អាជ្ញាធរខេត្តព្រះវិហារ កំពុងបន្តនីតិវិធីក្នុងការជម្លៀសប្រជាពលរដ្ឋជាង៣០គ្រួសារចេញពីតំបន់អភិរក្សឧទ្យានជាតិតេជោសែនឫស្សីត្រឹប ស្ថិតក្នុងស្រុកឆែប ខេត្តព្រះវិហារ ដើម្បីធានាពីការទប់ស្កាត់បទល្មើសព្រៃឈើនៅក្នុងតំបន់នោះឱ្យមានប្រសិទ្ធភាព។
ប្រធានរាជបណ្ឌិត្យសភាកម្ពុជា និងជាអ្នកគ្រប់គ្រងឧទ្យានជាតិតេជោសែនប្ញស្សីត្រឹប លោក សុខ ទូច បានថ្លែងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រីនៅព្រឹកថ្ងៃចន្ទនេះថា បច្ចុប្បន្នក្នុងតំបន់អភិរក្សនៃឧទ្យានជាតិមួយនេះបានកើតមាននូវបទល្មើសព្រៃឈើមួយចំនួន ដូចជា ការកាប់ឈើលក់ ការកាប់ឈើទន្ទ្រានយកដីធ្វើកសិកម្ម និងកាប់ឈើដើម្បីចាប់សត្វព្រៃជាដើម។
លោកបានបង្ហាញការព្រួយបារម្ភពីវិនាសកម្មព្រៃឈើក្នុងតំបន់អភិរក្សនេះ ប្រសិនបើអាជ្ញាធរពាក់ព័ន្ធមិនចូលរួមដោះស្រាយ និងទប់ស្តាត់ឱ្យបានទាន់ពេលវេលាទេនោះ ជាពិសេសការដោះស្រាយប្រជាពលរដ្ឋជាង៣១គ្រួសារដែលកំពុងរស់នៅតំបន់ការពារនោះ ដែលសកម្មក្នុងការកាប់បំផ្លាញព្រៃឈើ។
លោកបន្ថែមថា៖ «ខ្ញុំឃើញដើមឈើ វាកាប់ច្រើនពេក ជាពិសេសដើមធ្នង់ហ្នឹងតែម្តង។ ហើយខ្ញុំជិះម៉ូតូតាមរហូតដល់ក្រោយផ្ទះ ពេលចូលទៅមើលសុទ្ធតែពំនូកឈើកម្ពស់ណាណី សុទ្ធតែធ្នង់។ យើងទៅ១៥ផ្ទះ មានទាំង១៥ផ្ទះ សុទ្ធតែពំនូកឈើ»។
លោក សុខ ទូច គូសបញ្ជាក់ថា៖ «ជួនកាលមួយអាទិត្យអី ខ្ញុំរាប់ទៅ ជួនកាល២ ០០០ដើម ទៅ៣ ០០០ដើម ហើយដើមធ្នង់ហ្នឹង គឺជាសត្រូវតែម្តងរបស់ប្រជាជននៅតំបន់ហ្នឹងតែម្តង មិនដឹងជាយ៉ាងម៉េច»។
អភិបាលរងខេត្តព្រះវិហារ លោក ស៊ូ សេរី បានទទួលស្គាល់ថា ពិតជាមានបទល្មើសព្រៃឈើក្នុងតំបន់អភិរក្សឧទ្យានជាតិតេជោសែនប្ញស្សីត្រឹបនេះមែន។ លោកបន្តថា បទល្មើសទាំងនោះ ប្រព្រឹត្តដោយពលរដ្ឋនៅក្នុងតំបន់នោះនិងពលរដ្ឋមកពីក្រៅស្រុក។
អភិបាលរងខេត្តរូបនេះបន្តថា មានពលរដ្ឋតែ៣១គ្រួសារប៉ុណ្ណោះដែលកំពុងរស់នៅក្នុងតំបន់អភិរក្សមួយនេះ។ លោកថា អាជ្ញាធរខេត្តនិងស្រុក កំពុងរៀបចំទីតាំងថ្មី ដើម្បីឱ្យពលរដ្ឋទៅរស់នៅផុតពីតំបន់អភិរក្សនេះ។
