លោកនាយករដ្ឋមន្ត្រី ហ៊ុន សែន ក្រើនរំឭកទៅរដ្ឋមន្ត្រីមួយចំនួននិងមន្ត្រីជាថ្នាក់ដឹកនាំគ្រប់លំដាប់ថ្នាក់ កុំឱ្យយកភរិយាមកលូកលាន់ការងារដល់ការិយាល័យ និងត្រូវពង្រឹងប្រសិទ្ធភាពការងារឡើងវិញ ដើម្បីកុំឱ្យមន្ត្រីក្រោមឱវាទអស់ជំនឿលើការដឹកនាំរបស់ខ្លួន។
លោកនាយករដ្ឋមន្ត្រី ហ៊ុន សែន បានថ្លែងក្នុងពិធីសម្ពោធសមិទ្ធផលអគារថ្មីរបស់ក្រសួងសាធារណការ និងដឹកជញ្ជូន នាព្រឹកថ្ងៃនេះថា កន្លងមក ការិយាល័យរបស់រដ្ឋមន្ត្រីមួយចំនួនត្រូវបានភរិយាចូលទៅរៀបចំនិងគ្រប់គ្រង ដែលករណីនេះលោកចាត់ទុកថាជាទង្វើមិនសមរម្យ ធ្វើឱ្យប៉ះពាល់ដល់ប្រសិទ្ធភាពការងារ និងធ្វើឱ្យមន្ត្រីក្រោមឱវាទអស់ជំនឿលើការដឹកនាំរបស់ខ្លួន។
លោកបានថ្លែងថា៖ «ថ្នាក់រដ្ឋមន្ត្រីក្តី ថ្នាក់ចៅហ្វាយខេត្តក្តី ចៅហ្វាយស្រុកក្តី ថ្នាក់ណាក៏ដោយ យល់ល្អ កុំឱ្យប្រពន្ធយើងមកឡូកឡំក្នុងបន្ទប់ការងាររបស់យើង។ ខ្ញុំតាមមើលច្រើនមនុស្សហើយ ដែលគ្រាន់តែឡើងតំណែងនេះតំណែងនោះ ប្រពន្ធទៅរៀបចំការិយាល័យឱ្យ រៀបចំហុងស៊ុយ បែរមុខទៅខាងណា ទីខាងណា»។
ទោះជាយ៉ាងណា លោកនាយករដ្ឋមន្ត្រី មិនបានបង្ហាញឈ្មោះរដ្ឋមន្ត្រីនិងមន្ត្រីដែលត្រូវបានភរិយាមកគ្រប់គ្រងរហូតដល់ការិយាល័យធ្វើការរបស់រដ្ឋនោះទេ ដោយសារទុកកិត្តិយសឱ្យពួកគេកែខ្លួនឡើងវិញ។
លោកថ្លែងបន្តថា៖ «វាមិនគប្បីភ្នែកមន្ត្រីធ្វើការជាមួយយើង ចាំបាច់ឱ្យប្រពន្ធមកត្រួតដល់ការិយាល័យកន្លែងធ្វើការរបស់ប្តីនោះ! កន្លែងធ្វើការល្អហើយ ប៉ុន្តែអ្វីសំខាន់ជាងនេះទៅទៀត ខ្ញុំសូមរំឭកគឺប្រសិទ្ធភាពការងារ បើអត់ប្រសិទ្ធភាពហើយបានសេចក្តីថា ទោះបីអគារវាល្អលើសហ្នឹង១០ដង ក៏វានៅតែប៉ុណ្ណឹងដែរ អញ្ចឹងកន្លែងការងារកាន់តែល្អ កាន់តែត្រូវធ្វើឱ្យមានប្រសិទ្ធភាព ហើយធ្វើទំនើបកម្ម»។
អ្នកនាំពាក្យប្រតិកម្មរហ័សទីស្តីការគណៈរដ្ឋមន្រ្តី លោក ផៃ ស៊ីផាន មានប្រសាសន៍ថា រដ្ឋាភិបាលក្រើនរំឭកដល់រដ្ឋមន្ត្រីរបស់ខ្លួន ដើម្បីឱ្យពួកគាត់ចេះកែខ្លួនឡើងវិញ។
លោកមានប្រសាសន៍ថា៖ «វាមិនស្របច្បាប់ទេ ខុសក្រមសីលធម៌ ដែលឡូកឡំបញ្ហាគ្រួសារ ឡូកឡំជាមួយការងារនៅក្នុងការិយាល័យ ពីព្រោះភរិយាមិនមានកាតព្វកិច្ច លិខិតស្នាមទទួលស្គាល់ពីរដ្ឋសម្រាប់មកបម្រើការងារនោះទេ ប៉ុន្តែគាត់អាចចូលរួមក្នុងនាមជាមនុស្សធម៌និងរឿងដទៃទៀតបាន មិនមែនឡូកឡំជាមួយការងារនៅការិយាល័យនោះទេ»។
អ្នកស្រាវជ្រាវប្រឹក្សាយោបល់ឯករាជ្យ និងជាប្រធានវិទ្យាស្ថានប្រជាធិបតេយ្យ លោក ប៉ា ចន្ទរឿន ផ្តល់ជាអនុសាសន៍ថា ដើម្បីទប់ស្កាត់កុំឱ្យភរិយារបស់មន្ត្រីជាន់ខ្ពស់រដ្ឋាភិបាលមកលូកលាន់ការងាររបស់ស្វាមី គឺរដ្ឋាភិបាលត្រូវពង្រឹងការអនុវត្តច្បាប់ស្តីពីសហលក្ខន្តិកៈមន្រ្តីរាជការស៊ីវិលទើបទទួលបានផលវិជ្ជមាន។
លោកមានប្រសាសន៍ថា៖ «យើងមានច្បាប់ស្តីពីសហលក្ខន្តិកៈមន្ត្រីរាជការស៊ីវិល បើសិនជាអនុវត្តឱ្យបានត្រឹមត្រូវទៅតាមគោលការណ៍ទាំងអស់នោះ ហើយប្រកាន់ក្រមសីលធម៌ក្នុងការធ្វើកិច្ចការងារជាគោល ជាជាងការយោគយល់ឬក៏ផ្តេកផ្តួលទៅលើមនុស្ស និន្នាការនយោបាយ បក្សពួក្ខឬគ្រួសារនិយម ទើបយើងអាចធានាបានប្រសិទ្ធភាពនិងគុណភាពនៃការងាររបស់មន្ត្រីក្នុងការបម្រើជាតិ»៕