តុលាការបានដំណើរការស៊ើបអង្កេតលើករណីមន្ត្រីរបស់លោក Abe Shinzo អតីតនាយករដ្ឋមន្ត្រីជប៉ុន ចំពោះការប្រើប្រាស់ថវិកាជិត៣០ម៉ឺនដុល្លារ (២៨៩ ០០០ដុល្លារ) មិនត្រឹមត្រូវទៅតាមច្បាប់ស្តីពីថវិកាចំណាយរបស់គណបក្សនយោបាយ។
នៅគ្រប់ដំណាក់កាលនៃការស៊ើបអង្កេត អតីតនាយករដ្ឋមន្ត្រីជប៉ុនរូបនេះបានស្ម័គ្រចិត្តចូលរួមទាំងការបំភ្លឺនៅក្នុងសភា និងការបំភ្លឺនៅស្ថាប័នអយ្យការនៅតុលាការ គឺលោកបញ្ជាក់ជំហរចូលរួមដើម្បីស្វែងរកការពិត ពាក់ព័ន្ធមន្ត្រី២រូបផ្សេងទៀត ទោះករណីនេះមិនពាក់ព័ន្ធរូបលោកក៏ដោយ។
នៅថ្ងៃទី២១ ខែធ្នូ ឆ្នាំ២០២០ លោក Abe បានចូលខ្លួនទៅបំភ្លឺនៅចំពោះមុខព្រះរាជអាជ្ញា និងនៅថ្ងៃទី២៥ ខែឆ្នាំដដែល លោកបានចូលខ្លួនទៅបំភ្លឺនៅចំពោះមុខសមាជិកសភា។
លោក Abe Shinzo កាន់តំណែងយូរជាងគេ គឺធ្វើជានាយករដ្ឋមន្ត្រីជិត៨ឆ្នាំ ជួយជំរុញឱ្យជប៉ុន មានការរីកចម្រើនទាំងក្នុងប្រទេស និងបានពង្រីកឥទ្ធិពលនៅលើឆាកអន្តរជាតិ ប៉ុន្តែលោកជាមនុស្សដាក់ខ្លួន មិនទាមទារឱ្យប្រជាពលរដ្ឋចងចាំគុណសម្បត្តិរបស់លោកនោះទេ។
លោក Abe Shinzo វ័យ៦៥ឆ្នាំ បានដាក់ពាក្យលាលែងពីតំណែងជានាយករដ្ឋមន្ត្រី កាលពីចុងខែសីហា ក្រោមហេតុផលជំងឺរលាកសួត។ ត្បិតតែលោកប្រើហេតុផលលាលែងដោយសារជំងឺប៉ុន្តែស្ថានភាពជំងឺមិនដល់ថ្នាក់ធ្វើឱ្យលោកដេកដួលនោះទេ។ ចាប់តាំងពីលោកលាលែងកាលពីខែកញ្ញា ឆ្នាំ២០២០ រហូតដល់ដើមឆ្នាំ២០២១ គឺលោកនៅតែធ្វើដំណើរនិងចូលរួមកម្មវិធីសំខាន់ៗរបស់ជាតិបានធម្មតា។
ចំពោះសមិទ្ធផលការងារ គឺលោកបានប្រឹងប្រែងបំពេញការងារក្នុងពេលកាន់តំណែង ដោយពង្រឹងបន្ថែមការិយាល័យសន្តិសុខជាតិ ធ្វើឱ្យជប៉ុនក្លាយជាអ្នកចូលរួមបង្កើតច្បាប់ឬគោលការណ៍អន្តរជាតិឆ្ពោះទៅរកការពង្រឹងសណ្តាប់ធ្នាប់នៅក្នុងតំបន់និងពិភពលោក ការពារពីការវាយប្រហារទាំងខាងក្នុងនិងខាងក្រៅ។
កាលពីខែកញ្ញា ឆ្នាំ២០១៥ ជប៉ុនបានសម្រេចរៀបចំច្បាប់និងសម្របសម្រួលជាមួយស្ថានភាពនយោបាយអន្តរជាតិ ឈានដល់ជប៉ុនអាចបញ្ជូនកងទ័ពរបស់ខ្លួនទៅធ្វើសង្គ្រាមនៅលើឆាកអន្តរជាតិបានវិញ ក្នុងគោលបំណងថែរក្សាសន្តិសុខពិភពលោក។ ក្នុងចំណោមហេតុផលជាច្រើន គឺការប្រឹងប្រែងរៀបចំឱ្យមានសិទ្ធិបញ្ជូនកងទ័ពទៅក្រៅប្រទេសបាននេះ ក៏ជាការបង្ហាញឥទ្ធិពលរបស់ខ្លួនទប់ទល់ការគំរាមកំហែងពីចិននិងកូរ៉េខាងជើងជាប្រទេសក្បែរខាងដែរ។
