អគ្គស្នងការដ្ឋាននគរបាលជាតិ ឱ្យផ្អាកវិធានការចាប់ឃាត់ម៉ូតូធំដែលកែច្នៃបំពង់ស៊ីម៉ាំងបង្កសំឡេងរំខានជាបណ្តោះអាសន្នសិន ខណៈក្រសួងមហាផ្ទៃ កំពុងរៀបចំសេចក្តីណែនាំថ្មីជុំវិញវិធានការទៅលើម៉ូតូធំដែលកែច្នៃបំពង់ស៊ីម៉ាំងទាំងនោះ។
អគ្គស្នងការរងនៃអគ្គស្នងការដ្ឋាននគរបាលជាតិ និងជាស្នងការនគរបាលរាជធានីភ្នំពេញ លោក ស ថេត មានប្រសាសន៍ប្រាប់ វីអូឌី នៅថ្ងៃចន្ទថា សមត្ថកិច្ចពិតជាបានសម្រេចផ្អាកសកម្មភាពចាប់ម៉ូតូធំដែលមានបំពង់ស៊ីម៉ាំងឮខ្លាំងដែលបង្កការរំខានដល់ប្រជាពលរដ្ឋជាបណ្ដោះអាសន្នមែន។
លោកបានបញ្ជាក់ថា៖ «យើងកំពុងតែរៀបចំធ្វើ ព្រឹកមិញយើងបានប្រជុំគ្នា ហើយដើម្បីរកផ្លូវកណ្តាលមួយ ដើម្បីអនុវត្តយ៉ាងម៉េច មានឧបកណ៍វាស់កម្រិតសំឡេងឱ្យវាស្របទៅតាម អនុក្រិត្យឬច្បាប់។ អ្វីដែលយើងបានធ្វើកន្លងទៅ យើងបានធ្វើការអប់រំណែនាំពួកគាត់កុំឱ្យគាត់បន្តជិះ[ម៉ូតូ]ដែលកែច្នៃដែលខុសពីលក្ខណៈបច្ចេកទេសរបស់គេ»។
ជាមួយគ្នានេះដែរ លោកថា សមត្ថកិច្ចកំពុងសហការជាមួយមន្ត្រីក្រសួងសាធារណការ និងក្រសួងបរិស្ថាន ដើម្បីសិក្សានិងដាក់ចេញវិធានការទៅលើម៉ូតូធំដែលកែច្នៃបំពង់ស៊ីម៉ាំងលើសពីការកំណត់។
លោកបានបន្ថែមថា៖ «អាហ្នឹងវាមានស៊ីម៉ាំង មានកែច្នៃខ្លះ ហើយយើងកំពុងតែរួមគ្នាធ្វើជាមួយសាធារណការ និងបរិស្ថាន ដោយសារតែខាងបរិស្ថាន គេមានឧបករណ៍វាស់សំឡេង […] កាលណាវាឮលើសពីសំឡេងកំណត់ វាខុសហើយ និងត្រូវឃាត់ទុក»។
បើតាមលោក ស ថេត ក្នុងប្រតិបត្តិការរយៈពេលប៉ុន្មានថ្ងៃនេះ សមត្ថកិច្ចខណ្ឌទាំង៩ បានចាប់ឃាត់ម៉ូតូធំដែលបំពាក់បំពង់ស៊ីម៉ាំងឮសំឡេងខ្លាំងបានប្រមាណ៦០គ្រឿង។
ការបញ្ជាឱ្យផ្អាកវិធានការទៅលើម៉ូតូធំដែលកែច្នៃបំពង់ស៊ីម៉ាំងរំពងសំឡេងនេះ បានធ្វើឡើងបន្ទាប់ពីមានការរិះគន់មួយចំនួននៅលើបណ្តាញសង្គមហ្វេសប៊ុក ជុំវិញវិធានការរបស់សមត្ថកិច្ច ដែលចាប់ឃាត់ម៉ូតូកែច្នៃខុសបច្ចេកទេសឬបំពាក់បំពង់ស៊ីម៉ាំងបំពងសំឡេងដែលចតស្ងៀមនៅលើទ្រូងផ្លូវ កាលពីចុងសប្តាហ៍នេះ។
តែយ៉ាងណា លោក ស ថេត បានគូសបញ្ជាក់ថា ពុំមានករណីឃាត់ម៉ូតូធំដែលកែច្នៃបំពង់ស៊ីម៉ាំង ដូចការរិះគន់ក្នុងបណ្តាញសង្គមនោះទេ។
