ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋបន្តរក្សានិងប្រើប្រាស់ទឹកដោយសន្សំសំចៃ ខណៈការព្យាករបង្ហាញថា បរិមាណទឹកភ្លៀងដែលធ្លាក់មកនៅរដូវប្រាំងនិងដើមរដូវវស្សា មិនគ្រប់គ្រាន់សម្រាប់តម្រូវការប្រើប្រាស់ភ្លាមៗ។
សេចក្តីជូនដំណឹងរបស់ក្រសួង ចុះផ្សាយនៅថ្ងៃទី១៨ ខែមករា ឆ្នាំ២០២១នេះ បានលើកឡើងថា ផ្អែកតាមការវាយតម្លៃពីអន្តរជាតិ ក៏ដូចជាតំបន់ បង្ហាញថា កម្ពុជានឹងទទួលរងឥទ្ធិពលពីបាតុភូត អែនសូ (ENSO) ខណៈបច្ចុប្បន្នកម្ពុជាកំពុងរងបាតុភូតធម្មជាតិ២ដែលមានឈ្មោះថា La Naina ត្រជាក់៥០ភាគរយ និងបាតុភូត Neutral ក្តៅត្រជាក់៥០ភាគរយ ដែលបាតុភូតទាំងពីរនេះបានធ្វើឱ្យអាកាសធាតុសម្រាប់រដូវប្រាំងនិងដើមរដូវវស្សាឆ្នាំ២០២១នេះ អាចនឹងមានលក្ខណៈអំណោយផលល្អ។
ក្រសួងបញ្ជាក់ថា ក្នុងខែមេសា និងដើមរដូវវស្សា អាចនឹងមានភ្លៀងកក់ខែច្រើន តែបរិមាណទឹកភ្លៀងដែលធ្លាក់មកគឺមិនទាន់សមល្មមសម្រាប់ប្រើប្រាស់ឆ្លើយតបទៅតាមតម្រូវការភ្លាមៗនោះទេ។
ករណីនេះ ក្រសួងបានអំពាវនាវឱ្យប្រជាពលរដ្ឋបន្តរក្សាទឹកនិងប្រើប្រាស់ទឹកដោយសន្សំសំចៃ ជាពិសេសតំបន់ជនបទដាច់ស្រយាលនៅឆ្ងាយពីប្រភពទឹក។
ចំពោះស្ថានភាពសីតុណ្ហភាព ក្រសួងថា ក្នុងខែកុម្ភៈ សីតុណ្ហភាពអប្បបរមានឹងអាចស្ថិតនៅក្នុងរង្វង់ពី១៣ទៅ២២អង្សាសេ សីតុណ្ហភាពមធ្យមអតិបរមាអាចនឹងកើនឡើងពី៣០ទៅ៣៧អង្សាសេ អាស្រ័យទៅតាមតំបន់ ខណៈពីខែមីនាដល់ខែមេសា ធាតុអាកាសនឹងកើនកម្តៅជាបន្តបន្ទាប់ ក្នុងនោះកម្រិតសីតុណ្ហភាពអតិបរមាអាចនឹងកើនឡើងខ្ពស់បំផុតក្នុងរង្វង់៣៩អង្សាសេ៕
