ក្រសួងកសិកម្ម ព្រមានចាត់វិធានការច្បាប់លើជនណាដែលកាប់រុករានឬដុតព្រៃយកដីធ្វើកសិកម្ម ចាប់សត្វ និងតាំងលំនៅដ្ឋានថ្មី ដែលនាំឱ្យប៉ះពាល់ដល់បរិស្ថាននិងសេដ្ឋកិច្ចជាតិ។
ក្នុងសេចក្តីណែនាំរបស់ក្រសួងកសិកម្ម រុក្ខប្រមាញ់ និងនេសាទ ដែលបានផ្សព្វផ្សាយនៅថ្ងៃទី២១ ខែមករា ឆ្នាំ២០២១ បានលើកឡើងថា កត្តាចម្បងដែលបង្កឱ្យមានភ្លើងឆេះព្រៃ ដោយសារសកម្មភាពរបស់មនុស្ស ដូចជា កាប់ឆ្ការដុតរានព្រៃដើម្បីដាំដំណាំកសិកម្មផ្សេងៗ ការធ្វើកសិកម្មពនេចរ ការតាំងលំនៅដ្ឋានថ្មី ការដុតព្រៃដើម្បីចាប់សត្វ ការបន្សល់ភ្លើងនៅក្នុងព្រៃធ្វើឱ្យប៉ះពាល់ដល់ធនធានធម្មជាតិ ឆេះស្រូវ និងឆេះផ្ទះនៅក្នុងភូមិប្រជាពលរដ្ឋ ជាដើម។
ក្រសួងបន្តថា ករណីនេះបានបង្កវិនាសកម្មនិងបណ្តាលឱ្យខាតបង់ធ្ងន់ធ្ងរដល់សង្គម សេដ្ឋកិច្ចជនបទ សេដ្ឋកិច្ចជាតិ និងបរិស្ថាន ជាដើម ។
ករណីនេះ ក្រសួងកសិកម្មធ្វើការណែនាំដល់ប្រធានគណៈកម្មាធិការគ្រប់គ្រងដីរដ្ឋថ្នាក់រាជធានី-ខេត្ត មន្ទីរកសិកម្ម រុក្ខាប្រមាញ់ និងនេសាទ ត្រូវចាត់វិធានការច្បាប់លើជនណាដែលបានរុករាន ដុតព្រៃនិងកាន់កាប់ដីព្រៃឈើដែលឆេះដោយអនាធិបតេយ្យ ផ្ទុយនឹងច្បាប់និងបទបញ្ជានានារបស់រដ្ឋាភិបាល។
ក្រសួងបញ្ជាក់ថា ដីព្រៃឈើនិងព្រៃលិចទឹកដែលឆេះរួច ត្រូវថែរក្សាទុកឱ្យរុក្ខជាតិដុះឡើងវិញតាមលក្ខណៈធម្មជាតិ។
បន្ថែមពីនេះ ក្រសួងកសិកម្មក៏ជូនដំណឹងទៅសហគមន៍ព្រៃឈើ សហគមន៍នេសាទ និងសហគមន៍កសិកម្មទាំងអស់ អនុវត្តវិធានការទប់ស្កាត់ការប្រើប្រាស់ភ្លើងឆេះជាមធ្យោបាយយកឃ្មុំ ការដុតស្ទាក់ចាប់សត្វ ដុតវាលស្មៅយកល្បាស់ធ្វើចំណីសត្វ ដុតព្រៃពង្រីកដីដាំដំណាំកសិកម្ម និងអ្នកដុតរណ្តៅជ័រយកជ័រច្បោះ ត្រូវពន្លត់ភ្លើងមុនចាកចេញពីតំបន់នោះទើបទទួលបានផលវិជ្ជមានខ្ពស់។
យោងតាមច្បាប់ស្តីពីព្រៃឈើនិងច្បាប់ស្តីពីជលផល ចែងថា ប្រជាពលរដ្ឋ កងកម្លាំងប្រដាប់អាវុធ និងអាជ្ញាធរដែនដីគ្រប់ថ្នាក់ ត្រូវមានករណីយកិច្ចថែរក្សាព្រៃឈើ បង្ការ និងប្រយុទ្ធនឹងភ្លើងឆេះព្រៃ ការពារជម្រកមច្ឆជាតិ នៅតាមមូលដ្ឋានរៀងៗខ្លួនជាដើម។
មាត្រា៩៧ នៃច្បាប់ស្តីពីព្រៃឈើ និងមាត្រា៩៨ នៃច្បាប់ស្តីពីជលផល បានចែងថា ជនណាដែលប្រព្រឹត្តឬបង្កឱ្យឆេះព្រៃឬភ្លើងឆេះព្រៃលិចទឹកដោយចេតនា ត្រូវផ្តន្ទាទោសក្រោមបទល្មើសព្រៃឈើថ្នាក់ទី១ ឬបទល្មើសជលផលថ្នាក់ទី១ ដែលត្រូវជាប់ពន្ធនាគារពី៣ឆ្នាំទៅ៥ឆ្នាំ ឬពី៥ឆ្នាំទៅ១០ឆ្នាំ៕