សិង្ហបុរី ជាប្រទេសមួយតូចជាងគេនៅតំបន់អាស៊ានក្នុងចំណោម១០ប្រទេស គឺមានទំហំជាង៧០០គីឡូម៉ែត្រការេ ដែលទំហំនេះប្រហាក់ប្រហែលទំហំរាជធានីភ្នំពេញ។
សិង្ហបុរី មានចំនួនប្រជាជនជិត៦លាននាក់ ហើយក៏ជាប្រទេសដែលមានការរីកចម្រើនស្ទើរគ្រប់វិស័យលេចធ្លោជាងគេនៅក្នុងតំបន់អាស៊ាន។
ត្បិតតែប្រទេសសិង្ហបុរីជាប្រទេសស្ថិតនៅលើដែនកោះ និងជាប្រទេសមានទំហំតូចជាងនៅតំបន់អាស៊ាន ហើយក៏ជាប្រទេសដែលមានផ្ទៃដីជាទីក្រុង១០០ភាគរយ គឺមិនមានផ្ទៃដីសម្រាប់ធ្វើកសិកម្មឬផ្ទៃដីនៅតំបន់ជនបទដូចប្រទេសផ្សេងៗទៀតនោះទេ។ ប៉ុន្តែចំពោះការអភិវឌ្ឍគឺប្រទេសនេះរៀបចំជាបឹង ជាប្រឡាយទឹក ជាតំបន់ឧទ្យានដាំព្រៃ និងរៀបកន្លែងឱ្យសត្វព្រៃរស់នៅ។
នៅក្នុងប្រទេសតូចជាងនៅក្នុងតំបន់អាស៊ានមួយនេះ ក្រៅពីទីតាំងដែលមានអគារខ្ពស់ៗ ក៏មានតំបន់អភិរក្សធនធានធម្មជាតិ រួមមាន ដើមឈើ សួនច្បារ បឹង និងប្រឡាយទឹក។
នៅលើបណ្តាញសង្គមហ្វេសប៊ុករបស់នាយករដ្ឋមន្ត្រីសិង្ហបុរី លោក លី សៀនឡុង គឺលោកតែងតែផ្សព្វផ្សាយរូបភាពបឹង ឬផ្លូវទឹក ឬដើមឈើ ដែលជាកន្លែងរូបលោកនិងប្រជាពលរដ្ឋផ្សេងទៀតចូលចិត្តធ្វើដំណើរដោយថ្មើរជើង ឬដើរហាត់ប្រាណនៅកន្លែងដែលមានបរិស្ថានល្អបែបនេះ។
លោក លី សៀនឡុង បានសរសេរសារនៅលើហ្វេសប៊ុករបស់លោក កាលពីថ្ងៃទី១៥ ខែមករា ដោយពិពណ៌នាពីគម្រោងជាច្រើនក្នុងការរៀបចំបឹងនិងប្រព័ន្ធប្រឡាយទឹកដែលមានដាំដើមឈើអមសងខាង។ លោកក៏បានលើកឡើងពីការរៀបចំប្រព័ន្ធផ្លូវទឹកនៅតំបន់ឈ្មោះ Junggol កាលពីឆ្នាំ២០០៧។
លោកបន្តថា ក្នុងរយៈពេល៩ឆ្នាំ ចាប់តាំងពីការបើកដំណើរការប្រព័ន្ធប្រឡាយទឹកនេះមក រួមទាំងមានការដាំដើមឈើបានធំឡើងពីមួយថ្ងៃទៅមួយថ្ងៃ ឃើញថា ប្រជាពលរដ្ឋមានការសប្បាយរីករាយនៅក្នុងស្ថានភាពបែបនេះ។
លោក លី សៀនឡុង៖ «ដើមឈើដែលយើងដាំនៅតាមបណ្តោយប្រឡាយទឹកអមផ្លូវទាំងនេះ បានលូតលាស់និងធំឡើងល្អ បានធ្វើឱ្យតំបន់ Punggol កាន់តែមានភាពស្រស់ស្រាយ មានទីតាំងពណ៌បៃតង បង្កើតជាកន្លែងលំហែកាយ និងកន្លែងដែលសត្វព្រៃរស់នៅ»។
