ថ្នាក់ដឹកនាំសង្ឃក្នុងខេត្តក្រចេះ សម្តែងការមិនសប្បាយចិត្តនិងព្រមានលាលែងពីតួនាទី ក្រោយពីគណៈសង្ឃនាយកប្រកាសតែងតាំងអតីតព្រះគ្រូចៅអធិការវត្តសសរ១០០ ដែលធ្លាប់រងការចោទថា បានធ្វើឱ្យវត្តជាប់បំណុលចំនួន២២ម៉ឺនដុល្លារនិងមិនទាន់បានដោះស្រាយ ឱ្យធ្វើជាព្រះគ្រូចៅអធិការវត្តនេះឡើងវិញ។
កាលពីចុងខែសីហា ឆ្នាំ២០២០ សម្តេចព្រះសង្ឃនាយក នន្ទ ង៉ែត បានសម្រេចបញ្ចប់តួនាទីព្រះគ្រូចៅអធិការវត្តព្រះវិហារធំសសរ១០០ ពីព្រះតេជគុណ អេង ផល្លា និងបានព្យួរតួនាទីជាអនុគណស្រុកសំបូរផងដែរ ក្រោយពីព្រះអង្គត្រូវបានគណៈកម្មការវត្តនិងពុទ្ធបរិស័ទចំណុះជើងវត្តមួយចំនួនចោទប្រកាន់ថា បានប្រើប្រាស់ថវិកាបច្ច័យខ្វះតម្លាភាពនិងធ្វើឱ្យវត្តជំពាក់បំណុលចំនួន២២ម៉ឺនដុល្លារ។
ប៉ុន្តែនៅថ្ងៃទី៨ ខែមករា ឆ្នាំ២០២១ សម្តេចព្រះសង្ឃនាយក នន្ទ ង៉ែត បានចេញសង្ឃប្រកាសផ្តល់តួនាទីជាព្រះគ្រូចៅអធិការវត្តព្រះវិហារធំសសរ១០០ ដល់ព្រះតេជគុណ អេង ផល្លា ជាថ្មី ខណៈបំណុលចំនួន២២ម៉ឺនដុល្លារនៅមិនទាន់ដោះស្រាយ។
សង្ឃប្រកាសបានលើកឡើងថា៖ «ត្រូវបានប្រគល់តំណែងព្រះចៅអធិការវត្តព្រះវិហារធំសសរ១០០ ប្រគេនព្រះសិរីសម្ភារ៍ អេង ផល្លា ដើម្បីដឹកនាំគ្រប់គ្រងនិងទទួលខុសត្រូវសារជាថ្មីឡើងវិញនូវរាល់កិច្ចការទាំងឡាយ រួមមាន ការងារសាងសង់ ការងារសាលាពុទ្ធិកសិក្សាក្នុងវត្ត អប់រំភិក្ខុសាមណេរឱ្យស្ថិតក្នុងធម៌វិន័យ និងថែរក្សាបេតិកភណ្ឌ និងគរុភណ្ឌវត្ត ចាប់ពីខែមករា ឆ្នាំ២០២១ តទៅ»។
នៅក្នុងសង្ឃប្រកាសដដែល ក៏បានកំណត់ឱ្យព្រះតេជគុណ អេង ផល្លា ត្រូវតែរាយការណ៍ថ្វាយគណៈសង្ឃនាយក អំពីប្រាក់ចំណូលនិងចំណាយទាំងអស់ជារៀងរាល់មួយត្រីមាសម្តង និងត្រូវទូរទាត់សំណងដល់ជាងម៉ៅការសំណង់ចំពោះសំណង់ដែលកំពុងសាងសង់ក្នុងវត្ត ទៅតាមកិច្ចសន្យាដែលបានធ្វើហើយ។
សម្តេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយកនៃព្រះរាជាណាចក្រកម្ពុជា មានសង្ឃដីកាថា ការតែងតាំងនេះគឺទាក់ទងទៅនឹងការស្នើសុំរបស់ម្ចាស់បំណុល។
ព្រះអង្គមានសង្ឃដីកាបន្តថា ដំបូងឡើយ ម្ចាស់បំណុលឈ្មោះ ជា ដារ៉ា បានដាក់ពាក្យបណ្តឹងសុំឱ្យដកភិក្ខុ អេង ផល្លា ចេញ ព្រោះវត្តមិនបានសងបំណុល ប៉ុន្តែព្រះគ្រូចៅអធិការថ្មីនិងគណៈកម្មការថ្មី ក៏មិនអាចសងបំណុលបានដែរ ទើបម្ចាស់បំណុលបានស្នើសុំឱ្យដាក់ភិក្ខុ អេង ផល្លា មកវិញ ដើម្បីទទួលខុសត្រូវនិងសងបំណុល។
