អនុប្រធានគណបក្សប្រជាជនកម្ពុជា និងជារដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃសុក្រនេះ បានក្រើនរំឭកជាថ្មីដល់មន្ត្រី ឱ្យឈប់យកថ្ងៃធ្វើការនិងមធ្យោបាយរដ្ឋទៅបម្រើការងារបក្សទៀត។
ក្នុងកិច្ចប្រជុំអន្ដរក្រសួង ដើម្បីកែសម្រួលលក្ខណៈសម្បត្តិនៃគោលនយោបាយភូមិឃុំមានសុវត្ថិភាព នៅថ្ងៃទី០៨ ខែមករា ឆ្នាំ២០២១ លោក ស ខេង ថ្លែងថា ការពង្រឹងប្រជាប្រិយភាពរបស់គណបក្សប្រជាជនកម្ពុជា សម្រាប់ការបោះឆ្នោតឆ្នាំ២០២២ខាងមុខ ពិតជាមានសារៈសំខាន់និងមិនអាចខ្វះបានទេ។
លោកបន្តថា កាលពីឆ្នាំ១៩៩៣ លោកបានស្នើឱ្យមានកុ្រមការងារដើម្បីចុះពង្រឹងប្រជាប្រិយភាពគណបក្សនៅមូលដ្ឋាន ប៉ុន្តែមកដល់បច្ចុប្បន្ន លោកសង្កេតឃើញថា មន្ត្រីដែលចុះទៅមូលដ្ឋាននោះ បានយកមធ្យោបាយឬយានយន្តនិងម៉ោងធ្វើការរបស់រដ្ឋទៅបម្រើបក្សទៅវិញ។
លោកថា៖ «ដល់ហើយមន្ត្រីរបស់យើង ចុះទៅមូលដ្ឋានហ្នឹង យកថ្ងៃធ្វើការទៅធ្វើការងារបក្ស យកមធ្យោបាយរបស់រដ្ឋទៅធ្វើការងារបក្ស អ៊ីចឹងរកវិធីម៉េចដើម្បីដោះស្រាយជួយ។ បង្កើតក្រុមការងាររដ្ឋមួយទៀត មកដល់ឥលូវនេះ អ៊ីចឹងយើងចង់ធ្វើការថ្មើរណាក៏បានដែរ ប៉ុន្តែពេលហ្នឹង យើង[យក]ឡានរដ្ឋទៅ យើងស្លៀកពាក់ឯកសណ្ឋានជាប៉ូលិសក៏បាន ជាទាហានក៏បាន ជាស៊ីវិលក៏បាន ជាមន្ត្រីរាជការក៏បាន ម៉ោងណាក៏បានដែរ ប៉ុន្តែយើងត្រូវការងារ[រដ្ឋ]ហ្នឹង»។
ក្រៅពីក្រើនរំឭកដល់មន្ត្រីកុំឱ្យយកយានជំនិះនិងម៉ោងធ្វើការរបស់រដ្ឋទៅធ្វើការងារបក្សនេះ លោក ស ខេង ក៏ជំរុញឱ្យមន្ត្រីធ្វើការដោះស្រាយទំនាស់នៅតាមមូលដ្ឋាន និងពង្រឹងការអនុវត្តគោលនយោយបាយភូមិឃុំមានសុវត្ថិភាពជូនប្រជាពលរដ្ឋឱ្យមានប្រសិទ្ធភាពផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា ការថ្លែងរបស់រដ្ឋមន្ត្រីក្រសួងមហាផ្ទៃ ជាការក្រើនរំឭក ដើម្បីកុំឱ្យមន្ត្រីមួយចំនួនយកមធ្យោបាយនិងម៉ោងរដ្ឋទៅបម្រើការងារបក្សទៀត។
លោកថា៖ «កន្លងទៅ អនុវត្តជារួម បានទទួលលទ្ធផលល្អប្រសើរហើយ ក៏ប៉ុន្តែក៏វាមានបុគ្គលខ្លះ មួយចំនួនតូចទេ មិនជាមូលដ្ឋានទេ ដែលគាត់អនុវត្តទៅ ភ្លេចគិត។ អ៊ីចឹងសម្ដេចលើកឡើងជាការក្រើនរំឭកដល់មន្ត្រីរាជការ ដើម្បីធ្វើយ៉ាងម៉េច [ចៀសវាងបញ្ហានេះ] ព្រោះបញ្ហានេះពាក់ព័ន្ធដល់កិត្តិយស សេចក្ដីថ្លៃថ្លូរគណបក្ស ដោយសាររឿងបុគ្គលដែលធ្វើឱ្យប៉ះពាល់ដល់កិត្តិយស សេចក្ដីថ្លៃថ្នូរ ក្នុងការអនុវត្តគោលការណ៍គណបក្ស»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស ស្វាគមន៍ចំពោះការក្រើនរំឭកនេះ ប៉ុន្តែលោកជំរុញឱ្យធ្វើការតាមដាន ដាក់ពិន័យ ឬក៏មានវិធានការច្បាប់ទៅលើមន្ត្រីរាជការទាំងអស់នោះ ជាជាងធ្វើការក្រើនរំឭក។
លោកថា៖ «កុំឱ្យមានការលើកឡើង ករណីគាត់ទៅធ្វើជាក់ស្ដែង ហើយយើងអត់បានធ្វើការពិន័យឬក៏ដាក់ទោសទណ្ឌអី អាហ្នឹងជាចំណុចមួយ វាមិនត្រឹមត្រូវ ហ្នឹងគឺជារឿងមួយសំខាន់»។
កាលពីឆ្នាំ២០១៨ រដ្ឋមន្ត្រីក្រសួងមហាផ្ទៃ លោក ស ខេង ក៏ធ្លាប់បានចេញសេចក្តីណែនាំដល់អាជ្ញាធរឃុំ-សង្កាត់ មិនត្រូវប្រើប្រាស់ឥទ្ធិពលរបស់ខ្លួនជាសមាជិកក្រុមប្រឹក្សាឃុំ-សង្កាត់ និងមិនត្រូវប្រើប្រាស់មធ្យោបាយ សម្ភារ ថវិកា ឬម៉ោងធ្វើការរបស់រដ្ឋ ទៅបម្រើឱ្យសកម្មភាពរបស់គណបក្សនយោបាយណាមួយឡើយ៕