ក្រសួងព័ត៌មាន ឱ្យដឹងថា ក្នុងឆ្នាំ២០២០ ក្រសួងបានស្រាវជ្រាវរកឃើញគណនីហ្វេសប៊ុក (Facebook) ប្រមាណ២០០គណនី បានបង្ហោះព័ត៌មានក្លែងក្លាយ ញុះញង់ និងជេរប្រមាថព្រះមហាក្សត្រនិងថ្នាក់ដឹកនាំរដ្ឋាភិបាល។
អ្នកនាំពាក្យក្រសួងព័ត៌មាន លោក ផុស សុវណ្ណ មានប្រសាសន៍នៅថ្ងៃទី២១ ខែមករា ឆ្នាំ២០២១នេះថា តាមរបាយការណ៍ដែលក្រសួងបានស្រាវជ្រាវនោះ ក្រុមដែលលួចបង្កើតគណនីហ្វេសប៊ុក (Facebook Account) និងទំព័រហ្វេសប៊ុក (Facebook Page) ក្លែងក្លាយទាំងនោះ មានទាំងអ្នករស់នៅក្នុងប្រទេសនិងក្រៅប្រទេស ដោយពួកគេបានបង្ហោះព័ត៌មានក្លែងក្លាយជាច្រើន ជាពិសេសរឿងពាក់ព័ន្ធនឹងជំងឺកូវីដ១៩ ព័ត៌មានបែបញុះញង់ ជេរប្រមាថព្រះមហាក្សត្រ រដ្ឋាភិបាល និងមន្ត្រីជាន់ខ្ពស់រដ្ឋាភិបាលមួយចំនួនទៀត ដែលសរុបមាន១ ៣៤៣ករណី។
ពាក់ព័ន្ធនឹងករណីនេះ លោក ផុស សុណ្ណ បញ្ជាក់ថា ក្រសួងព័ត៌មានបានបញ្ជូនឈ្មោះគណនីហ្វេសប៊ុកទាំងនោះទៅក្រសួងមហាផ្ទៃហើយ ដើម្បីស្រាវជ្រាវនិងចាត់វិធានការតាមផ្លូវច្បាប់។
លោកមានប្រសាសន៍ថា៖ «យើងធ្វើរាល់ថ្ងៃ យើងបន្សាប យើងយកព័ត៌មានពិតមកជំនួសព័ត៌មានកន្លែងដែលគាត់ផ្សាយ។ ហើយវិធីសាស្ត្រមួយទៀត យើងផ្តល់ជូនទៅសមត្ថកិច្ចឱ្យគាត់មានវិធានការ ឱ្យគាត់ធ្វើយ៉ាងម៉េចអនុវត្តច្បាប់ដែលនៅមានជាធរមាន»។
យោងតាមរបាយការណ៍របស់ក្រសួងព័ត៌មាន កាលពីថ្ងៃទី១១ ខែមីនា ឆ្នាំ២០២០ ឱ្យដឹងថា ក្រោយពីបានរកឃើញគណនីហ្វេសប៊ុកដែលបង្ហោះព័ត៌មានក្លែងក្លាយទាំងនោះ ក្រសួងក៏បានជូនដំណឹងទៅក្រសួងស្ថាប័នពាក់ព័ន្ធឱ្យបានដឹងផងដែរ ក្នុងនោះ បានផ្ញើទៅអគ្គនាយកដ្ឋានព័ត៌មាននិងសោតទស្សន៍ ចំនួន៤៩ករណី អគ្គស្នងការនគរបាលជាតិ ចំនួន៣៦ករណី និយ័តទូរគមនាគមន៍ ចំនួន២ករណី និងរាយការណ៍ (report) ទៅក្រុមហ៊ុនហ្វេសប៊ុក ចំនួន៨ករណី។
ក្រសួងបន្តថា ក្រៅពីនោះ ក្រសួងក៏បានធ្វើការអប់រំណែនាំដល់ប្រព័ន្ធផ្សព្វផ្សាយដែលបានផ្សាយព័ត៌មានមិនពិតនិងមិនគោរពក្រមសីលធម៌វិជ្ជាជីវៈសារព័ត៌មានចំនួន២អង្គភាព និងលុបចោលអាជ្ញាបណ្ណប្រព័ន្ធផ្សព្វផ្សាយដែលផ្សាយព័ត៌មានបំពានច្បាប់ធ្ងន់ធ្ងរចំនួន៣អង្គភាពផងដែរ ដូចជា គេហទំព័រចក្រវឡ, TV អនឡាញ, គេហទំព័រ TVFB និង គេហទំព័រនិងវិទ្យុរិទ្ធិសែនជាដើម។
លោកនាយករដ្ឋមន្ត្រី ហ៊ុន សែន កាលពីថ្ងៃ១៦ ខែមេសា ឆ្នាំ២០២០ បានសរសេរនៅលើហ្វេសប៊ុករបស់លោកថា ក្នុងពេលដែលរាជរដ្ឋាភិបាលកម្ពុជាបានដាក់ចេញនូវយុទ្ធសាស្រ្តប្រយុទ្ធប្រឆាំងនឹងជំងឺកូវីដ-១៩ ក៏មានអ្នកបង្កើត Profile និង Page មិនពិតជាច្រើនក្នុងហ្វេសប៊ុក ដោយដាក់ឈ្មោះ «សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា» ក្នុងចេតនាមិនល្អ រួមទាំងបង្ហោះសារនិងប្រឌិតនូវព័ត៌មានមិនពិតជាច្រើន ដើម្បីបោកប្រាស់ បំភ័ន្តភ្នែកសាធារណជន ក្នុងគោលបំណងបំពុលសង្គមជាតិផងដែរ។
