ក្រសួងរ៉ែ និងថាមពល កំពុងបើកទទួលពាក្យដាក់ដេញថ្លៃយកសិទ្ធិធ្វើអាជីវកម្មបូមខ្សាច់តាមឆកសមុទ្រជាង២ពាន់ហិកតានៅក្នុងខេត្តកោះកុង និងខេត្តព្រះសីហនុ ដោយថា ការងារនេះគឺដើម្បីស្តារផ្លូវទឹក។
ក្រសួងនឹងបើកឱ្យមានវគ្គផ្សព្វផ្សាយព័ត៌មានមួយនៅពេលក្រោយ ក្នុងខែនេះ អំពីដំណើរការនីតិវិធីដាក់ឱ្យដេញថ្លៃ បន្ទាប់ពីចេញផ្សាយលិខិតជូនដំណឹងមួយដែលចុះហត្ថលេខាដោយរដ្ឋមន្រ្តីក្រសួងរ៉ែ និងថាមពល នៅថ្ងៃទី៣០ ខែវិច្ឆិកា ឆ្នាំ២០២០។
យោងតាមលិខិតនោះ ក្រសួងបើកតំបន់ចំនួន៧ទីតាំងផ្សេងគ្នា ដោយមាន៣ទីតាំងនៅខេត្តកោះកុង និង៤ទីតាំងទៀតនៅខេត្តព្រះសីហនុ ដែលមានផ្ទៃក្រឡាសរុបទំហំ២ ១៤៣ហិកតា។
អ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ លើកឡើងកាលពីថ្ងៃព្រហស្បតិ៍ម្សិលមិញថា ការសម្រេចជ្រើសរើសក្រុមហ៊ុនឱ្យធ្វើអាជីវកម្មបូមខ្សាច់នៅខេត្តមាត់សមុទ្រនេះ គឺដើម្បីស្តារផ្លូវទឹកហូរដែលបានកកស្ទះដោយសារលំហូរល្បាប់ខ្សាច់នៅតាមតំបន់ទាំងនោះ។
លោកបន្ថែមថា ការកើនឡើងនូវតម្រូវការខ្សាច់ចាក់បំពេញគម្រោងអភិវឌ្ឍន៍នៅតំបន់ក្បែរខាង និងការរកចំណូលចូលរដ្ឋពីការផ្តល់អាជ្ញាបណ្ណអាជីវកម្មបូមខ្សាច់ក៏ជាហេតុផលសំខាន់មួយទៀតដែរ បើទោះបីជាក្រសួងមិនទាន់អាចប៉ាន់ស្មានថានឹងទទួលបានចំណូលប៉ុន្មានក្តី។
លោក យស មុនីរ៉ាត់ មានប្រសាសន៍ថា៖ «កាលណាមានក្រុមហ៊ុនច្រើនចង់បានអញ្ចឹង យើងក៏ប្រកាសដាក់ឱ្យមានប្រកួតប្រជែង [រកមើលថា] តើក្រុមហ៊ុនណាអាចផ្តល់ផលប្រយោជន៍ឱ្យរដ្ឋច្រើនជាងគេ យើងនឹងជ្រើសរើសក្រុមហ៊ុនហ្នឹងឱ្យធ្វើការអភិវឌ្ឍការងារហ្នឹង»។
អគ្គនាយកនៃអគ្គនាយកដ្ឋានធនធានរ៉ែរូបនេះ និយាយថា ការសិក្សាលើផលប៉ះពាល់បរិស្ថាន នឹងត្រូវធ្វើឡើងដោយក្រុមហ៊ុនដាក់ដេញថ្លៃ មិនមែនក្រសួងនោះទេ ហើយលោកថា ខ្សាច់ដែលបូមបាននឹងអនុញ្ញាតឱ្យប្រើតែក្នុងស្រុក នៅតំបន់ក្បែរទីតាំងបូមប៉ុណ្ណោះ។
បើតាមអ្នកនាំពាក្យរដ្ឋបាលខេត្តព្រះសីហនុ មានការអភិវឌ្ឍតែមួយប៉ុណ្ណោះក្នុងតំបន់រាម ដែលត្រូវការខ្សាច់បរិមាណច្រើនចាក់បំពេញ ដោយនោះជាគម្រោងអភិវឌ្ឍន៍“ទីក្រុងរាម” របស់ក្រុមហ៊ុន Canopy Sands មានតម្លៃ១៦ពាន់លានដុល្លារ និងលាតសន្ធឹងតាមបណ្តោយឆ្នេរសមុទ្រ ស្ថិតនៅស្រុកព្រៃនប់ លើផ្ទៃដី៨៣៤ហិកតា។