នៅក្នុងប្រទេសនេះមានសត្វព្រៃចំនួន១១ប្រភេទដែលគេស្គាល់ រួមមានទាំងសត្វស្លាប សត្វក្នុងទឹក និងសត្វនៅលើគោក ក្នុងនោះមានទាំងសត្វខ្លានិងជ្រូកព្រៃផងដែរ។
ជាញឹកញាប់ លោក លី សៀនឡុង តែងតែផ្សព្វផ្សាយរូបភាពនៅលើហ្វេសប៊ុករបស់លោក ហើយសរសេរបញ្ជាក់ថា រូបភាពទាំងនេះលោកថតដោយខ្លួនឯង នៅពេលលោកដើរតាមផ្លូវក្បែរៗមាត់បឹងឬប្រឡាយទឹក។ លោកថា រូបលោកនិងប្រជាពលរដ្ឋផ្សេងទៀតបានសប្បាយរីករាយជាមួយបរិយាកាសបែបនេះ។
ពេលថ្លែងសារមួយចំនួនទៅកាន់ប្រជាពលរដ្ឋរបស់ខ្លួនក្នុងនាមជាថ្នាក់ដឹកនាំ លោក លី សៀនឡុង ក៏បានជ្រើសរើសយកទីតាំងដែលមានដើមឈើនៅក្បែរបឹង ដើម្បីថតជាវីដេអូថ្លែងសារទៀតផង។
នៅក្នុងប្រទេសសិង្ហបុរីមានបឹងធម្មជាតិចំនួន៥ ដូចជា បឹង Jurong, Symphony, Swann, MacRitchie, និងបឹង Bedok ដែលបឹងទាំងនេះមានដើមឈើដុះអមជុំវិញ និងមានការរៀបចំបន្ថែមតាមលក្ខណៈបែបធម្មជាតិ ហើយបានទាក់ទាញទាំងភ្ញៀវទេសចរជាតិនិងអន្តរជាតិទៅទីតាំងទាំងនោះ។ ទីតាំងទាំងនោះបានក្លាយទៅជាកន្លែងដែលគេដើរកម្សាន្ត ស្រូបយកខ្យល់អាកាសបរិសុទ្ធ និងជាកន្លែងហាត់ប្រាណដើម្បីសុខភាព។
ចំពោះផ្លូវសម្រាប់ដើរថ្មើរជើងមានចំនួន១១ នៅតាមប្រឡាយទឹកនិងនៅក្បែរមាត់បឹងមានដើមឈើដុះអមពេញ និយមសម្រាប់អ្នកដើរកម្សាន្តនិងការធ្វើដំណើរ។
នៅក្នុងប្រទេសសិង្ហបុរី ក៏បានថែរក្សានិងរៀបចំធ្វើឱ្យប្រសើរឡើងជាបន្តបន្ទាប់ចំពោះអាងស្តុកទឹកដែលមានអាយុកាលចាស់ជាងគេនៅក្នុងប្រទេសនេះ ដែលកសាងឡើងដោយចក្រភពអង់គ្លេសនៅឆ្នាំ១៨៨៩។
អាងដែលមានឈ្មោះ Bukit Timah លោក លី សៀនឡុង អះអាងថា បានដើរតួនាទីយ៉ាងសំខាន់នៅក្នុងប្រទេសសិង្ហបុរី ដោយជួយរំដោះទឹកពេលមានទឹកច្រើន និងជួយបែងចែកទឹកទៅកាន់ទីតាំងផ្សេងៗទៀតទៅតាមតម្រូវការប្រើប្រាស់របស់ប្រជាជន។
តើមូលហេតុអ្វីបានជាប្រទេសសិង្ហបុរីជាប្រទេសតូច ហើយនៅរក្សាឬពង្រីកបន្ថែមចំនួនបឹងនិងផ្លូវទឹកទៅវិញ?