អ្នកនាំពាក្យក្រសួងមហាផ្ទៃ លោក ផាត សុផានិត មានប្រសាសន៍ថា ក្រសួងនៅមិនទាន់ទទួលបានសំណើឬការជូនដំណឹងផ្លូវការពីក្រសួងព័ត៌មាននៅឡើយ ហើយចំពោះចំណាត់ការបង្ក្រាបយ៉ាងណានោះ លោកបានជំរុញឱ្យសួរទៅនាយកដ្ឋានប្រឆាំងបទល្មើសបច្ចេកវិទ្យាវិញ។
ប្រធាននាយកដ្ឋានបទល្មើសបច្ចេកវិទ្យានៃក្រសួងមហាផ្ទៃ លោក ជា ពៅ បានបដិសេធអត្ថាធិប្បាយ ដោយមានប្រសាសន៍យ៉ាងខ្លីថា៖ «ខ្ញុំឆ្លើយអត់បានទេ! ខ្ញុំថ្នាក់អគ្គ អញ្ចឹងវាមានថ្នាក់អគ្គផ្សេងៗទៀតគេស្រាវជ្រាវទៀតដែរ មាននាយកដ្ឋានផ្សេងៗទៀតក្រោមក្រសួង សុំសួរទៅអ្នកនាំពាក្យក្រសួង [មហាផ្ទៃ] បានព័ត៌មានច្បាស់ជាង»។
រីឯអ្នកនាំពាក្យក្រសួងប្រៃសណីយ៍ និងទូរគមនាគមន៍ លោក មាស ប៉ូ ពុំអាចសុំការបំភ្លឺជុំវិញករណីនេះបានទេ នៅថ្ងៃនេះ។
នាយកប្រតិបត្តិវិទ្យាស្ថានប្រជាធិបតេយ្យកម្ពុជា និងជាអ្នកវិភាគ លោក ប៉ា ចន្ទរឿន សង្កេតឃើញថា ក្រោយពីមានការរំលាយអតីតគណបក្សសង្គ្រោះជាតិ អ្នកប្រើប្រាស់បណ្តាញសង្គមមួយចំនួនតែងតែបង្កើតឈ្មោះហ្វេសប៊ុកដាក់ឈ្មោះអ្នកដទៃ ដើម្បីវាយប្រហារថ្នាក់ដឹកនាំរដ្ឋាភិបាលជាដើម។
ករណីនេះ លោកថា មិនគាំទ្រនឹងការជេរប្រមាថ ញុះញង់ និងគំរាមកំហែងគ្រប់រូបភាពតាមរយៈការប្រើប្រាស់បណ្តាញសង្គមបែបនេះទេ និងបានអំពាវនាវដល់អ្នកប្រើប្រាស់បណ្តាញសង្គម ត្រូវមានសីលធម៌និងចែកចាយនូវព័ត៌មានពិត។
ទោះជាយ៉ាងណា លោក ប៉ា ចន្ទរឿន ស្នើថា មុននឹងចាត់វិធានការច្បាប់ឬស្នើទៅក្រុមហ៊ុនហ្វេសប៊ុកបិទគណនីអ្នកដែលរិះគន់ថ្នាក់ដឹកនាំនោះ រដ្ឋាភិបាលនិងស្ថាប័នជំនាញគួរតែធ្វើការស្រាវជ្រាវឱ្យបានច្បាស់លាស់ជាមុនសិន ដើម្បីចៀសវាងប៉ះពាល់ដល់សេរីភាពបញ្ចេញមតិ ។
លោកមានប្រសាសន៍ថា៖ «រាល់ចំណាត់ការក្នុងការបិទប្រកាសស្នើទៅក្រុមហ៊ុនហ្វេសប៊ុក នៅក្នុងការបិទគណនីហ្វេសប៊ុកណាមួយ គឺត្រូវធ្វើដោយតម្លាភាព ប្រកាន់យកយុត្តិធម៌ជាគោល ទើបមិនបង្ក មិនប៉ះពាល់ទៅដល់សិទ្ធិសេរីភាពអ្នកដទៃទៀត ក្នុងការប្រើប្រាស់បណ្តាញសង្គម ក្រោមគំនាបណាមួយនៃអ្នកនយោបាយ»។
តាមរបាយការណ៍របស់និយ័តករទូរគមនាគមន៍កម្ពុជា ឱ្យដឹងថា គិតត្រឹមឆមាសទី១ ឆ្នាំ២០២០ នៅក្នុងប្រទេសកម្ពុជា មានអ្នកប្រើអ៊ីនធឺណិត សរុបជាង១៥លាននាក់ និងអ្នកប្រើប្រាស់គណនីហ្វេសប៊ុកសរុបជាង១០លានគណនី៕