បើទោះជាលោក Abe ជាមេដឹកនាំដែលកាន់តំណែងក្នុងប្រវត្តិសាស្ត្រ គឺរយៈពេលជិត៨ឆ្នាំ ក៏លោកនៅតែមានការគាំទ្រច្រើនពីពលរដ្ឋ។ ហើយលោកក៏បានកសាងសមិទ្ធផលច្រើនសម្រាប់ប្រទេស កិត្តិយសប្រទេស និងពិភពលោក ប៉ុន្តែមេដឹកនាំរូបនេះមិនដែលអួតអាងទាមទារគុណសម្បត្តិ គំរាមកំហែងក្រុមផ្សេងទៀត ឬទាមទារឱ្យប្រជាពលរដ្ឋអរគុណរូបលោកនោះទេ។
នៅថ្ងៃធ្វើសន្និសីទសារព័ត៌មានស្តីពីការលាឈប់ពីតំណែង កាលពីថ្ងៃទី២៨ ខែសីហា ឆ្នាំ២០២០ លោក Abe បានសុំទោសប្រជាពលរដ្ឋដែលលោកសម្រេចលាឈប់ចំពេលដែលប្រទេសជាតិជួបវិបត្តិមេរោគកូវីដ១៩ ហើយគោលនយោបាយរបស់លោកមិនទាន់បានសម្រេចអស់។
បើទោះជាលោក Abe កាន់តំណែងយូរជាងគេប្រៀបធៀបជាមួយមេដឹកនាំផ្សេងទៀត លោកបានសាងគុណសម្បត្តិច្រើននិងនៅតែមានអ្នកគាំទ្រច្រើនក៏ដោយ ក៏លោកមិនបានប្រើប្រាស់សិទ្ធិអំណាចណាមួយរារាំងតុលាការមិនឱ្យស៊ើបអង្កេតលើការសង្ស័យលើរូបលោក ក្រុមការងារ ឬក្រុមគ្រួសាររបស់លោកនោះទេ។
ការចោទប្រកាន់និងស៊ើបអង្កេតមិនមែនទើបតែធ្វើឡើងនៅពេលដែលលោក Abe លាលែងពីតំណែងនោះទេ គឺមានការចោទតាំងពីលោកនៅក្នុងតំណែងជានាយករដ្ឋមន្ត្រី ហើយពេលនោះលោកក៏បញ្ជាក់ជំហរសហការស្វែងរកការពិតក្នុងគ្រប់ដំណាក់កាលរបស់ស្ថាប័នពាក់ព័ន្ធ។
កាលពីអំឡុងខែឧសភា ឆ្នាំ២០១៧ លោក Abe Shinzo និងភរិយារបស់លោក គឺលោកស្រី Akie Abe ត្រូវបានចោទប្រកាន់ថា មានរឿងអាស្រូវក្នុងការឈរមុខឱ្យសាលាមត្តេយ្យមួយមានប្រជាប្រិយភាព ហើយទទួលអំណោយដោយសម្ងាត់។ ករណីនេះ ក៏តុលាការជប៉ុនបើកការស៊ើបអង្កេតដោយគ្មានការរារាំងណាមួយដែរ។
ការមិនប្រកាន់ជំហររឹងត្អឹងឬមិនប្រកាសច្រានចោលការចោទប្រកាន់ ហើយបែរជាស្តាប់និងចូលខ្លួនសហការនេះ គឺជាជំហរមួយដែលហាក់ខុសប្លែកពីមេដឹកនាំផ្សេងៗទៀត។ មេដឹកនាំមួយចំនួនតែងតែខិតខំប្រើគ្រប់មធ្យោបាយទាំងស្របច្បាប់និងមិនស្របច្បាប់ ដើម្បីការពារអំណាចឬដើម្បីកម្ចាត់គូប្រជែងរបស់ខ្លួន។