បំណុលប្រហែល២២ម៉ឺនដុល្លារ គឺសម្រាប់គម្រោងសាងសង់សាលាក្នុងវត្ត នៅក្នុងស្រុកសំបូរ។ នេះបើតាមការបញ្ជាក់របស់សម្តេចព្រះពុទ្ធជ័យមុនី ឃឹម សន។
លោក ជា ដារ៉ា ជាម្ចាស់បំណុល បានប្រាប់វីអូឌីយ៉ាងខ្លីថា លោកពុំមានពាក់ព័ន្ធនឹងរឿងនេះទៀតទេ ដោយសារករណីនេះត្រូវបានថ្វាយប្រគេនសម្តេចព្រះសង្ឃនាយក ក្នុងការសម្របសម្រួលដោះស្រាយហើយ។
លោកមានប្រសាសន៍ថា៖ «សម្តេចសង្ឃ លោកអ្នកសម្របសម្រួលចប់ហើយ។ ខ្ញុំអត់មានអ្វីត្រូវចេញយោបល់ទៀតទេ»។
លោក ជា ដារ៉ា ក៏មិនប្រាប់ឱ្យចំថា តើលោកបានទទួលប្រាក់វិញហើយឬនៅ ឬទទួលបានពីអ្នកណាទេ។
ពាក់ព័ន្ធនឹងករណីនេះ ព្រះមេគណខេត្ត ព្រះតេជគុណ ទេព ហត្ថា និងព្រះមន្ត្រីសង្ឃគ្រប់ឋានានុក្រមទូទាំងខេត្តក្រចេះ បានថ្វាយលិខិតជូនសម្តេចព្រះសង្ឃគណៈ នន្ទ ង៉ែត នៅមុនពិធីប្រកាសតែងតាំង កាលពីថ្ងៃទី១១ ខែមករា ឆ្នាំ២០២១ ដោយប្រកាសជំទាស់នឹងការតែងតាំងភិក្ខុ អេង ផល្លា ជាព្រះគ្រូចៅអធិការវត្តព្រះវិហារធំសសរ១០០ ឡើងវិញ។
លិខិតដដែលបានស្នើដល់សម្តេចព្រះសង្ឃគណៈ ជួយសម្រួលរកដំណោះស្រាយប្រកបដោយភាពត្រឹមត្រូវយុត្តិធម៌ទៅលើអធិករណ៍នៅក្នុងវត្តព្រះវិហារធំសសរ១០០ ដែលអាចទទួលយកបានទាំងប្រជាពុទ្ធបរិស័ទនិងអាជ្ញាធរខេត្តក្រចេះទាំងមូល។
លិខិតដដែលបញ្ជាក់ថា៖ «ប្រសិនបើក្នុងករណីដែលមិនបានទទួលដំណោះស្រាយប្រកបដោយភាពយុត្តិធម៌ ដែលប្រជាពុទ្ធបរិស័ទនិងអាជ្ញាធរខេត្តក្រចេះទាំងមូលទទួលយកបាននោះទេ ទូលព្រះបង្គំ ព្រះករុណាទាំងអស់អង្គ នឹងលាលែងពីតួនាទីព្រះមន្ត្រីសង្ឃតាមឋានានុក្រម»។
លោក ជុំ សាវ៉ន មេឃុំសំបូរ មានប្រសាសន៍ថា ក្រៅពីបញ្ហានេះ ព្រះតេជគុណ អេង ផល្លា ក៏ប្រឈមនឹងការប្តឹងផ្តល់ពីប្រជាពុទ្ធបរិស័ទក្នុងមូលដ្ឋានផងដែរ ដែលបានជំទាស់នឹងការចាក់ដីលុបស្រះទឹកបុរាណមួយក្នុងវត្ត។ ប៉ុន្តែភិក្ខុ អេង ផល្លា នៅតែបន្តលុបស្រះទឹកនិងវាយកម្ទេចសំណង់ដទៃទៀតនៅក្នុងវត្ត។
មេឃុំរូបនេះបន្តថា ការសាងសង់សាលាពុទ្ធិកសិក្សាបានចាប់ផ្តើមនៅចុងឆ្នាំ២០១៧ ប៉ុន្តែបានផ្អាកទៅវិញបន្ទាប់ពីសាងសង់បានពាក់កណ្តាល។ លោកបានបន្ថែមថា ព្រះតេជគុណ អេង ផល្លា មានកំហុសក្នុងការបំផ្លាញបេតិកភណ្ឌក្នុងវត្ត និងការចាត់ចែងប្រាក់មិនបានត្រឹមត្រូវ។
លោក សាវ៉ន និយាយថា៖ «បើរកឃើញថា គាត់ [ព្រះតេជគុណ អេង ផល្លា] ប្រព្រឹត្តខុសច្បាប់ គួរតែផ្តន្ទាទោសគាត់តាមច្បាប់។ មានព្រះសង្ឃច្រើនណាស់ដែលមានសមត្ថភាពជំនួសគាត់»។
