ប្រធានាធិបតីជាប់ឆ្នោតរបស់អាមេរិកលោក ចូ បៃឌិន បានប្តេជ្ញាធ្វើឱ្យប្រសើរឡើងថែមទៀតនៃប្រព័ន្ធយុត្តិធម៌ ដើម្បីប្រជាពលរដ្ឋអាមេរិកទាំងអស់ មិនមែនដើម្បីប្រធានាធិបតីឬ ថ្នាក់ដឹកនាំជាន់ខ្ពស់នោះទេ។
នៅលើទំព័រហ្វេសប៊ុករបស់លោក ចូ បៃឌិត លោកបានបង្ហាញឈ្មោះ និងមុខ ថ្នាក់ដឹកនាំថ្មី ដើម្បីកាន់តួនាទីក្នុងការពង្រឹងប្រព័ន្ធយុត្តិធម៌នៅអាមេរិក។ លោកអះអាងថា មន្ត្រីដែលលោកស្នើឡើងនេះ នឹងធ្វើឱ្យប្រសើរឡើងប្រព័ន្ធយុត្តិធម៌ឡើងវិញ ហើយធ្វើឱ្យស្ថាប័ននេះឯករាជ្យពិតប្រាកដដើម្បីពលរដ្ឋអាមេរិក។
លោកបៃឌិន៖«វាជាពេលវេលាដែលស្ថាប័នយុត្តិធម៌ត្រូវបម្រើផលប្រយោជន៍ប្រជាជនទូទៅ គឺមិនមែនសម្រាប់ប្រធានាធិបតីទេ»។
លោកបញ្ជាក់ថា ស្ថាប័ននេះដើរតួនាទីសំខាន់ក្នុងការបំពេញការងារដោយឯករាជ្យទប់ស្កាត់អំពើពុករលួយ និងបទឧក្រិដ្ឋផ្សេងៗទៀតនៅក្នុងសង្គម។
លោក ចូ បៃឌិត នឹងចូលកាន់តំណែងជាផ្លូវការក្នុងនាមជាប្រធានាធិបតីទី៤៦របស់អាមេរិកនៅថ្ងៃទី២០ខែមករា ឆ្នាំ២០២១។
របាយការណ៍គម្រោងយុត្តិធម៌ពិភពលោក(WJP) ប្រចាំឆ្នាំ២០២០ បង្ហាញថា អាមេរិកជាប់ចំណាត់ថ្នាក់លេខ២១ក្នុងចំណោម១២៨ប្រទេស។ ចំណាត់ថ្នាក់នេះអាមេរិកធ្លាក់ចុះ១លេខបើប្រៀបធៀបជាមួយឆ្នាំ២០១៩។ របាយការណ៍នេះបង្ហាញថា ប្រទេសដាណឺម៉ាកជាប់ចំណាត់ថ្នាក់លេខ១ ជាចំណាត់ថ្នាក់ល្អប្រសើរជាងគេខាងប្រព័ន្ធយុត្តិធម៌៕