លោកបន្ថែមថា៖ «អាជ្ញាធរខេត្តយើងតែងតែយកចិត្តទុកដាក់នូវអ្វីដែលមានបទល្មើសនៅក្នុងតំបន់ការពារឧទ្យានប្ញស្សីត្រឹបនោះ។ កន្លងមក យើងបានដោះស្រាយបញ្ហាជាច្រើននៅក្នុងតំបន់នោះ ប៉ុន្តែយើងឃើញពលរដ្ឋ៣១គ្រួសារប៉ុណ្ណោះដែលពួកគាត់ទៅរស់នៅតំបន់នោះ ក្រោយពីចេញព្រះរាជក្រឹត្យហើយ មន្ត្រីជំនាញយើងកំពុងសិក្សាស្រាវជ្រាវដោះស្រាយគាត់ចេញពីតំបន់នោះទៅនៅតំបន់ផ្សេង»។
បើតាមអភិបាលរងខេត្តរូបនេះ មានពលរដ្ឋចំនួន៧គ្រួសារបានស្ម័គ្រចិត្តរុះរើផ្ទះចេញពីតំបន់អភិរក្សនេះហើយ ដែលករណីនេះ លោកស្នើជាថ្មីដល់ពលរដ្ឋដែលនៅសេសសល់ ចូលរួមសហការក្នុងការរុះរើលំនៅឋានចេញពីតំបន់នោះទៅកាន់ទីតាំងថ្មីដែលអាជ្ញាធរបានរៀបចំជូន។
មេឃុំឆែប លោក ហ៊ឹម យ៉ាន ឱ្យដឹងកាលពីខែធ្នូថា មានពលរដ្ឋខ្លះបានស្ម័គ្រចិត្តរុះរើផ្ទះទៅកាន់ទីតាំងថ្មីលើដីទំហំប្រមាណ១០ហិកតាដែលអាជ្ញាធរខេត្តបានរៀបចំជូនពួកគាត់ ប៉ុន្តែនៅមានពលរដ្ឋ១២គ្រួសារដែលមិនព្រមចាកចេញដោយទាមទារសំណងផ្សេងៗ ខណៈពលរដ្ឋមួយចំនួនតូចហាក់មិនសូវអើពើនឹងការស្នើឱ្យដោះដូរទីតាំងនេះ។
ប្រធានមន្ទីរបរិស្ថានខេត្តព្រះវិហារ លោក សុង ច័ន្ទសុជាតិ មានប្រសាសន៍នៅថ្ងៃនេះថា មន្ត្រីបរិស្ថាន ធ្លាប់បានចាប់និងឃាត់ខ្លួនជនល្មើសដែលទៅកាប់ឈើចេញពីឧទ្យានជាតិនេះជាច្រើនករណីដែរ ដោយបានដកហូតឈើ អប់រំ និងឱ្យពួកគាត់ធ្វើកិច្ចសន្យាបញ្ឈប់សកម្មភាពល្មើសច្បាប់នេះ ប៉ុន្តែមិនបានកសាងសំណុំរឿងទៅតុលាការនោះទេ។ លោកបន្តថា បញ្ហាដែលពិបាកក្នុងការការពារព្រៃឈើនៅតំបន់នោះ ដោយសារតែមន្ត្រីឧទ្យានុរក្សមានចំនួនតិច ខណៈតំបន់ដែលត្រូវការពារមានទំហំធំ។
លោកបន្ថែមថា៖ «ឈ្មួញឈើមិនដែលចេញមុខទេ ចំពោះការចូលកាប់ឈើនេះ។ ជាធម្មតា គឺប្រជាពលរដ្ឋអ្នកនៅមូលដ្ឋានហ្នឹងឯងដែលចូលទៅកាប់ ហើយពេលដែលយើងចាប់ឃាត់ ហើយយើងសួរនាំគាត់ គឺចម្លើយនៅតែដដែល គឺកាប់ឈើនោះយកមកប្រើប្រាស់តម្រូវការរបស់គាត់ធ្វើផ្ទះសម្បែង។ អ៊ីចឹងបញ្ហានេះហើយដែលយើងពិបាកស្វែងរកមេខ្លោងឬឈ្មួញឈើនោះ»។