ចម្លើយចំពោះសំនួរនេះ មូលហេតុមួយដូចលោកនាយករដ្ឋមន្ត្រី លី សៀនឡុង លើកឡើង គឺដើម្បីគ្រប់គ្រងទឹក ការពារកុំឱ្យមានការជន់លិចពេលទឹកកើនឡើងច្រើន និងដើម្បីងាយស្រួលក្នុងការបែងចែកទឹកពេលទឹកថយចុះ ធានាដល់ការប្រើប្រាស់បានគ្រប់គ្រាន់។
នៅលើគេហទំព័ររបស់ Lake Home Really មើលឃើញថា តួនាទីរបស់បឹងនៅក្នុងទីក្រុង ក្រៅពីការរក្សានិងគ្រប់គ្រងទឹកជំនន់ ក៏បានដើរតួនាទីសំខាន់សម្រាប់ការកម្សាន្តនិងការបង្កើតអាជីវកម្មផងដែរ។ បឹងជាកន្លែងដែលមានភាពស្រស់ស្រាយ ហើយមានភ្ញៀវទេសចរទៅលេង ក៏បង្កើតជាតម្រូវការផ្សេងៗ ហើយក៏ជាឱកាសនៃការបង្កើតអាជីវកម្មដើម្បីបំពេញតម្រូវការដល់ភ្ញៀវទេសចរទាំងនោះដែរ។
ចំណុចសំខាន់មួយទៀត ជួយដល់សុខភាពផ្លូវកាយនិងផ្លូវចិត្ត ដោយសារមនុស្សអាចមានការកម្សាន្តនិងលំហែកាយបានគ្រប់គ្រាន់។ ចំពោះសុខភាពផ្លូវចិត្តនិងផ្លូវកាយល្អអាចនាំឱ្យមនុស្សកាត់បន្ថយការប្រព្រឹត្តបទល្មើស និងអាចធ្វើសកម្មភាពល្អដែលជំរុញដល់ភាពប្រសើរឡើងនៅក្នុងសង្គម។
បើយើងងាកមកពិនិត្យលើស្ថានភាពប្រទេសវិញ សិង្ហបុរីជាប់ឈ្មោះជាប្រទេសដែលមានទេសភាពស្អាត ដែលអ្នកខ្លះហៅថាជាទីក្រុងឋានសួគ៌។ សិង្ហបុរីបានក្លាយជាគោលដៅនៃភ្ញៀវទេសចរ ហើយក៏ជាគោលដៅរបស់អ្នកមានទ្រព្យនៅក្នុងតំបន់និងពិភពលោក ទៅទិញផ្ទះដើម្បីរស់នៅ ទោះជាផ្ទះនៅទីនោះមានតម្លៃខ្ពស់ក៏ដោយ។
ទាំងរដ្ឋាភិបាលនិងក្រុមហ៊ុនទេសចរណ៍បានប្រើប្រាស់រូបភាពសម្រស់ផ្ទៃបឹងជាមធ្យោបាយមួយក្នុងចំណោមមធ្យោបាយផ្សេងទៀតសម្រាប់ទាក់ទាញភ្ញៀវទេសចរ។
Marina Bay ជាទីតាំងពេញនិយមសម្រាប់ភ្ញៀវទេសចរនៅក្នុងប្រទេសសិង្ហបុរី ទីនេះក្រៅពីមានផ្ទៃទឹកសមុទ្រនៅខាងមុខសម្រាប់ភ្ញៀវទេសចរថតយករូបភាពភ្ជាប់ជាមួយអគារដែលមានរូបដូចទូកនៅខាងលើនោះ នៅបរិវេណខាងក្រោយ មានឧទ្យានដែលមានបឹង មានព្រៃឈើ មានសត្វព្រៃច្រើនប្រភេទទៀត ដែលទាក់ទាញភ្ញៀវទេសចរមួយចំនួនធំឱ្យចំណាយពេលដើរកម្សាន្តមើលព្រៃនិងបឹងទាំងនោះ៕
