ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ចំណូលពន្ធ-អាករដែលអគ្គនាយកដ្ឋានពន្ធដារប្រមូលបានក្នុងឆ្នាំ២០២០ មានចំនួនជិត៣ ០០០លានដុល្លារអាមេរិក ដែលចំនួននេះមានការកើនឡើងជិត៤ភាគរយ បើធៀបនឹងឆ្នាំ២០១៩ បើទោះជាកម្ពុជារងផលប៉ះពាល់ដោយជំងឺកូវីដ១៩ យ៉ាងណាក្តី។
សេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃម្សិលមិញ លើកឡើងថា ចំណូលពន្ធ-អាករដែលប្រមូលបានក្នុងឆ្នាំ២០២០ មានចំនួនប្រមាណ២ ៨៨៩,០២លានដុល្លារអាមេរិក ស្មើនឹង១០១,៣៦% នៃផែនការប្រចាំឆ្នាំ ហើយបើធៀបនឹងចំណូលពន្ធអាករឆ្នាំ២០១៩ មានការកើនឡើងប្រមាណ១០៤,៤៩លានដុល្លារ ស្មើនឹង៣,៧៣%។
សេចក្តីប្រកាសព័ត៌មានបន្តថា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានវាយតម្លៃខ្ពស់ចំពោះសមិទ្ធផលនេះ បើទោះជាកម្ពុជាកំពុងស្ថិតក្នុងដំណាក់កាលលំបាកដោយសារវិបត្តិជំងឺកូវីដ១៩ក៏ដោយ។
សម្រាប់ការងារប្រមូលពន្ធ-អាករនៅឆ្នាំ២០២១នេះ លោក អូន ព័ន្ធមុនីរ័ត្ន បានណែនាំដល់អគ្គនាយកដ្ឋានពន្ធដារ បន្តពិនិត្យនិងសិក្សាពីលទ្ធភាពនៃការប្រមូលចំណូលដែលមានសក្តានុពលផ្សេងទៀត ដូចជា ប្រភពចំណូលលើវិស័យ E-Commerce វិស័យប្រេងកាត វិស័យធនធានរ៉ែ ព្រមទាំងវិស័យដែលមានសក្តានុពលផ្សេងទៀត និងត្រូវពង្រឹងការចុះបញ្ជីពន្ធដារ និងជំរុញការបំពេញកាតព្វកិច្ចសារពើពន្ធសម្រាប់សហគ្រាសក្នុងវិស័យកាស៊ីណូ ដើម្បីធានាបាននូវតម្លាភាពសារពើពន្ធ។
លោកក៏ណែនាំឱ្យបន្តអនុវត្តកំណែទម្រង់ស្ថាប័ន ពង្រឹងការចុះបញ្ជីអាជីវកម្មតាមប្រព័ន្ធបច្ចេកវិទ្យា និងបន្តបញ្ជ្រាបវប្បធម៌បង់ពន្ធ ព្រមទាំងពង្រឹងការផ្សព្វផ្សាយនិងការអនុវត្តបទបញ្ញត្តិថ្មីពាក់ព័ន្ធនឹងពន្ធដារ ដល់មន្ត្រីអនុវត្តច្បាប់ អ្នកជាប់ពន្ធ និងសាធារណជនផងដែរ៕