល់១២ ៥០០ ទៅ១៣ ៥០០រៀលក្នុងមួយគីឡូក្រាម នៅតាមតំបន់និងខណ្ឌស្រុកផ្សេងៗ។
លោកថា មូលហេតុឡើងថ្លៃ គឺដោយសារផលិតកម្មជ្រូកនៅវៀតណាមដែលជាប្រទេសនាំចូលជ្រូកមកកម្ពុជា ជួបបញ្ហាដោយសារការវាយលុកពីជំងឺប៉េសជ្រូកអាហ្វ្រិក ដែលនាំឱ្យសត្វជ្រូកក្នុងប្រទេសនេះត្រូវស្លាប់និងត្រូវបានសម្លាប់ចោលអស់រាប់លានក្បាល។
លោក ស្រ៊ុន ពៅ ប្រាប់ថា៖ «វាឡើងដោយសារអ៊ីចឹងទេ មិនមែនឡើងដោយសារបងប្អូនយើងមានការហូបចុកច្រើនជាងមុនទេ អត់មានទេ។ បានសេចក្តីថា បើយើងគិតស្ថិតិចូលទីផ្សារ វាថយចុះនៅអត់ទាន់ដល់កម្រិតដើមនៅឡើយទេ ដែលឡើងថ្លៃគឺដោយសារប្រទេសជិតខាងយើងវាឡើងថ្លៃ»។
អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខប្រមាញ់ និងនេសាទ លោក តាន់ ផាន់ណារ៉ា បដិសេធចំពោះការឡើងថ្លៃជ្រូក ដោយថា ខាងក្រសួងបានព្យាយាមរក្សាតុល្យភាពតម្លៃជ្រូកបានយ៉ាងល្អក្នុងតម្លៃ១២ ០០០រៀលក្នុង១គីឡូក្រាម សម្រាប់ជ្រូករស់។
លោក តាន់ ផាន់ណារ៉ា ប្រាប់ថា៖ «បាទ! មានឡើងឯណា! យើងធានាស្ថិរភាពតម្លៃ ធ្វើម៉េចកុំឱ្យប៉ះពាល់ ចង់និយាយទាំងអ្នកចិញ្ចឹមនិងអ្នកបរិភោគក៏ដូចគ្នា»។
បើតាមធនាគារជាតិកម្ពុជា អតិផរណា ឬស្ថានភាពតម្លៃទំនិញសម្រាប់ឆ្នាំ២០២០កន្លងមកនេះ បានកើនឡើងក្នុងកម្រិតជាមធ្យម២,៩ភាគរយ ដែលបណ្ដាលមកពីកំណើនតម្លៃម្ហូបអាហារនៅអំឡុងពេលមានករណីជំងឺកូវីដ-១៩ដំបូង និងជំនន់ទឹកភ្លៀង៕