បើយើងពិនិត្យមើលមេដឹកនាំចិន លោក ស៊ី ជីនពីង ដែលចូលកាន់តំណែងកាលពីឆ្នាំ២០១៣ ហើយតាមច្បាប់របស់ចិន គឺអាចកាន់តំណែងយ៉ាងយូរត្រឹម១០ឆ្នាំ គឺត្រូវបញ្ចប់នៅឆ្នាំ២០២៣។ ប៉ុន្តែលោក ស៊ី ជីនពីង បានកែប្រែច្បាប់ដើម្បីឱ្យលោកអាចកាន់តំណែងអស់មួយជីវិតឬកាន់តំណែងតាមការចង់បានរបស់លោកដោយមិនកំណត់ពេល។
ចាប់តាំងពីលោកចូលកាន់តំណែងមក មេដឹកនាំចិនរូបនេះតែងតែប្រកាសពីវិធានការក្តៅកម្ចាត់អំពើពុករលួយតាំងពីមន្ត្រីជាន់ខ្ពស់រហូតដល់មន្ត្រីថ្នាក់ក្រោម។ ជាក់ស្តែង មន្ត្រីជាច្រើនត្រូវបានលោកចាប់ខ្លួនជាបន្តបន្ទាប់ ប៉ុន្តែអ្នកឃ្លាំមើលកិច្ចការអន្តរជាតិមួយចំនួនអះអាងថា លោក ស៊ី ជីនពីង ក៏ឆ្លៀតប្រើលេសកម្ចាត់អំពើពុករលួយ មកកម្ចាត់មន្ត្រីដែលមានទស្សនៈប្រឆាំងឬអ្នកដែលព្យាយាមបើកកកាយកំហុសរបស់លោក។
តាំងពីលោក ស៊ី ជីនពីង ចូលកាន់តំណែងមក មិនដែលមានមន្ត្រី ឬស្ថាប័ន ឬប្រជាពលរដ្ឋណាហ៊ានបើកកកាយពីចំណុចខ្វះចន្លោះរបស់លោកដោយបើកចំហនោះទេ។
នេះយើងនិយាយពីចិនជាប្រទេសកុម្មុយនីស្ត ប៉ុន្តែបើនិយាយពីមេដឹកនាំអាមេរិកជាប្រទេសកាន់របបសេរី ក៏មានការចោទប្រកាន់ថា លោក ដូណាល់ ត្រាំ ជាប្រធានាធិបតីចាំផ្ទះ បានគំរាមកំហែងដល់អ្នកដែលស៊ើបអង្កេតលើចំណុចខ្វះចន្លោះរបស់លោកដែរ។
លោក ដូណាល់ ត្រាំ ក្រោយពេលចូលកាន់តំណែងកាលពីថ្ងៃទី២០ ខែមករា ឆ្នាំ២០១៧ រងការចោទថា លោកបានគំរាមកំហែងដល់ថ្នាក់ដឹកនាំ FBI។ ការគំរាមកំហែងនេះធ្វើឡើងដោយសារតែស្ថាប័ន FBI បានបើកការស៊ើបអង្កេតលើលោក ដូណាល់ ត្រាំ ករណីសង្ស័យថា បានឃុបឃិតជាមួយរុស្ស៊ីកែប្រែលទ្ធផលនៃការបោះឆ្នោតកាលពីចុងឆ្នាំ២០១៦ ទើបលោកឈ្នះការបោះឆ្នោត។ នៅក្នុងតំណែង លោក ត្រាំ ក៏បានដកតួនាទីមន្ត្រីបន្តបន្ទាប់ ចំពោះករណីមិនធ្វើតាមបញ្ជារបស់លោក ឬព្យាយាមស៊ើបរកកំហុសរបស់លោក។
ទិដ្ឋភាពទាំងនេះបង្ហាញថា លោក Abe Shinzo ជាមេដឹកនាំគំរូមួយរូបក្នុងការគោរពច្បាប់ ហ៊ានប្រឈមមុខនៅតុលាការ ហើយមិនបានធ្វើឱ្យពលរដ្ឋឈឺចាប់ដោយភាពអយុត្តិធម៌ទាំងពេលដែលលោកកាន់តំណែងនិងពេលចុះចេញពីតំណែង៕
