កម្មកររោងចក្រយ៉ាងតិចណាស់ចំនួន៣នៅទីតាំងផ្សេងគ្នាក្នុងរាជធានីភ្នំពេញនិងខេត្តកំពង់ស្ពឺ បានធ្វើកូដកម្មទាមទារអត្ថប្រយោជន៍ការងាររៀងៗខ្លួន នៅថ្ងៃទី២២ ខែមករា ឆ្នាំ២០២០នេះ។
រោងចក្រដែលមានកម្មករធ្វើកូដកម្មនោះ រួមមាន រោងចក្រ Y&W, រោងចក្រ ខេនធើរេន (Centeren Apparel Co LTD,) និងក្រុមហ៊ុន ហូលីដេឌីហ្សាញ។ រោងចក្រ Y&W ស្ថិតនៅតាមបណ្ដោយផ្លូវ២១៧ ក្នុងសង្កាត់ព្រែកជ្រៃ ខណ្ឌដង្កោ រាជធានីភ្នំពេញ ដែលមានកម្មករតវ៉ាប្រមាណជាង៥០០នាក់។ រោងចក្រ ខេនធើរេន (Centeren Apperel Co LTD,) ស្ថិតនៅតាមបណ្ដោយផ្លូវវេងស្រេង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដែលមានកម្មករតវ៉ាប្រមាណជិត៤០០នាក់ ។ ក្រុមហ៊ុន ហូលីដេឌីហ្សាញ ស្ថិតនៅឃុំព្រៃល្វា ស្រុកគងពិសី ខេត្តកំពង់ស្ពឺ មានកម្មករតវ៉ាប្រមាណជិត៣០០នាក់។
ក្នុងចំណោមរោងចក្រទាំងបី មានកម្មកររោងចក្រចំនួន២នៅភ្នំពេញ ព្រមចូលធ្វើការវិញ ខណៈដែលកម្មកររោងចក្រមួយ នឹងបន្តធ្វើកូដកម្មនៅថ្ងៃស្អែកទៀត។
តំណាងកម្មកររោងចក្រ Y&W លោក ផាន់ បុរី ឱ្យដឹងថា កម្មកររោងចក្រ Y&W បានព្រមព្រៀងចូលធ្វើការវិញត្រឹមម៉ោង១២ថ្ងៃត្រង់ ថ្ងៃទី២២ ខែមករា បន្ទាប់ពីតវ៉ា២ថ្ងៃមកនោះ។
លោកបន្តថា ក្រុមហ៊ុនព្រមព្រៀងកំណត់កាលបរិច្ឆេទបើកប្រាក់អតីតភាពឆ្នាំ២០២០ និងប្រាក់អតីតភាពការងារមុនឆ្នាំ២០១៩ ឱ្យបានមុនថ្ងៃចូលឆ្នាំខ្មែរខាងមុខ ព្រមទាំងមិនកាត់ប្រាក់ខែកម្មករក្នុងរយៈពេលដែលកម្មករនាំគ្នាធ្វើកូដកម្មលើកនេះឡើយ។
ប្រសាសន៍លោក ផាន់ បុរី៖ «ការតវ៉ាកម្មករ២ថ្ងៃហ្នឹង បានសម្រេចលទ្ធផលភាគច្រើន ទើបពួកយើងចូលធ្វើការវិញ»។
តំណាងកម្មករនៅរោងចក្រ ខេនធើរេន (Centeren Apperel Co LTD,) អ្នកស្រី ណុប បូផាន ឱ្យដឹងថា កម្មករបម្រើការងារនៅរោងចក្រនេះ បានសម្រេចចូលធ្វើការវិញនៅថ្ងៃទី២៣ ខែមករា បន្ទាប់ពីភាគីរោងចក្រព្រមព្រៀងតាមចំណុចមួយចំនួនដែលកម្មករទាមទារមកនោះ។
ប្រសាសន៍អ្នកស្រី ណុប បូផាន៖ «ខាងក្រុមហ៊ុនគេព្រមបើកប្រាក់ឱ្យពួកយើងបានទៀងទាត់ជាងមុន និងព្រមចរចាកំណត់ថ្ងៃបើកប្រាក់អតីតភាពការងារ។ ដូច្នេះពួកយើងព្រមចូលធ្វើការវិញ បើពួកគេក្រឡាស់ពាក្យ យើងនឹងចេញតវ៉ាជាថ្មីទៀត»។