លោកថា៖ «អត់មានឃាត់ទេ! គេគ្រាន់តែចុះស្រង់ទិន្នន័យទេតើ! មិនមាននរណាគេទៅយកពីផ្ទះគេមក គឺអត់មាននោះទេ។ ឃាត់នៅពេលដែលគាត់ធ្វើចរាចរណ៍តាមផ្លូវទេតើ! សមត្ថកិច្ចធ្វើត្រឹមណា និយាយត្រឹមហ្នឹង កុំបំផ្លើស គ្មាននរណាទៅរឹបអូសពីផ្ទះនោះទេ ចេះតែបំភ្លៃមក។ គេគ្រាន់តែស្រង់ទិន្នន័យទេ ដើម្បីដឹងចំនួន ហើយគេផ្សព្វផ្សាយអប់រំនិងអំពាវនាវ»។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ក្រោយពីមានកិច្ចប្រជុំអន្តរក្រសួងជុំវិញបញ្ហានេះ ក្រសួងមហាផ្ទៃនឹងចេញសេចក្តីណែនាំមួយពាក់ព័ន្ធនឹងវិធានការលើម៉ូតូធំដែលកែច្នៃបំពង់ស៊ីម៉ាំងឮសំឡេងខ្លាំង នៅក្នុងសប្តាហ៍នេះ។
លោកបានថ្លែងយ៉ាងខ្លីដូច្នេះថា៖ «ក្រសួងមហាផ្ទៃ បាននិងកំពុងតែរៀបចំសេចក្តីព្រៀងសេចក្តីណែនាំមួយ ចាំស្អែកឬខានស្អែកចេញហើយ។ យើងត្រូវការពេលវេលាបន្ថែមបន្តិច ចាំ២ទៅ៣ថ្ងៃទៀត វិធានការបែបម៉េច ចេញមកឃើញហើយ»។
ប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង បានសរសេរនៅលើទំព័រហ្វេសប៊ុករបស់លោកថា កន្លងមកនេះ មានការអនុវត្តច្បាប់តឹងតែងចំពោះម៉ូតូធំៗ រហូតមានការមិនពេញចិត្តពីសំណាក់ប្រជាពលរដ្ឋមួយចំនួនដែលនិយមប្រើប្រាស់ម៉ូតូធំ។
លោកបន្តថា ក្រោយពីមានការណែនាំរបស់ថ្នាក់ដឹកនាំក្រសួងមហាផ្ទៃ មានមន្ត្រីថ្នាក់ក្រោមខ្លះ បានអនុវត្តចាប់ម៉ូតូធំទាំងអស់តែម្តង បើទោះជាម៉ូតូនោះមានបំពង់ស៊ីម៉ាំងដែលមានសំឡេងឮខ្លាំងមកស្រាប់ក៏ដោយ។
លោកបានបញ្ជាក់ថា៖ «កម្លាំងម៉ាស៊ីនគ្នាធំ បើកបរពិតជាមានសំឡេងខ្លាំង ទោះគ្មានការកែច្នៃក៏ដោយ ចង់បញ្ឈប់វត្តមានម៉ូតូនោះ គួរណាបិទការនាំចូលតែម្ដង ម៉ូតូខ្លះទៀតមានក្រុមហ៊ុននាំចូលនិងបង់ពន្ធជូនរដ្ឋទៀតផង បើមិនចង់ឮសំឡេង ទាល់តែប្រាប់ក្រុមហ៊ុនហ្នឹងថាម៉ូតូនាំចូលមកកម្ពុជា ត្រូវកុំឱ្យលឺសំឡេង។ ឯម៉ូតូខ្លះ កម្លាំងមិនខ្លាំងទេ តែកែច្នៃបំពង់ស៊ីមាំង ឱ្យមានការរំខានដល់សណ្តាប់ធ្នាប់សាធារណៈប្រាកដ ដែលសមនឹងចាប់ដាក់ពិន័យប្រាកដមែន»។
ក្នុងកិច្ចប្រជុំអន្ដរក្រសួងដើម្បីកែសម្រួលលក្ខណៈសម្បត្តិនៃគោលនយោបាយភូមិឃុំមានសុវត្ថិភាព កាលពីថ្ងៃទី០៨ ខែមករា ឆ្នាំ២០២១ រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅកម្លាំងនគរបាលសហការជាមួយក្រសួងសាធារណការ ស្រាវជ្រាវកំណត់អត្តសញ្ញាណម្ចាស់ម៉ូតូធំដែលកែច្នៃបង្កសំឡេងរំខានដល់ប្រជាពលរដ្ឋ។
លោក ស ខេង បានកត់សម្គាល់ថា កន្លងទៅ អ្នកជិះម៉ូតូធំៗនេះ គឺជិះលឿនៗ ហើយខ្លះបានបង្កការរំខានដល់ប្រជាពលរដ្ឋក្នុងមូលដ្ឋាន និងពេលខ្លះរំខានដល់ដំណេករបស់ថ្នាក់ដឹកនាំថែមទៀតផង៕