ក្នុងសេចក្តីប្រកាសព័ត៌មានក្នុងខែកុម្ភៈ ឆ្នាំ២០២០ របស់ក្រសួងដែនដី នគរូបនីយកម្ម និងសំណង់ ឱ្យដឹងថា គម្រោងអភិវឌ្ឍន៍ទីក្រុងរាម គ្រោងនឹងសាងសង់រមណីយដ្ឋាន សណ្ឋាគារ ភោជនីយដ្ឋាន អាគារលំនៅដ្ឋាន អាគារស្នាក់នៅរួម និងមជ្ឈមណ្ឌលពាណិជ្ជកម្ម ជាដើម។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ និយាយថា៖ «ពាក់ព័ន្ធទៅនឹងក្រុមហ៊ុនអភិវឌ្ឍន៍ដែលមានតម្រូវការចាក់បំពេញខ្សាច់ហ្នឹង បច្ចុប្បន្នដូចមានតែមួយក្រុមហ៊ុន គឺនៅរាម តំបន់រាម»។
លោកបន្ថែមថា ទោះយ៉ាងណា មានតែក្រុមហ៊ុនបូមខ្សាច់តែមួយប៉ុណ្ណោះក្នុងចំណោម៣ ដែលកំពុងដំណើរការបូមខ្សាច់ក្នុងខេត្តក្នុងរយៈពេលថ្មីៗនេះ។
ចំណេកអ្នកនាំពាក្យរដ្ឋបាលខេត្តកោះកុង លោក សុខ សុទ្ធី និយាយថា មិនមានគម្រោងអភិវឌ្ឍន៍ណាមួយត្រូវការខ្សាច់ចាក់បំពេញក្នុងខេត្តនេះទេ។
លោក សុទ្ធី និយាយថា៖ «មានគម្រោងគេធំៗយូរហើយតើបាទ! ហើយដូចអត់មានត្រូវការចាក់បំពេញដីអីទៀតផង តែប្រហែលជាខ្ញុំអត់ទាន់បានដឹង»។
សម្រាប់ការបូមខ្សាច់នៅតាមឆកសមុទ្រ ធ្លាប់មានបញ្ហាចម្រូងចម្រាសមួយ ដោយមានអ្នកតវ៉ាត្រូវបានចាប់ខ្លួនក្នុងឆ្នាំ២០១៧ ខណៈពួកគេឃ្លាំមើលដំណើរការដឹកជញ្ជូនខ្សាច់ ហើយបន្ទាប់មកការនាំចេញខ្សាច់ទៅក្រៅប្រទេសពីខេត្តកោះកុងត្រូវបានហាមឃាត់។
ស្ថាបនិកក្រុមសកម្មជនបរិស្ថានមាតាធម្មជាតិ លោក Alex Gonzalez-Davidson បង្ហាញក្តីបារម្ភថា អាជីវកម្មបូមខ្សាច់អាចនឹងប៉ះពាល់ដល់ជីវភាពរបស់អ្នកនេសាទ ខណៈពួកគេធ្លាប់បានជួបប្រទះកាលពីកន្លងមក។
លោក Alex បន្ថែមថា គាត់ធ្លាប់ធ្វើការជាមួយអ្នកស្រុកនៅខេត្តកោះកុង ដោយពួកគេបានប្រាប់គាត់ថា មិនមានតំបន់ណាមួយដែលមានល្បាប់ខ្សាច់គោករាក់បង្កការរាំងស្ទះផ្លូវទឹក និងត្រូវការបូមស្តារនោះទេ។
លោកថា៖ «ទោះបីជាលើកនេះគេថា ខ្សាច់ហ្នឹង គឺដើម្បីបំពេញតម្រូវការក្នុងស្រុកក៏ដោយ យើងបារម្ភថា ថ្ងៃណាមួយអាចនឹងបង្វែរទិសដៅទៅរកផ្លូវនាំចេញវិញ ដូចស្ថានភាពដើមអញ្ចឹង»។
លោកបន្ថែមថា៖ «ទោះបីជាបូមខ្សាច់សម្រាប់ប្រើប្រាស់ក្នុងស្រុក ក៏ផលប៉ះពាល់ទៅលើបរិស្ថានហ្នឹងវាអាចធ្ងន់ធ្ងរដែរ»។
សកម្មជនបរិស្ថានរូបនេះ ក៏អំពាវនាវឱ្យមានតម្លាភាពកាន់តែធំធេង ដោយរាប់បញ្ចូលទាំងការចេញផ្សាយជាសាធារណៈអំពីរបាយការណ៍សិក្សាវាយតម្លៃហេតុប៉ះពាល់បរិស្ថានដែលមានភាគីជំនាញឯករាជ្យចូលរួម៕
