ក្រសួងរៀបចំដែនដី នគរូបនីយកម្ម និងសំណង់ ស្នើក្រសួងស្ថាប័នដែលជាអាជ្ញាធរកាន់កាប់ដីរដ្ឋ និងរដ្ឋបាលរាជធានីខេត្ត ឱ្យសហការនិងផ្ទៀងផ្ទាត់ក្បាលដីជាមួយមន្ត្រីសុរិយោដី ពេលចុះអង្កេតវាស់វែងនិងកំណត់ព្រំដី ដើម្បីចៀសវាងការកើតមានវិវាទដីធ្លី។
ការស្នើនេះបានធ្វើឡើងតាមរយៈលិខិតរបស់រដ្ឋមន្ត្រីក្រសួងរៀបចំដែនដី លោក ជា សុផារ៉ា ផ្ញើជូនក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ចនិងហិរញ្ញវត្ថុ ប្រធានក្រសួងស្ថាប័នដែលជាអាជ្ញាធរកាន់កាប់ដីរដ្ឋ និងអភិបាលរាជធានី-ខេត្ត នៅថ្ងៃទី១៨ ខែមករា ឆ្នាំ២០២១នេះ។
លិខិតនោះបានលើកឡើងថា កន្លងមក ក្រសួងរៀបចំដែនដីបានសង្កេតឃើញមានករណីនៃការវាស់វែងនិងកំណត់ព្រំក្បាលដីក្នុងគោលដៅផ្តល់កម្មសិទ្ធិនិងសិទ្ធិជួលដីឯកជនរបស់រដ្ឋ ដោយគ្មានការពិនិត្យនិងផ្ទៀងផ្ទាត់ពីរដ្ឋបាលសុរិយោដី ដែលធ្វើឱ្យនិយាមការនៃក្បាលដីខ្វះភាពសុក្រឹត្យ ជាន់ក្បាលដីគ្នានិងបង្កឱ្យមានវិវាទដីធ្លី។
ដើម្បីចៀសវាងបញ្ហាទាំងនេះ ក្រសួងរៀបចំដែនដី បានស្នើដល់ក្រសួងស្ថាប័នដែលជាអាជ្ញាធរកាន់កាប់ដីរដ្ឋ និងរដ្ឋបាលរាជធានី-ខេត្ត នៅពេលចុះអង្កេតវាស់វែងក្បាលដី ត្រូវមានការចូលរួមអនុវត្តនិងផ្ទៀងផ្ទាត់ដោយរដ្ឋបាលសុរិយោដី ដែលជាអង្គភាពមានសមត្ថកិច្ចតែមួយគត់ ក្នុងការវាស់វែងកំណត់ព្រំក្បាលដីស្របតាមច្បាប់ភូមិបាល។
ក្រសួងបានណែនាំបន្តថា រាល់ទិន្នន័យវាស់វែងក្បាលដីក្នុងគោលដៅស្នើសុំគោលការណ៍រាជរដ្ឋាភិបាល ដើម្បីផ្តល់កម្មសិទ្ធិនិងសិទ្ធជួលដីឯកជនរបស់រដ្ឋ ត្រូវបញ្ជូនទៅអគ្គនាយកដ្ឋានសុរិយោដី និងភូមិសាស្រ្តរបស់ក្រសួង ដើម្បីពិនិត្យផ្ទៀងផ្ទាត់ជាមុន ហើយរាល់ការជួលដីឯកជនរបស់រដ្ឋ ត្រូវចុះបញ្ជីចេញបណ្ណកម្មសិទ្ធិជាដីឯកជនរបស់រដ្ឋជាមុនដែរ។
ក្រសួងក៏បានតម្រូវឱ្យរដ្ឋបាលរាជធានី-ខេត្ត ត្រូវប្រគល់ភារកិច្ចឱ្យមន្ទីររៀបចំដែនដីរាជធានី-ខេត្ត ក្នុងការចុះវាស់វែងកំណត់និយាមការ និងផ្ទៀងផ្ទាត់ជាមួយប្រព័ន្ធមូលដ្ឋានទិន្នន័យសុរិយោដីផងដែរ៕