សកម្មជនការពារព្រៃឈើនៅសហគមន៍ព្រៃឡង់ខេត្តព្រះវិហារ លោក ស្រី ថី និយាយថា ដើម្បីទប់ស្កាត់បទល្មើសព្រៃឈើឱ្យមានប្រសិទ្ធភាព លុះត្រាតែអាជ្ញាធរពង្រឹងការអនុវត្តច្បាប់ ហើយរដ្ឋាភិបាលត្រូវលុបបំបាត់អំពើពុករលួយនៅតាមច្រកចេញចូលតំបន់ការពារ។
លោកបន្ថែមថា៖ «បញ្ហាទប់ស្កាត់បទល្មើសព្រៃឈើមិនបាន ដោយសារមន្ត្រីមិនយកចិត្តទុកដាក់ក្នុងការការពារ និងមានអំពើពុករលួយ។ ខ្ញុំឃើញប៉ុន្មានខែចុងក្រោយនេះ មានមន្ត្រីយាមតាមផ្លូវ ហើយជនល្មើសដឹកឈើឆ្លងកាត់ផ្លូវនោះ គេអត់ចាប់ទេ គេឱ្យតែលុយហើយៗ។ អ៊ីចឹងទង្វើនោះហើយដែលធ្វើឱ្យមានការដឹកឈើចេញទាំងយប់ទាំងថ្ងៃនោះ អ៊ីចឹងរដ្ឋាភិបាលត្រូវពិនិត្យលើករណីនេះឡើងវិញ»។
មន្ត្រីសមាគមការពារសិទ្ធិមនុស្សអាដហុកប្រចាំខេត្តព្រះវិហារ លោក ឡោ ចាន់ បានគាំទ្រឱ្យមានការជម្លៀសពលរដ្ឋពីតំបន់ការពារនោះ ប៉ុន្តែលោកស្នើឱ្យអាជ្ញាធរគិតទៅលើជីវភាពរបស់ប្រជាពលរដ្ឋ និងត្រូវរៀបចំហេដ្ឋារចនាសម្ព័ន្ធជូនពលរដ្ឋឱ្យបានគ្រប់គ្រាន់នៅទីតាំងថ្មីដែលផ្លាស់ប្តូរនោះ។
មន្ត្រីសិទ្ធិមនុស្សរូបនេះលើកឡើងថា ដើម្បីទប់ស្កាត់បទល្មើសព្រៃឈើនៅតំបន់នោះឱ្យមានប្រសិទ្ធភាព អាជ្ញាធរត្រូវបង្កើតការងារឱ្យពលរដ្ឋធ្វើនៅក្នុងតំបន់ឱទ្យាននោះ និងត្រូវបង្ក្រាបរាល់បទល្មើសព្រៃឈើឱ្យមានប្រសិទ្ធភាព។
លោកបន្ថែមថា៖ «ពីព្រោះប្រសិនជាអត់មានឈ្មួញកណ្តាលសម្រាប់ទិញឬក៏ជួលគាត់ឱ្យកាប់ឈើទេ ប្រហែលពួកគាត់អត់អាចទៅកាប់ឈើបានទេ»។
ឧទ្យានជាតិតេជោសែនប្ញស្សីត្រឹប មានផ្ទៃដីសរុប១១,៤៣៥គីឡូម៉ែត្រក្រឡា ស្ថិតក្នុងស្រុកឆែប ខេត្តព្រះវិហារ ត្រូវបានបង្កើតឡើងដោយព្រះរាជក្រឹត្យ កាលពីថ្ងៃទី១៧ ខែមេសា ឆ្នាំ២០១៤ ដែលស្ថិតក្រោមការគ្រប់គ្រងផ្ទាល់របស់រាជបណ្ឌិត្យសភាកម្ពុជា។
បើតាមលោក សុខ ទូច ឧទ្យាននេះមានតំបន់ជីវចម្រុះនិងសក្តានុពលជាច្រើន ដូចជា ធនធានព្រៃឈើ សត្វព្រៃ វត្ថុបុរាណ ដែលអាចបម្រើដល់មុខងារក្នុងបរិស្ថាន ព្រៃឈើ វប្បធម៌ ប្រវត្តិសាស្ត្រ និងទេសចរណ៍ដ៏ទាក់ទាញ៕