ចំណែកលោកតា សោ ម៉ុន ជាអតីតអាចារ្យនៅវត្តនេះ ឱ្យដឹងថា ប្រជាពុទ្ធបរិស័ទប្រហែល៧០នាក់ បានប្រមូលផ្តុំគ្នានៅខាងក្រៅវត្ត កាលពីថ្ងៃទី១៧ ខែមករា ឆ្នាំ២០២១ ដើម្បីជំទាស់នឹងការសម្រេចតែងតាំងព្រះតេជគុណ អេង ផល្លា ជាព្រះគ្រូចៅអធិការវត្តព្រះវិហារធំសសរ១០០នេះ។
លោកតាបាននិយាយថា៖ «ប្រជាពលរដ្ឋជំទាស់នឹងការវិលត្រឡប់មកវិញរបស់ភិក្ខុ អេង ផល្លា»។
លោកតាអះអាងដែរថា ព្រះតេជគុណ អេង ផល្លា ចាក់ដីលុបចោលនូវស្រះទឹកបុរាណដែលមានអាយុកាលតាំងពីឆ្នាំ១៥២៩ រួមនឹងបំផ្លាញចោលនូវសាលចាស់មួយដែលរក្សាទុកគំនូរបុរាណផងដែរ។
ព្រះតេជគុណ អេង ផល្លា មិនអាចទាក់ទងសុំសង្ឃដីកាបានទេ។
ព្រះតេជគុណ ឌន ស៊ីដន មន្ត្រីសង្ឃសាលាគណៈខេត្តក្រចេះ មានសង្ឃដីកាថា គណៈកម្មការវត្តថ្មី បានសងប្រាក់ចំនួន៣០លានរៀល (ប្រហែល៧ ៥០០ដុល្លារ) នៃបំណុលចំនួន២២ម៉ឺនដុល្លារ មុនពេលមានការតែងតាំងព្រះតេជគុណ អេង ផល្លា ប៉ុន្តែម្ចាស់បំណុលមិនបានយល់ព្រមតាមផែនការសងប្រាក់រយៈពេល២ឆ្នាំទេ និងទាមទារឱ្យព្រះតេជគុណ អេង ផល្លា វិលត្រឡប់មកវិញ។
ព្រះតេជគុណ ស៊ីដន មានសង្ឃដីកាថា៖ «ការតែងតាំងឡើងវិញនេះ ហាក់ដូចជាមិនទាន់មានតម្លាភាពគ្រប់គ្រាន់ទេ»។
លោក ស៊ូ សែ ប្រធានមន្ទីរធម្មការ និងសាសនាខេត្តក្រចេះ មានប្រសាសន៍ថា ដោយសារមានភាពចម្រូងចម្រាសច្រើននៅក្នុងវត្តនេះកាលពីអំឡុងបុណ្យកឋិនទានប្រចាំឆ្នាំ កាលពីថ្ងៃទី២៦ ខែតុលា វត្តនេះពុំសូវទទួលបានបច្ច័យច្រើនពីប្រជាពលរដ្ឋដូចឆ្នាំមុនៗនោះទេ ដែលធ្វើឱ្យវត្តក៏មិនមានបច្ច័យសម្រាប់សងម្ចាស់បំណុលដែរ។
លោកបានមានប្រសាសន៍ថា៖ «ម្ចាស់បំណុលគាត់អស់សង្ឃឹមនិងមិនទុកចិត្ត ហើយគាត់បានទាក់ទងទៅគណៈសង្ឃនាយក ដើម្បីស្នើសុំឱ្យយកព្រះតេជគុណ អេង ផល្លា មក [កាន់តួនាទីជាព្រះចៅអធិការវត្ត] វិញ ដើម្បីរកប្រាក់សងគាត់»។
លោក ងឹម សុខ នាយប៉ុស្តិ៍ឃុំសំបូរ បានមានប្រសាសន៍ថា ភាគីទាំងសងខាងមានកំហុសដូចគ្នាជុំវិញការគ្រប់គ្រងប្រាក់កាស។
លោកថា៖ «ប្រសិនបើយើងទះដៃម្ខាង វាមិនឮទេ។ ទាំងសងខាងមានកំហុសតិចតួចដូចគ្នា ប្រសិនបើមានការយោគយល់គ្នា បញ្ហានេះនឹងមិនអូសបន្លាយយូរអ៊ីចឹងទេ»។
បើតាមសង្ឃប្រកាសរបស់គណៈសង្ឃនាយក បានសម្រេចដាក់វត្តព្រះវិហារធំសសរ១០០ ឱ្យស្ថិតនៅក្រោមការគ្រប់គ្រងរបស់គណៈសង្ឃនាយក រហូតដល់វត្តនេះមានភាពប្រក្រតីនិងស្ថិរភាពដូចដើមវិញ ទើបគណៈសង្ឃនាយកប្រគល់វត្តនេះទៅឱ្យគណៈសង្ឃមូលដ្ឋានខេត្តក្រចេះគ្រប់គ្រងវិញ៕