មន្ត្រីជាន់ខ្ពស់ក្រសួងបរិស្ថាន ឱ្យដឹងថា ក្នុងឆ្នាំ២០២០ មន្ត្រីឧទ្យានុរក្សនិងស្ថាប័នពាក់ព័ន្ធ បានទប់ស្កាត់និងបង្ក្រាបបទល្មើសធនធានធម្មជាតិបានជិត៩ ០០០ករណី ដែលចំនួនបង្ក្រាបនេះមានការកើនឡើងប្រមាណ៣០% បើបៀបធៀបនឹងឆ្នាំ២០១៩។
រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន លោក នេត្រ ភក្ត្រា លើកឡើងនៅថ្ងៃទី១២ ខែមករា ឆ្នាំ២០២១ ថា នៅឆ្នាំ២០២០ មន្ត្រីឧទ្យានុរក្សបានបង្ក្រាបបទល្មើសធនធានធម្មជាតិចំនួន៨ ៩១៧ករណី ដែលការបង្ក្រាបនេះមានការកើនឡើងចំនួន៣ ៤៤២ករណី ឬស្មើប្រមាណ៣០% បើធៀបនឹងឆ្នាំ២០១៩ ដែលបង្ក្រាបបានតែ៥ ៤៧៥ករណី។
លោកបន្តថា បទល្មើសដែលបង្ក្រាបបានភាគច្រើនជាបទល្មើសលួចកាប់ឈើ ការរុករានទន្ទ្រានកាន់កាប់ដីព្រៃខុសច្បាប់ ការបរបាញ់សត្វ និងការដាក់អន្ទាក់ចាប់សត្វ ជាដើម។
លោក នេត្រ ភក្ត្រា ថ្លែងថា៖ «ការបង្ក្រាបនិងទប់ស្កាត់បទល្មើសមានការកើនឡើង បានបង្ហាញពីការអនុវត្តច្បាប់កាន់តែមានប្រសិទ្ធភាព និងបង្ហាញពីការខិតខំរបស់មន្ត្រីឧទ្យានុរក្ស សហគមន៍តំបន់ការពារធម្មជាតិ និងអ្នកពាក់ព័ន្ធ ដោយមិនខ្លាចនឿយហត់ក្នុងការចុះល្បាតការពារព្រៃឈើនិងជីវចម្រុះ»។
លោក នេត្រ ភក្ត្រា បន្តថា ក្នុងប្រតិបត្តិការបង្ក្រាបបទល្មើសនេះ សមត្ថកិច្ចក៏បានបញ្ជូនសំណុំរឿងទៅតុលាការចំនួន៦០៥ករណី ហើយផាកពិន័យអន្តរការណ៍លើជនប្រព្រឹត្តល្មើសចំនួន៨៥៧ករណី និងអប់រំធ្វើកិច្ចសន្យាចំនួន២ ៩៤៦ករណី។
ក្រៅពីនោះ លោកថា ក៏មានការរឹបអូសវត្ថុតាងដែលប្រព្រឹត្តបទល្មើសជាច្រើនទៀតផងដែរ ក្នុងនោះមានរណារយន្តចំនួន៤ ០០៤គ្រឿង រថយន្ត២១៥គ្រឿង គោយន្តចំនួន៦១១គ្រឿង ម៉ូតូចំនួន៥៩០គ្រឿង កាំភ្លើងកែច្នៃដែលប្រើសម្រាប់បរបាញ់សត្វចំនួន៧៣៧ដើម និងឈើចំនួន២ ៧១៨ម៉ែត្រគូប។
មន្ត្រីនាំពាក្យក្រសួងបរិស្ថានរូបនេះ បន្តថា ចំពោះការចុះល្បាតរបស់មន្ត្រីឧទ្យានុរក្សទាំង១ ២០០នាក់ នៅឆ្នាំនេះ ក៏មានការកើនឡើងដែរ គឺបានចុះល្បាតចំនួន២៧ ៥៨៨លើក ខណៈការចុះល្បាតនៅឆ្នាំ២០១៩ មានតែចំនួន២៤ ០៤៨លើក។
