របាយការណ៍ជាតិលទ្ធផលចុងក្រោយនៃជំរឿនដែលចេញផ្សាយដោយក្រសួងផែនការ ថ្ងៃទី២៦ខែមករានេះ បង្ហាញថា កម្ពុជាមានពលរដ្ឋជាង១៥លាន៥សែននាក់ គិតត្រឹមខែមីនា ឆ្នាំ២០១៩ ខណៈដែល១១ឆ្នាំមុន គឺនៅឆ្នាំ២០០៨ មានចំនួនជាង១៣លាន៣សែននាក់ ( ១៣ ៣៩៥ ៦៨២) នាក់។
របាយការណ៍ដដែលបង្ហាញថា ចំនួនមនុស្សប្រុសមាន៤៨,៧ភាគរយនៃចំនួនប្រជាជនកម្ពុជាសរុប ខណៈពេលដែលចំនួនស្ត្រីមានស្មើនឹង៥១,៣ភាគរយនៃចំនួនប្រជាជនសរុប។ ពលរដ្ឋរស់នៅជនបទមាន៣៩,៤ភាគរយ ឯអ្នករស់នៅទីប្រជុំជនមាន៦០,៦ភាគរយ។ ដង់ស៊ីតេប្រជាជន គឺកម្ពុជាមានប្រជាជនចំនួន៨៧នាក់រស់នៅលើផ្ទៃដីក្នុង១គីឡូម៉ែត្រការ៉េ។ ជំរឿនក៏រកឃើញដែរថា ជនអន្តោប្រវេសន៍រស់នៅកម្ពុជាមានប្រមាណ៩ម៉ឺន៨ពាន់នាក់។
របាយការណ៍ដដែលបន្តទៀតថា អត្រាកំណើនប្រជាជនប្រចាំឆ្នាំ បានថយចុះពី១,៥ភាគរយ ក្នុងចន្លោះឆ្នាំ១៩៩៨ និង២០០៨ មក១,២ភាគរយ ក្នុងចន្លោះឆ្នាំ២០០៨ និង២០១៩។
រដ្ឋមន្ត្រីក្រសួងផែនការ លោក ឆាយ ថន មានប្រសាសន៍ថា អត្រាកំណើនរបស់ប្រជាជនកម្ពុជា មានការប្រែប្រួលពីខេត្តមួយទៅខេត្តមួយ ក្នុងនោះអត្រាកំណើនថ្នាក់ជាតិមានត្រឹម១,៤ភាគ រយ។ លោកបន្ថែមថា សព្វថ្ងៃនេះគូស្រករនៅកម្ពុជាមានកូនជាមធ្យមត្រឹម២ទៅ៣នាក់ប៉ុណ្ណោះ ដោយសារតែពួកគេប្រើប្រាស់ផែនការគ្រួសារឬវិធីពន្យារកំណើត។
លោក ឆាយ ថន មានប្រសាសន៍ថា៖ «ការចុះអត្រាលទ្ធភាពបង្កើតកូននិងកំណើនកម្លាំងពលកម្ម គឺជាឱកាសនិងភាគលាភប្រជាសាស្ត្រ។ ភាគលាភប្រជាសាស្ត្រនេះគួរតែទទួលការចាប់អារម្មណ៍ ជាពិសេសក្នុងចំណោមអ្នករៀបចំផែនការ អ្នកគ្រប់គ្រងនិងអ្នកនយោបាយ ក្នុងអំឡុងពេលប៉ុន្មានឆ្នាំខាងមុខ»។
ប្រធានស្ដីទីមូលនិធិសហប្រជាជាតិសម្រាប់ប្រជាជន (UNFPA) ប្រចាំនៅកម្ពុជា លោក ដានីញែល អាលេមូ លើកឡើងថា ទិន្នន័យជំរឿនជាប្រភពព័ត៌មានដ៏មានសារៈសំខាន់ សម្រាប់ អ្នករៀបចំគោលនយោបាយឆ្លើយតបឱ្យកាន់តែមានប្រសិទ្ធភាពចំពោះក្រុមងាយរងគ្រោះ។
លោក ដានីញែល អាលេមូ បានថ្លែងបន្ថែមថា៖ «សមាមាត្រកុមារអាយុក្រោម១៥ឆ្នាំ មានការធ្លាក់ចុះជាលំដាប់ ដែលផ្ទុយពីសមាមាត្រប្រជាជនមានអាយុ៦០ឆ្នាំ មានការកើនឡើង។ របាយអាយុប្រជាជនកំពុងមានទំនោរពីអាយុវ័យក្មេងទៅវ័យកណ្ដាល ហើយឈានទៅរកវ័យចាស់បន្តិចម្ដងៗ ដែលទាមទារឱ្យមានការបង្កើនការវិនិយោគទៅលើក្រុមប្រជាជនវ័យក្មេង ដើម្បីឱ្យកម្ពុជាមានភាគលាភប្រជាសាស្ត្រ»។
លទ្ធផលជំរឿនឆ្នាំ២០១៩ ដដែលបង្ហាញថា ប្រជាជនរស់នៅកម្ពុជាអាយុពី០ដល់១៤ឆ្នាំ មានចំនួនជាង៤លាន៥សែន (៤ ៥៧១ ១៤០) នាក់។ ប្រជាជនមានអាយុ១៥ឆ្នាំដល់១៩ឆ្នាំ មានចំនួនជាង៩លាន (៩ ៦០២ ៣៨៣) នាក់។ ប្រជាជនមានអាយុចាប់ពី៦០ឆ្នាំឡើង មានចំនួន ជាង១លាន៣សែននាក់ (១ ៣៧៨ ៦៨៨) នាក់។
អត្រាចេះអក្សររបស់ប្រជាជនដែលមានអាយុ៧ឆ្នាំឡើង មានចំនួន៨៨,៥ភាគរយ។ មនុស្សអាយុពី១៥ ដល់៥៩ឆ្នាំ ដែលចូលរួមកម្លាំងពលកម្ម មានចំនួន៨១,៧ភាគរយ។ គ្រួសារចំនួនជាង៦០ភាគរយ ប្រើអុសសម្រាប់ចម្អិនអាហារ ។
អត្រាមរណភាពទារកមានចំនួន១៨នាក់ក្នុងកំណើត១ ០០០កំណើត។ អត្រាមរណភាពមាតា មានចំនួន១៤១នាក់ក្នុងចំណោមកំណើតរស់១០០ ០០០កំណើត។
ចំណែកឯអាយុសង្ឃឹមរស់នៅកម្ពុជា គឺ៧៦ឆ្នាំ ក្នុងនោះបុរស៧៤ឆ្នាំ ហើយស្ត្រី៧៧ឆ្នាំ។
ចាប់តាំងពីក្រោយការបោះឆ្នោតឆ្នាំ១៩៩៣មក រាជរដ្ឋាភិបាលកម្ពុជាធ្លាប់ធ្វើជំរឿនចំនួន៣ដងរួចមកហើយ។ ជំរឿនលើកទី១ នៅឆ្នាំ១៩៩៨ រកឃើញប្រជាជនចំនួនជាង១១,៤លាននាក់។ ជំរឿនឆ្នាំ២០០៨ រកឃើញប្រជាជនមានចំនួន១៣,៤លាននាក់។ ជំរឿនឆ្នាំ២០១៩ ប្រជាជនរស់នៅកម្ពុជា មានចំនួន១៥,៥លាននាក់៕