តំណាងសហជីពប្រចាំរោងចក្រ ហូលីដេឌីហ្សាញ លោក ឱ សុផល ឱ្យដឹងថា កម្មករប្រមាណជាង៣រយនាក់ធ្វើកូដកម្មមួយព្រឹកថ្ងៃទី២២ ខែមករានេះ ដើម្បីទាមទារឱ្យរោងចក្របើកប្រាក់អតីតភាពការងារ គោរពសិទ្ធិកម្មករ និងទាមទារឱ្យរោងចក្រអនុញ្ញាតឱ្យតំណាងសហជីពចូលធ្វើការវិញ។ លោកថា ភាគីរោងចក្រមិនទាន់ឆ្លើយតបចំពោះការទាមទាររបស់កម្មករនៅឡើយ។
លោក ឱ សុផល មានប្រសាសន៍ថា៖ «កម្មករនឹងនៅតែធ្វើកូដកម្មបន្តទៀត បើសិនជានៅតែមិនមានដំណោះស្រាយ»។
វិអូឌី មិនអាចទាក់ទងតំណាងរោងចក្រ ហូលីដេឌីហ្សាញ ដើម្បីបំភ្លឺបញ្ហានេះបានទេ នៅថ្ងៃទី២២ ខែមករា ឆ្នាំ២០២១។
ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា កូដកម្មកើតឡើងភាគច្រើននៅក្នុងឆ្នាំថ្មីនេះ គឺពាក់ព័ន្ធនឹងការទាមទារប្រាក់អតីតភាពការងារ និងប្រាក់រំឭកអតីតភាពការងារ។ អ្នកស្រីបន្តថា កម្មករចេញតវ៉ាគឺដោយសារតែកម្មករគាត់រង់ចាំប្រាក់អតីតភាពការងាររយៈពេលយូរពេក ម្យ៉ាងទៀតក្រុមកម្មករយល់ថាពួកគាត់ត្រូវគេកេងប្រវ័ញ្ច។
អ្នកស្រី យ៉ាង សុភ័ណ្ឌ និយាយថា៖ «ខ្ញុំចូលរួមជជែកគ្នាជាមួយក្រុមហ៊ុនច្រើនគួរសមដែរ ដើម្បីដាក់ពាក្យសុំបើកប្រាក់អតីតភាពការងារ ក្រុមហ៊ុនភាគច្រើនគាត់ឆ្លើយថា បើរដ្ឋាភិបាលសម្រេចម៉េច គេធ្វើអ៊ីចឹង។ ខ្ញុំយល់ថា ខាងក្រុមហ៊ុនគេចាំធ្វើតាមក្រសួងការងារប៉ុណ្ណោះ»។
ទាក់ទងនឹងបញ្ហាប្រាក់អតីតភាពការងារ ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី២១ ខែមករា បានជូនដំណឹងដល់ម្ចាស់រោងចក្រសហគ្រាសទាំងអស់ ត្រូវបើកប្រាក់រំឭកនិងប្រាក់ដំណាច់អតីតភាពការងារជូនកម្មករឡើងវិញ ក្រោយពីក្រុមកម្មករផ្ទុះការតវ៉ាជាបន្តបន្ទាប់នៅដើមឆ្នាំ២០២១នេះ។
ក្រសួងការងារបញ្ជាក់ថា ប្រាក់រំឭកអតីតភាពការងារមានមុនឆ្នាំ២០១៩ (ប្រសិនបើមាន) ដែលថៅកែនៅជំពាក់កម្មករនោះ ត្រូវបើកជូនកម្មករនៅឆ្នាំ២០២០ ដោយអនុវត្តទូរទាត់នៅក្នុងត្រីមាសទី១ និងត្រីមាសទី៣។ ចំណែកឯប្រាក់រំឭកអតីតភាពការងារមានមុនឆ្នាំ២០១៩នេះដែរ ដែលត្រូវបើកក្នុងឆ្នាំ២០២១ គឺត្រូវអនុវត្តទូរទាត់ជូនកម្មករក្នុងត្រីមាសទី២ និងទី៤៕