លោក នេត្រ ភត្ត្រា គូសបញ្ជាក់ថា៖ «នេះជាប្រសិទ្ធភាពនៃការអនុវត្តច្បាប់នេះ បទល្មើសព្រៃឈើខ្នាតធំលែងមានទៀតហើយ គឺនៅមានបទល្មើលព្រៃឈើខ្នាតតូច ដែលមន្ត្រីឧទ្យានុរក្សនៃក្រសួងបរិស្ថាននឹងបន្តសហការជាមួយសហគមន៍តំបន់ការពារធម្មជាតិ អង្គការដៃគូ បន្តអប់រំផ្សព្វផ្សាយច្បាប់និងអនុវត្តច្បាប់ ដើម្បីទប់ស្កាត់និងបង្ក្រាបបទល្មើសបន្តទៀត»។
បើទោះបីជាក្រសួងបរិស្ថានបានអះអាងថា ការបង្រ្កាបនិងចុះល្បាតមានការកើនឡើងយ៉ាងនេះក្តី ប៉ុន្តែសម្រាប់ក្រុមសកម្មជនបរិស្ថាននិងសកម្មជនព្រៃឡង់នៅតែបារម្ភពីការបាត់បង់ព្រៃឈើ ដោយពួកគេលើកឡើងថា បទល្មើសនៅតែបន្តកើតមានឡើងជាហូរហែ។
សកម្មជនបរិស្ថាន លោក សាន ម៉ាឡា បានលើកឡើងថា របាយការណ៍របស់ក្រសួងបានឆ្លុះបញ្ចាំងឱ្យឃើញថា ការកាប់បំផ្លាញព្រៃឈើនៅតែមិនមានការថយចុះ ដូចដែលសហគមន៍និងសកម្មជនបរិស្ថានតែងតែបានលើកឡើង។
លោកថា៖ «អ៊ីចឹងហាក់មិនមានការថយទេ គឺដូចការលើកឡើងក្រុមអ្នកធ្វើការខាងបរិស្ថាន។ អ៊ីចឹងក្រសួងបរិស្ថាន គួរធ្វើការកែទម្រង់បែបម៉េចវិញ ឬក៏ការពង្រឹងនូវការត្រូវពិនិត្យទៅលើការអនុវត្តច្បាប់របស់មន្ត្រីថ្នាក់ក្រោម ឬក្រសួងត្រូវកែឥរិយាបថ អាចធ្វើការចុះសម្រុងឬក៏ទទួលនូវមតិរិះគន់ ជាអនុសាសន៍ទាំងឡាយណាដែលលើកឡើងដោយក្រុមអ្នកធ្វើបរិស្ថាន ដើម្បីឱ្យប្រសិទ្ធភាពនៃការអនុវត្តរបស់គាត់ខ្លាំង ហើយកាត់បន្ថយបទល្មើសបាន»។
នាយកកម្មវិធីប្រចាំប្រទេសនៃអង្គការ WCS លោក កែន សេរីរដ្ឋា សង្កេតឃើញថា ប្រជាពលរដ្ឋមួយចំនួនបាននាំគ្នាប្រកបរបរកាប់ឈើលក់ បន្ទាប់ពីពួកគាត់បាត់បង់ការងារនិងបាត់បង់ចំណូលសម្រាប់ទ្រទ្រង់ជីវភាពគ្រួសារ ក្នុងអំឡុងពេលផ្ទុះជំងឺកូវីដ១៩។
លោកបន្តថា ប្រសិនបើរដ្ឋាភិបាលនិងក្រសួង មិនធ្វើការអប់រំនិងផ្សព្វផ្សាយដល់ប្រជាពលរដ្ឋនិងជួយរកការងារឱ្យពួកគាត់ធ្វើនោះទេ នោះការកាប់បំផ្លាញព្រៃឈើនៅតែបន្តកើតឡើងដដែល ។
លោក រដ្ឋា ថ្លែងថា៖ «អ៊ីចឹងជាការផ្ដល់ឱកាសមួយឱ្យគាត់ចូលរួមបំផ្លិចបំផ្លាញ ជួនកាលគាត់មិនមែនមិនដឹងច្បាប់ថាកន្លែងជាកន្លែងការពារទេ ប៉ុន្តែគាត់អត់មានជម្រើស ដោយសារបញ្ហាសេដ្ឋកិច្ចអីហ្នឹង។ អ៊ីចឹងការលើកកម្ពស់ការយល់ដឹង និងផ្ដល់ឱកាសការងារឱ្យគាត់ និងការអនុវត្តច្បាប់តឹងរ៉ឹង បានន័យថា ច្បាប់មួយទាំងអស់គ្នា មិនមែនច្បាប់សម្រាប់អ្នកនេះ អ្នកនោះទេ»៕
